Xana Ndza Faneleka Ku Chumayela?
1. Ha yini hi nga fanelanga hi titwa hi nga faneleki ku chumayela?
1 Loko ku ri leswaku u tshame u tivutisa xivutiso lexi, sweswo swi nga ku karhati! Leswaku hi faneleka tanihi vadyondzisi, a swi kali swi lava leswaku hi kuma dyondzo yo hlawuleka kumbe hi va ni vuswikoti byo karhi byo hlawuleka lebyi hi nga velekiwa na byona. Van’wana va vadyondzisiwa vo sungula a va tiviwa tinihi “lava nga dyondzekangiki [ni] lava tolovelekeke.” Hambiswiritano, a va ri ni vuswikoti byo chumayela mahungu lamanene hikuva a va tiyimisele ku landzela xikombiso lexi vekiweke hi Yesu.—Mint. 4:13; 1 Pet. 2:21.
2. Hi tihi tindlela tin’wana leti Yesu a a ti tirhisa loko a dyondzisa?
2 Ndlela Leyi Yesu A A Dyondzisa Ha Yona: A a dyondzisa hi ndlela yo olova, leyi nga erivaleni ni leyi twisisekaka. Swivutiso swakwe, swifaniso swakwe ni swingheniso swakwe leswi a swi nga rharhangananga swi koke vayingiseri vakwe. (Mat. 6:26) A a rhandza vanhu. (Mat. 14:14) Ku tlula kwalaho, Yesu a vulavula ku kota munhu la nga ni vulawuri ni hi ku titshemba hikuva a a swi tiva leswaku Yehovha u n’wi rhumile naswona u n’wi nyika matimba yo hetisisa xiavelo xakwe.—Luka 4:18.
3. Yehovha u hi pfuna njhani leswaku hi hetisisa vutirheli bya hina?
3 Yehovha Wa Hi Pfuna: Muleteri wa hina Lonkulu u tirhisa Rito rakwe ni nhlengeletano yakwe ku hi letela leswaku hi chumayela mahungu lamanene hi ndlela leyinene. (Esa. 54:13) Leswi Yehovha a nga tiyisekisa leswaku ndlela leyi Yesu a a dyondzisa ha yona yi tsariwa ehansi ni ku hlayisiwa, ha swi kota ku yi kambisisa ni ku tekelela tindlela leti a a ti tirhisa loko a dyondzisa. Yehovha u hi nyika moya wakwe lowo kwetsima ni ku hi letela hi ku tirhisa minhlangano ya vandlha. (Yoh. 14:26) Ku engetela kwalaho, u hi nyika vahuweleri lava nga ni ntokoto lava nga ta hi pfuna leswaku hi va ni vutshila.
4. Ha yini hi ri ni xivangelo lexi twalaka xo titwa hi faneleka ku byela van’wana hi mahungu lamanene?
4 Hi ni xivangelo xa ku titwa hi faneleka ku chumayela tanihi leswi ‘ku faneleka kahle ka hina ku humaka eka Xikwembu.’ (2 Kor. 3:5) Loko hi titshega hi Yehovha naswona hi ma tirhisa hi ndlela leyinene malunghiselelo yakwe ya rirhandzu, hi ta “faneleka hi ku helela, [hi] hlomisiwa hi ku helela eka ntirho wun’wana ni wun’wana lowunene.”—2 Tim. 3:17.