I Mani La Fanelekaka Ku Chumayela?

¹ Malunghana ni vutirheli, xana u tshama u titwa ku fana na Muxe? U te: “Yo! Wena Hosi, a nḍi munhu l’a tiv̌aka ku v̌ulav̌ula ŝinene, hambi ku ri tolo, ne tolweni, hambi ku ri loko u sungurile ku v̌ulav̌ula ni nanḍa wa wena.” (Eks. 4:10) Loko u titwa hi ndlela yoleyo, u nga ha va ni mboyamelo wo tshika ku chumayela. Kambe, Yesu “ú hi lerisile ku twarisa Evhangeli etikweni, ni ku tiyisa vumbhoni.” (Mint. 10:42) Hikwalaho xana hi nga va vachumayeri lava fanelekaka va mahungu lamanene hi ndlela yihi?

² A hi xiyimo xa dyondzo ya hina ya misava lexi hi endlaka hi fanelekela vutirheli. Pawulo u vule leswaku “a va talanga lava tlhariheke hi ndlela ya nyama lava vitaniweke” naswona “vutlhari bya misava leyi i vuhunguki emahlweni ka Xikwembu.” (1 Kor. 1:26, NW; 3:19) Yesu u hlawule vaapostola vakwe exikarhi ka lava tirhaka mintirho leyi tolovelekeke—va mune a va tirha ku phasa tinhlampfi. Varhangeri va vukhongeri lava tikukumuxaka va va langutele hansi tanihi “vanhu ntsena, lava ni ku dyondza va nga dyondzangiki.” Loko va langutiwa hi ku ya hi mimpimanyeto ya misava, vaapostola a va nga fanelekeli ku chumayela. Kambe, nkulumo ya Petro leyi hisaka leyi nyikeriweke hi siku ra Pentekosta yi susumetele vanhu va 3000 leswaku va khuvuriwa!—Mint. 2:14, 37-41; 4:13.

³ Yehovha U Endla Leswaku Hi Fanelekela Ku Chumayela: Pawulo u te: “Ku faneleka ka hina ku huma eka Xikwembu.” (2 Kor. 3:5, NW) Yehovha, Xihlovo xa vutlhari, u dyondzise vanhu va timiliyoni leswaku va chumayela ntiyiso wa Mfumo eka van’wana. (Esa. 54:13) Vuyelo ni mihandzu ya ntirho lowu swi nga voniwa eka vanhu va 338 491 lava khuvuriweke n’wexemu tanihi “mapapila ya xibumabumelo” lama hanyaka. (2 Kor. 3:1-3, NW) Hi ni xivangelo lexi eneleke xo chumayela hi xivindzi ni ku khorwiseka hi swilo leswi hi swi dyondzeke eka Yehovha.

⁴ Nhlengeletano ya Xikwembu yi simeke nongonoko wa misava hinkwayo wo letela vatirheli. Hi ku tirhisa Matsalwa ni swilo swo hambana-hambana swo hi pfuna ku dyondza Bibele, ha dyondzisiwa ni ku leteriwa leswaku hi ‘va lava hetisekeke, hi tilulamisela’ ku chumayela. (2 Tim. 3:16, 17) Vo tala va tsakisiwe hi dyondzo leyi kumekaka etibukwini ta Sosayiti. Hi xikombiso, magazini wa le Sweden wu te: “Eka tidyondzo leti dyondzisiwaka hi Timbhoni ta Yehovha ku ni sayense ya Bibele ya xiyimo xa le henhla leyi dyondzisiwaka emisaveni hinkwayo.”

⁵ Hikwalaho ka nkongomiso lowu nyikeriwaka eminhlanganweni ya hina ya ntlhanu evhikini, nongonoko wa hina wo hlaya Bibele ni leswi yi swi dyondzisaka, ndzayo leyi humaka eXikolweni xa Vutirheli bya le Tilweni, mpfuno lowu humaka eka van’wana lava nga vatirheli lava nga ni ntokoto, naswona ku tlula hinkwaswo, nseketelo wa Yehovha hi moya wa yena lowo kwetsima, hi nga tiyiseka leswaku Yehovha u hi languta hi ri lava fanelekaka ku chumayela. “Kukota lava rhumiweke hi Xikwembu; hi vulavula emahlweni ka Xikwembu hi ri va ka Kriste.”—2 Kor. 2:17.

⁶ Loko hi tirhisa ndzetelo wa le tilweni lowu nyikeriwaka hi Xikwembu hi ku tirhisa nhlengeletano ya xona hi xitalo, ku hava xivangelo xo va hi tshika kumbe hi titwa hi chava. Hi nga chumayela van’wana hi ntsako, hi tiyiseka leswaku Yehovha u ta katekisa matshalatshala ya hina.—1 Kor. 3:6.