Ku Twarisa Mahungu Lamanene

Ensin’wini Leyi Tirhiwaka Nkarhi Na Nkarhi

1 Ku chumayela ensin’wini leyi tirhiwaka nkarhi na nkarhi swi tisa mintlhontlho leyi hlawulekeke. Xana u nga ri hlayisa njhani rungula ri ri lerintshwa ni leri tsakisaka? Hi nga va tshinelela njhani lava vonakaka va nga swi tsakeli hi laha ku heleleke? Xana hi nga ku yini eka lava va vulaka leswaku hi ta minkarhi hinkwayo?

VANA NI LANGUTELO LERINENE

2 Ku hambana ni leswi van’wana va nga ha swi ehleketaka, nsimu leyi tirhiwaka nkarhi na nkarhi na hi vukheta hi ntolovelo yi humesa mimbuyelo leyinene ku tlula leyi hi nga yi tirhiki nkarhi na nkarhi. Kutani xin’wana xa swiphiqo leswi faneleke ku hluriwa i langutelo rihi na rihi leri hoxeke hi ku endza nkarhi hinkwawo ekaya rin’we. Vanhu va fanele ku nyikiwa nkarhi wun’wana ni wun’wana leswaku va twa rungula ra Mfumo. Swi ta va swi hoxile eka hina ku heta hi leswaku Yehova u va avanyise tanihi lava nga fanelekiki lava nga kombisangiki ku tsakela kambe hi nga endzanga minkarhi yo tala.

3 Ku lehisa mbilu i swa nkoka ngopfu-ngopfu eka nsimu leyi tirhiwaka nkarhi na nkarhi. Ku va ni rungula leri hlawulekeke leri kombisaka leswi khumbaka vanhu kwalaho entiyisweni ku ta endla leswaku van’wana lava a va nga ta yingisa, va angula kahle. Xana u tshama u swi xalamukerile swiendlakalo swa sweswinyana, naswona xana u tiyimiserile ku kombisa ndlela leyi ha yona rungula ra Bibele ri nga pfunaka vanhu ku hlangavetana ni swiphiqo leswi va langutaneke na swona?

CINCA-CINCA KU TSHINELELA

4 Cinca ku tshinelela ka wena eka nsimu leyi tirhiwaka nkarhi na nkarhi. Nkarhi wun’wana u nga ha tirhisa xiphephana tanihi xiphemu xa xingheniso xa wena. Nkarhi wun’wana, xin’wana xa swingheniso leswi tlulaka 40 leswi ringanyetiweke eka buku leyi nge Reasoning eka matluka 9-15 xi nga ha cinciwa leswaku xi tlhantlha swiphiqo swa kwalaho. U nga ha tsakela ku kombetela eka muti lowu u humaka eka wona, xisweswo u papalata ku kanetana. Loko u xiye nhlamulo leyinene leyi n’wini wa yindlu a yi nyikeleke eka muti lowu u humaka eka wona, sweswo swi nga ha tirhisiwa tanihi nchumu wo sungula bulu rin’wana leri pfuxaka ku tsakela.

5 Languta vanhu hi laha Yehova a va langutaka ha kona, kutani u ya emahlweni u khathalela lava va nga ha vaka va hi byele leswaku a va tsakeli nikantsongo. Yehova u endle swikombelo swo tala eka vanhu va yena va khale ku nga khathariseki ku nga yingisi ka vona varhumiwa va yena. (2 Tikr. 36:15; Yer. 7:13) Vo tala lava eku sunguleni va titweke va nga tsakeli namuntlha i vamakwerhu wa hina va xinuna ni va xisati. Hambi ku ri vakaneti lavakulu va tisiwile entiyisweni. Sweswi lava va tsaka leswi un’wana hi ku lehisa mbilu a hambeteke a ta eka vona ni mahungu lamanene.

HLAYISA TIRHEKHODO LETINENE

6 I swa nkoka ngopfu ku hlayisa rhekhodo leyinene ya yindlu na yindlu. Ku landzelela lava a va nga ri kona ekaya swi ta tiyisekisa ku hlanganisiwa ka nsimu hi vukheta ni ku endla leswaku hi va ni nkarhi wo lehanyana hi nga si tlhelela eka lava va vaka kona ekaya. Van’wana va kume swi ri swinene ku teka tirhekhodo ta vona ta lava nga riki kona ekaya exikarhi ka vhiki va ti nyika lava tirhaka nsimu hi mahelo-vhiki. Kahle-kahle leswi swi cinca nkarhi lowu vini va miti va endzeriwaka ha wona naswona swi endla leswaku vanhu lava nkarhi na nkarhi va nga kumekiki eka minkarhi yin’wana ya siku na hi masiku man’wana exikarhi ka vhiki va kumeka. Swiringanyeto leswi engetelekeke swi nga ha kumiwa eka Xihondzo xo Rindza xa July 15, 1988, matluka 15-20.

7 Yehova wa swi tiva loko matshalatshala lama ringaneke ya endliwile ku fikelela hinkwavo lava nga ta yingisa. Ehansi ka vurhangeri bya Kriste, hi ta hambeta hi n’wi yingisa, hi ri ni ntshembo wa leswaku ntirho wu ta endliwa ku nga si hela nkarhi lowu vekiweke.—Ezek. 9:11.