Hi Nga Karhali Eku Twariseni Ka Mahungu Lamanene
1 Vakreste vo sungula va amukele vutirheli bya vona hi ku hiseka swinene. Luka u vikile: “Masiku hinkwawo, a va nga rhuteli ku dyondzisa ni ku twarisa Evhangeli eTempeleni ne mindyangwini ya vanhu, va ku: ‘Mesiya, hi yena Yesu.’” (Mint. 5:42) A ku ri hava lexi a xi ta va sivela, hambi ku ri nxaniso wunene! (Mint. 8:4) A va byela van’wana malunghana ni ntiyiso masiku hinkwawo.
2 Ku vuriwa yini hi hina? Tivutise: ‘Xana ndza xi vona xihatla xa minkarhi leyi? Xana ndzi tiyimisele ku hambeta ndzi twarisa mahungu lamanene handle ko karhala?’
3 Swikombiso Swa Manguva Lawa Swa Ku Chumayela Handle Ko Karhala: Makwerhu un’wana wa xisati, loyi a karhatiwa hi pholiyo, a a nghenisiwe eka nchumu lowu n’wi pfunaka ku hefemula. A a nga swi koti ku ya eHolweni ya Mfumo kumbe ku ya enhlengeletanweni. Kambe a a tshama a khomekile swinene hi ku twarisa mahungu lamanene. Hi nkarhi wa ku pfaleriwa ka yena ku ringana 37 wa malembe, u kote ku pfuna vanhu vo ringana 17 leswaku va dyondza ntiyiso! Xana u swi endlise ku yini leswi? Hambileswi a nga swi koti ku famba hi yindlu na yindlu, u kume ndlela yo nyikela vumbhoni hi xitshuketa eka vanhu lava a kotaka ku va vona siku na siku.
4 Vamakwerhu va le Bosnia va boheke ku tiyisela nyimpi ni ku lahlekeriwa. Hambiswiritano, nkarhi na nkarhi a va hambeta va chumayela eka van’wana. Le Sarajevo vahuweleri a va hamba va endla avhareji ya 20 wa tiawara n’hweti na n’hweti hi ku byela van’wana mahungu lamanene, naswona hi avhareji va fambisa tidyondzo timbirhi ta Bibele ha un’we. Ku nga khathariseki swiyimo swa vona swo tika, va chumayela ni ku dyondzisa handle ko karhala.
5 Vana na vona va kombisa ku hiseka evutirhelini. Ndyangu wa Timbhoni eRwanda wu nghenisiwe ekamareni laha masocha a ma tiyimisele ku wu dlayela kona. Ndyangu wu kombele mpfumelelo wo rhanga wu khongela. Loko va pfumeleriwile, xinhwanyetana xa vona, Deborah, xi khongele swi twakala xi ku: “Yehovha, vhiki leri mina na Papa hi fambise ntlhanu wa timagazini. Xana hi ta swi kotisa ku yini ku tlhelela eka vanhu lava hi ya va dyondzisa ntiyiso ni ku va pfuna ku kuma vutomi?” Hikwalaho ka ripfumelo ra xona leri tiyeke ni ku rhandza ka xona vutirheli, ndyangu hinkwawo a wa ha dlayiwanga.
6 Namuntlha, ku ni xilaveko xo langutisisa minkarhi yo vula vumbhoni eka van’wana ni ku lavisisa lava “hlawuleriweke vutomi lebyi nga heriki.” (Mint. 13:48) Hi ku pfumelelana ni swiyimo swa ndhawu, vakulu va vandlha va endla malunghiselelo ya ku vula vumbhoni hi ntlawa hi minkarhi leyi fanelekaka, hambi ku ri nimixo, nindzhenga kumbe nimadyambu. Swihloko leswi nga eka Vutirheli Bya Hina Bya Mfumo ni tinkulumo ta Minhlangano ya Ntirho, tinhlengeletano ta xifundzha ni mintsombano ya muganga yi hi nyika swiringanyeto leswi nga enkarhini ni xikhutazo leswaku hi hlanganyela eka swiyenge swo hambana-hambana swo nyikela vumbhoni bya Mfumo. Ku engetela eka leswi, valanguteri va xifundzha ni va muganga va letela vahuweleri eku nyikeleni ka vumbhoni exitarateni, va va kombisa ndlela yo tirha nsimu ya mabindzu, ni ku kombisa tindlela tin’wana to nyikela vumbhoni kwihi na kwihi laha vanhu va kumekaka kona. Leswi hinkwaswo swi kandziyisa ku nga karhali eku twariseni ka mahungu lamanene!
7 Vaapostola va Yesu hi xivindzi va te: “Hi nga ka hi nga koti ku tshika ku vula leswi hi swi voneke ni leswi hi swi tweke.” Xana va phikelele njhani ku nga khathariseki swirhalanganya leswi hinkwaswo? Va kombele Yehovha leswaku a va pfuna, naswona u va pfunile, kutani “va tala hi Moya lowo Kwetsima, kutani va vula rito ra Xikwembu va tiyile.” (Mint. 4:20, 29, 31) A hi hinkwerhu lava hi nga katekisiwaka hi mintokoto leyi xiyekaka evutirhelini, kambe loko hakunene hi navela ku twarisa mahungu lamanene handle ko karhala naswona loko hi tikarhatela ku endla tano masiku hinkwawo, Yehovha u ta hi pfuna.