Xana U Nga Vuyeriwa Hi Ku Va Ni Nsimu Ya Wena N’wini?

1. Nsimu ya wena n’wini i yini?

¹ Nsimu ya wena n’wini i yini? Yi kumeka emavandlheni lawa ma nga ni nsimu leyikulu naswona i nsimu ya wena n’wini, kumbexana yi nga ha va yi ri ekusuhi ni laha u tshamaka kona. Buku leyi nge Ku Hleleriwa, tluka 103 ya hlamusela: “Loko u ri ni nsimu ya wena n’wini leyi nga le kusuhi na wena, swi ta ku pfuna leswaku u wu tirhisa kahle nkarhi lowu u nga na wona wo huma nsimu. Naswona u nga ha navela ku rhamba muhuweleri un’wana leswaku a tirha na wena ensin’wini leyi u tikombeleleke yona.”

2. Xana nsimu ya munhu yi nga tirhiwa njhani leswaku yi seketela ku chumayela hi ntlawa?

² Ku Chumayela Hi Ntlawa: Loko u kuma nsimu ya wena n’wini ekusuhi ni laha u tirhaka kona, u nga ha huma nsimu hi nkarhi wo wisa kumbe loko u chayisa, kumbexana u nga ha tirha nsimu yoleyo ni muhuweleri wo karhi loyi a tirhaka ekusuhi. Loko wo kuma nsimu ekusuhi ni le kaya ka wena, wena ni ndyangu wa wena mi nga ha chumayela ni madyambu ensin’wini yoleyo. Loko u huma nsimu handle ko hlangana ni vamakwerhu leswaku mi khoma nhlangano wa ntirho, i swinene ku rhanga hi ku khongela u kombela nkongomiso wa Yehovha u nga si sungula ku chumayela. (Filp. 4:6) Tlhandlakambirhi, u fanele u ringanisela eka nkarhi lowu u tirhaka nsimu ya wena n’wini ni lowu u seketelaka malunghiselelo ya nsimu leyi tirhiwaka hi ntlawa wa vandlha. I swinene ku seketela ntlawa wa wena ngopfu-ngopfu hi mahelo vhiki, laha mi hlanganaka kona leswaku mi huma nsimu.

3. Hi byihi vuyelo byo va ni nsimu ya wena n’wini?

³ Vuyelo: Loko u ri ni nsimu ya wena n’wini, u ni ndhawu leyi u nga chumayelaka eka yona loko xiyimiso xa wena xi ku pfumelela. U nga ha heta nkarhi lowu engetelekeke u ri eku chumayeleni naswona u nga heti nkarhi wo tala u ri eku fambeni. Lunghiselelo leri ri pfuna van’wana leswaku va va maphayona ya nkarhinyana kumbe ya nkarhi hinkwawo. Leswi vini va miti lava tsakelaka va tshamaka ekusuhi na wena, swi ta ku olovela leswaku u endla maendzo yo vuyela ni ku fambisa dyondzo ya Bibele. Vo tala va kuma leswaku ku chumayela ensin’wini ya vona vini swi va pfuna ku tolovelana ni vini va miti ni ku ya va tshembana, ngopfu-ngopfu loko va tirha nsimu yoleyo hi ku phindha-phindha yi nga si nyikiwa vahuweleri van’wana. Xana ku tirha nsimu ya wena n’wini swi nga ku pfuna wena ni ndyangu wa wena leswaku mi hetisisa vutirheli bya n’wina hi xitalo?—2 Tim. 4:5.