Ha Yini U Hlayisa Rhekhodo Ya Lava Nga Riki Kona Ekaya?
1 Mpatswa wun’wana wa Timbhoni a wu ri entirhweni wa nsimu siku rin’wana nimixo. Endzhakunyana hi siku rolero, wu tlhelele emakaya lawa wu nga kumangiki munhu eka wona. Wanuna un’wana u va amukerile ivi a yingisela hi vurhon’wana. U teke buku leyi nge Hanya Hi Masiku ivi a vutisa Timbhoni leti leswaku ti ta vuya rini. A a nga si tshama a vulavula ni Timbhoni ta Yehovha naswona a a ri ni swivutiso swo tala leswi a lava tinhlamulo ta swona; ku sunguriwe dyondzo ya Bibele na yena. Mpatswa lowu a wu tsake ngopfu loko wu kuma munhu wo tano la fanaka ni nyimpfu. Xana wa swi tsakela ku va ni ntokoto wo tano? Ku hlayisa rhekhodo ya lava nga riki kona ekaya ni ku tlhelela hi ku hatlisa swi nga ha endla leswaku u va ni ntokoto wo tano.
2 Hi khutaziwe hi ku phindha-phindha leswaku hi hlayisa rhekhodo leyinene ya lava nga riki kona ekaya ni ku tlhelela eka vona hi ku hatlisa. Hilaha ntokoto lowu nga laha henhla wu kombisaka hakona, ku va endzela esikwini rolero ku nga tisa vuyelo lebyinene. Hambiloko hi kunguhata ku hlanganisa nsimu leyi hi averiweke yona, swi nga endleka hi nga swi hisekeli ku hlayisa rhekhodo ya lava nga riki kona ekaya. Van’wana va ri: ‘Nsimu ya hina hi yi tirha mavhiki man’wana ni man’wana mambirhi kumbe manharhu; ku hava xilaveko xo hlayisa rhekhodo yo tano hikuva hi ta vuya ku nga ri khale.’ Kambe sweswo swi hi nyika xivangelo xin’wana xa ku hlayisa rhekhodo yo tano. Laha nsimu yi hlanganisiwaka nkarhi na nkarhi, ku tlhelela laha hi nga kumangiki vanhu kona swi hi pfuna ku lavisisa lava fanelekaka hi vukheta lebyikulu. Hi ndlela yihi?
3 Etindhawini to tala, vaaki vo ringana 50 wa tiphesente kumbe ku tlula a va vi kona ekaya ninhlikanhi. Hikwalaho, entiyisweni, hi endla leswaku nsimu yi va kona hi ku tlhelela eka lava nga kumekangiki emakaya. Hambiloko nsimu yi nga tirhiwi nkarhi na nkarhi, hi nga antswisa vuyelo bya kona loko hi endla matshalatshala yo fikelela un’wana ni un’wana hi nga si kombisa leswaku nsimu leyi se yi tirhiwe hi ku helela.
4 Ku tlhelela eka lava nga riki kona ekaya hakanyingi ku nga endliwa hi siku rin’wana, ngopfu-ngopfu vhiki ri nga si hela. Vo tala va kuma swi antswa ku tlhelela siku rolero naswona hi nkarhi lowu hambaneke ni lowu riendzo ro sungula ri endliweke ha wona. U nga ha hlawula ku tirhisa nkarhi wun’wana hi Mugqivela kumbe Sonto leswaku u ya eka lava nga kumekangiki ekaya exikarhi ka vhiki. Nakambe, mavandlha yo tala ma kuma leswaku ku endla maendzo yo tano hi mpimavayeni swa vuyerisa. Va nga ha kuma hafu ya vaaki va ndhawu yoleyo ekaya.
5 U fanele u endla nxaxamelo wa maendzo yo vuyela eka tirhekhodo ta wena n’wini. Loko u tsandzeka ku tlhelela emakaya lawa u nga kumangiki munhu eka wona, rhekhodo ya wena ya lava nga riki kona ekaya yi fanele yi nyikiwa makwerhu la rhangelaka ntlawa wolowo, leswaku yi ta tirhisiwa hi ntlawa lowu nga ta ya ensin’wini yoleyo enkarhini lowu taka.
6 Loko hi xalamukela xiyenge lexi xa vutirheli bya hina swi nga engetela mihandzu ya hina kun’we ni ntsako wa hina. Swi nga hi enerisa ku tiva leswaku hi tikarhatile eku lavisiseni ni le ku hlayiseni ka vanhu lava fanaka ni tinyimpfu.—Ezek. 34:11-14.