‘Hundzisela Moya-xiviri Wa Wena’ Eka Swichudeni Swa Wena

1. I yini leswi lavekaka leswaku hi pfuna xichudeni xa hina xa Bibele?

¹ Leswaku u pfuna xichudeni xa wena xa Bibele kukondza xi tinyiketela, ku ni swo tala leswi u faneleke u swi endla ku tlula ku xi fambisela dyondzo ya Bibele nkarhi na nkarhi. Muapostola Pawulo u fanise vuxaka lebyi a a ri na byona ni vanhu lava a va dyondzisa ni bya manana loyi a khathalelaka vana vakwe. Na hina hi tsakela ku hundzisela “mimoya-xiviri ya hina” eka swichudeni swa hina leswaku hi swi pfuna leswaku swi endla nhluvuko hi tlhelo ra moya.—1 Tes. 2:7-9.

2. Ha yini hi fanele hi kombisa xichudeni leswaku ha xi rhandza naswona hi nga swi endlisa ku yini sweswo?

² Xi Kombise Leswaku Wa Xi Rhandza: Loko xichudeni xa Bibele xi ri karhi xi tirhisa leswi xi swi dyondzaka, ripfalo ra xona ri ta xi susumetela ku tihambanisa ni vanhu lava nga hanyiki hi milawu ya Bibele. (1 Pet. 4:4) Vandyangu wa xona va nga ha xi kaneta. (Mat. 10:34-36) Hi nga xi pfuna ku herisa gome leri xi nga na rona hi ku xi kombisa rirhandzu. Murhumiwa un’wana la nga ni ntokoto u ringanyeta leswi: “U nga hatli u famba loko mi heta ku dyondza. Loko swi koteka, tshamanyana u bula na xona.” Tshama u lunghekele ku xi pfuna. Hi xikombiso, xana u nga xi bela riqingho kumbe u xi endzela loko xi vabya? Xana u nga tshama na xona loko xi te eminhlanganweni naswona loko xi ri ni vana u xi pfuna ku va khathalela?

3. Hi nga xi pfuna njhani xichudeni xa hina leswaku xi kuma xikhutazo lexi humaka evandlheni?

³ Mpfuno Lowu Humaka eVandlheni: Loko u tirha nsimu ekusuhi ni laha xichudeni xa wena xi tshamaka kona, kumbexana u nga hundza hi le kaya ka xona leswaku u xi tivisa eka vamakwerhu lava u nga na vona. Loko swi koteka, nkarhi na nkarhi rhamba vahuweleri vo hambana-hambana ku katsa ni vakulu, leswaku va famba na wena loko u ya dyondza na xona. Endzhaku ka loko u sungule ku dyondza na xona, xi khutaze ku va kona eminhlanganweni eHolweni ya Mfumo. Leswi swi ta xi pfuna ku tiphina hi vunghana lebyi akaka ni swirho swa vandlha leswi hi ku famba ka nkarhi swi nga ta va vamakwerhu va xona va moya.—Mar. 10:29, 30; Hev. 10:24, 25.

4. Xana hi ta vuyeriwa njhani loko hi tikarhata?

⁴ Mutswari loyi a tirhaka hi matimba ku pfuna vana vakwe leswaku va endla ntiyiso wu va wa vona, wa tsaka swinene loko va hambeta va tirhela Yehovha naswona va famba entiyisweni. (3 Yoh. 4) Na hina hi ta va ni ntsako wo tano loko hi tikarhatela ku hundzisela mimoya-xiviri ya hina eka swichudeni swa hina swa Bibele.