Xana Vandlha Ra Ka N’wina Ri Ni Nsimu Leyikulu?

¹ Ku suka emitini ya Yudiya ku ya eka matiko-xikaya ya Galeliya, Yesu u nyikele vumbhoni bya rixaladza etikweni hinkwaro ra Israyele wa khale. (Mar. 1:38, 39; Luka 23:5) Na hina, hi fanele ku fikelela vanhu vo tala hilaha hi nga kotaka hakona hi mahungu lamanene. (Mar. 13:10) Hambiswiritano, sweswo a hi matlangwana. Ha yini?

² Mavandlha yo tala ma ni nsimu leyi vukulu bya yona ku nga matiko-xikaya, leyi hlanganisaka madzana ya tikhilomitara. Mavandlha lama tirhisaka tindzimi timbe ma nga ha tirha tindhawu ta madoroba leti nga ni vanhu vo tala, ma lava vanhu lava vulavulaka tindzimi ta wona. I yini lexi hi nga xi endlaka ku pfuna vanhu lava tshamaka emasin’wini wolawo lamakulu swonghasi leswaku va dyondza ntiyiso malunghana na Yehovha, Yesu ni hi Mfumo?

³ Kunguhata Hi Vukheta: Mulanguteri wa ntirho ni la tamelaka masimu va fanele ku kongomisa matirhelo ya vandlha leswaku ku ta va ni vuyelo lebyinene. Kumbexana ku nga hleriwa ku tirha nsimu hi Migqivela yo hlawuleka, leyi vo tala va nga kotaka ku tirha siku hinkwaro. Loko mi tirha masimu ya le kule, tiyimiseleni ku tirha nkarhi wo leha ensin’wini loko swi koteka, mi longa swakudya leswi mi nga ta swi dya ninhlikanhi. Mi nga ha hlangana ku ya ensin’wini ka ha ri mixo ku tlula nkarhi lowu tolovelekeke, leswaku mi ta kuma nkarhi wo teka riendzo ro ya ensin’wini yoleyo kumbe wo khoma nhlangano wa ntirho wa nsimu ekusuhi ni laha mi nga ta tirhela kona. Hlelani mintlawa ya lava fambaka hi mimovha hi ndlela leyi nga ta endla leswaku hinkwavo va va ni nsimu leyi ringaneke. Hlelani ku tirha tindhawu ta le makaya hi nkarhi lowu maxelo ma nga manene ni mapatu ma fambekaka.

⁴ Lava va tirhaka masimu ya tindzimi timbe va nga hlayisa nkarhi wa risima, hi ku va ni nxaxamelo wa mavito ni tiadirese, leswi nga enkarhini ni mepe wa sweswinyana. Hlelani masimu hi ndlela leyi nga ta endla leswaku lava nga ensin’wini va kota ku endzela miti hinkwayo endhawini yoleyo.

⁵ Tiyisekani leswaku mi famba ni mphakelo lowu ringaneke wa tibuku. Loko nsimu yoleyo yi tirhiwa hi xiwelo, swi ta va swinene ku siya xiphephana kumbe magazini wa khale emakaya lama nga riki na vanhu. Loko xiphephana lexi nge Xana U Lava Ku Tiva Swo Tala Hi Bibele? xi ri kona hi ririmi ra ka n’wina, xi nyike un’wana ni un’wana loyi u hlanganaka na yena naswona u xi siya emakaya lama nga riki na vanhu.

⁶ Tirhisana Ni Van’wana Hilaha Ku Heleleke: Ku tirha masimu lamakulu swi lava ntirhisano wa hinkwavo evandlheni. Loko swi lava leswaku ku tirhisiwa mimovha swinene, lava fambaka ha yona va fanele ku pfuna hi mali yo chela mafurha. Ku fanele ku tirhisiwa ku anakanyela loko ku kumiwa vini va miti lava lavaka ku tiva swo tala. Tshama u ri karhi u xalamukele xilaveko xa ku fikelela vanhu hinkwavo ensin’wini yoleyo naswona u anakanyela lava u fambaka na vona emovheni. Loko u lava ku yisa bulo emahlweni ni munhu la tsakelaka, xana ku nga endliwa malunghiselelo ya leswaku lava u fambaka na vona va nga ku rindzi?

⁷ Endla malunghiselelo lama tiyeke ya ku tlhelela eka hinkwavo lava kombiseke ku tsakela. Handle ko kuma adirese ya munhu yoloye, ringeta ku kuma ni nomboro ya yena ya riqingho leswaku u ta burisana na yena ni ku n’wi chumayela hi riqingho. Loko mapatu ya le makaya ma nga thyiwanga mavito kumbe tindlu ta kona ti nga ri na tinomboro, dirowa mepe hi vukheta kumbe u tsala leswi nga ta ku pfuna ku fika ekaya ra munhu la tsakelaka loko u tlhelela eka yena.

⁸ Mawaku lunghelo leri hi nga na rona ra ku hetisisa swileriso swa Yesu leswi nge: “Emutini kumbe eximutanini xin’wana ni xin’wana lexi mi nga ta nghena eka xona, lavisisani loyi swi n’wi fanelaka”! (Mat. 10:11) Hakunene Yehovha u ta katekisa matshalatshala ya wena loko u ri karhi u tinyiketela hi ku tirhandzela entirhweni lowu vuyerisaka swonghasi!