Ku Antswisa Vutshila Bya Hina eNsin’wini—Ku Chumayela eNsin’wini Leyi Nga Ni Mabindzu

Lexi Endlaka Swi Va Swa Nkoka: Tanihi leswi vanhu vo tala va tirhaka tiawara to tala, hakanyingi ndlela leyinene yo va fikelela hi mahungu ya Mfumo i ku va chumayela laha va tirhaka kona. Ku chumayela endhawini leyi nga ni mabindzu swi nga tsakisa swi tlhela swi va ni vuyelo lebyinene hikuva a ku na laha hi nga ta ka hi nga kumi munhu naswona vatirhi va va ni musa eka vanhu lava tikombaka va te eku xaveni. Leswaku swilo swi va fambela kahle, vahuweleri va fanele va anakanyela va tlhela va ambala ni ku tilunghisa hi ndlela leyinene. (2 Kor. 6:3) Hikwalaho, mulanguteri wa ntirho u fanele a langutela leswaku nsimu ya laha ku nga ni mabindzu yi tirhiwa kangani naswona hi vamani.

Ndlela Leyi U Nga Swi Endlaka Ha Yona:

Lunghiselela xingheniso xo koma. Loko hi bula ni vatirhi nkarhi wo leha, a hi nge he tlheli hi nyikiwa nkarhi wo bula na vona enkarhini lowu taka.
Burisana ni vatirhi hi nkarhi lowu ku nga riki ni vaxavi vo tala, ku fana ni loko ka ha ku pfuriwa.
Ringeta ku rhanga u vulavula ni munhu loyi a langutelaka vatirhi. Vana ni musa ni xinghana. U nga ha ku, “Hi endzela vanhu swa xinkarhana laha va tirhaka kona hikuva swa tika ku va kuma emakaya.” Burisana na yena katsongo kutani u n’wi nyika xiphephana, timagazini kumbe nkandziyiso wun’wana. Leswaku va nga anakanyi leswaku hi le ku xaviseni ka swilo swo karhi, i swinene leswaku hi nga vulavuli hi mhaka ya munyikelo handle ka loko hi vutisiwa leswaku ntirho wa hina wu hakeleriwa njhani.
Loko munhu loyi a langutelaka vatirhi a ri ni xinghana, kombela mpfumelelo wo burisana katsongo ni vatirhi lavan’wana. Eka mabindzu man’wana, swi nga va swinene ku vutisa loko u nga siya minkandziyiso yin’wana endhawini leyi vatirhi va dyelaka eka yona kumbe laha va wiselaka kona.
Anakanyela vanhu naswona u pfumelelana ni swiyimo. Hi xikombiso, loko mutirhi a vulavula ni muxavi kumbe a khomekile, n’wi yimele a heta ku ri kona u nga bulaka na yena.

Ringeta Ku Endla Leswi N’hweti Leyi:

Eka Vugandzeri bya n’wina bya Ndyangu lebyi landzelaka, praktisani xingheniso xo koma lexi mi nga ha xi tirhisaka loko mi chumayela ensin’wini leyi nga ni mabindzu.