Ndlela Leyi U Nga Chumayelaka Ha Yona eNdhawini Ya Mabindzu
1. Hi byihi vuyelo byin’wana lebyi vaka kona hikwalaho ko tirha nsimu ya mabindzu?
1 Xana u nga tsakela ku chumayela endhawini leyi vanhu va kona hi ntolovelo va amukelaka vaendzi naswona minkarhi yo tala va kumekaka va ri kona? U nga chumayela kona kwala nsin’wini ya vandlha ra n’wina. Xana u nga yi tirha njhani nsimu ya kona? Hi ku nghena eswitolo leswi nga kona. Hakanyingi vahuweleri lava chumayelaka eswitolo va tiphina hi vuyelo lebyinene lebyi vaka kona.
2. Xana nsimu ya tindhawu ta mabindzu yi nga hleriwa njhani?
2 Mavandlha man’wana, nsimu ya wona yi katsa tindhawu letikulu ta mabindzu. Makwerhu la langutelaka nsimu a nga ha endla makhadi yo hlawuleka ya mepe wa nsimu yoleyo leyi nga ni mabindzu yo tala. Makhadi ya mepe ya miti yihi na yihi leyi vandzamaneke ni ndhawu ya mabindzu ma fanele ma swi kombisa kahle leswaku ndhawu yoleyo ya mabindzu a yi fanelanga yi tirhiwa xikan’we ni miti yoleyo. Emasin’wini man’wana tindhawu ta mabindzu ti nga ha tirhiwa xikan’we ni miti leyi vandzamaneke na tona. Loko u nga si tshama u chumayela etindhawini ta mabindzu, sungula hi ku ringeta eswitolo leswitsongo.
3. I yini leswi nga ta hi pfuna leswaku hi kuma vuyelo lebyinene loko hi chumayela eswitolo?
3 Tirhisa Xingheniso Xo Olova: Loko u chumayela eswitolo, i swa nkoka ku ambala ku fana niloko u ya enhlanganweni eHolweni ya Mfumo. Nakambe i swinene ku ya hi nkarhi lowu ku nga talangiki vaxavi. Loko swi koteka nghena loko ku nga ri na vaxavi. Kombela ku vulavula ni mininjhere kumbe munhu la khomeke xitolo. U komisa naswona u ba nhloko ya mhaka. Xana u nga ku yini eka yena?
4-6. Hi nga ku yini loko hi chumayela n’wini wa xitolo kumbe mininjhere?
4 Loko u vulavula ni n’wini wa xitolo kumbe mininjhere, u nga ha vula swin’wana swo fana ni leswi: “Van’wamabindzu va tshama va khomekile lerova a hi va kumi emakaya, hi swona swi nga hi endla hi ta laha ntirhweni wa wena. Timagazini ta hina ti hlamusela swiendlakalo swa sweswinyana leswi humelelaka emisaveni hinkwayo.” Kutani u hlamusela yinhla yin’we yo koma leyi nga eka magazini.
5 Kumbe u nga ha ringeta xingheniso lexi xo olova: “Vanhu vo tala va swi tsakela ku tiva to tala hi Bibele kambe a va na nkarhi wo nyawula. Xiphephana lexi xi hlamusela hi ta dyondzo ya mahala leyi nga ta ku pfuna u kuma tinhlamulo ta swivutiso swa wena swa Bibele.” Kutani u n’wi komba matluka 4-5 ya xiphephana lexi nge Xana U Lava Ku Tiva Swo Tala Hi Bibele?
6 Loko mulawuri wa xitolo a vonaka a khomekile, u ngo n’wi nyika xiphephana kutani u ku: “Ndzi ta tlhela ndzi vuya loko u nga khomekanga ngopfu. Ndzi lava ku tiva leswaku u ri yini hi xiphephana lexi.”
7. Xana hi nga ku hlakulela njhani ku tsakela ka munhu loyi hi n’wi kumeke ensin’wini ya mabindzu?
7 Hlakulela Ku Tsakela Koloko: U nga swi kota ni ku fambisa dyondzo ya Bibele ensin’wini ya mabindzu. Phayona rin’wana ro hlawuleka, nkarhi na nkarhi a ri yisela n’wamabindzu un’wana timagazini. Loko wanuna yoloye a hlamusela leswaku wa swi tsakela leswi a swi hlayaka, phayona ri n’wi kombise ndlela leyi dyondzo ya Bibele yi fambisiwaka ha yona hi broxara leyi nge Leswi Xi Swi Languteleke. Ku vhele ku sunguriwa dyondzo kona kwale ntirhweni wakwe. Leswi phayona a ri swi vona leswaku u le ntirhweni, a ri dyondza na yena timinete ta khume kumbe 15 loko ri n’wi endzerile. Na hina a hi hambeteni hi lavisisa lava fanelekaka, hi ku chumayela ensin’wini ya mabindzu.