Hambeta U Dyondzisa Handle Ko Karhala

1 Bibele a yi hi siyi eku kanakaneni ehenhleni ka muxaka wa nsimu leyi vaapostola ni vadyondzisiwa vo sungula va Vukriste va veke na yona. Ku nga ri khale endzhaku ka ku fa ka Yesu, vafumi va va tsundzuxe leswaku “va nga ha tshuki va vulavula . . . hambi ku ri ku dyondzisa” hi Yesu. (Mintirho 4:18) Ha yini ke? Xivangelo xin’wana a ku ri ku humelela loku hlamarisaka loku a va va na kona. Magidi a ya va vadyondzisiwa, hi laha Mintirho 4:4 yi vikaka ha kona yi ku: “Lavo tala exikarhi ka lava va tweke Rito, va pfumela. Nhlayo ya vavanuna enkarhini wolowo a yi lava ku fika eka 5000.”

2 Hikwalaho ka leswi na hina hi hambetaka hi dyondzisa handle ko karhala, madzana ya magidi, ina, timiliyoni ti va vapfumeri esikwini ra hina. Hi October hi na lunghelo ro nyikela Awake! na Xihondzo xo Rindza exisekelweni xa xikhokhelo. A ku na ku kanakana leswaku Awake! yi teke xiphemu lexikulu eku endleni ka leswaku vanhu va khathalela xilaveko xa vona xa moya. Leswi swi yise entsakweni eka vo tala, tanihi leswi va dyondzeke ku endla ku rhandza ka Yehova.—Ringanisa Matewu 5:3.

FIKELELA UN’WANA NI UN’WANA

3 Hambi leswi hi nga ha vaka ni nsimu leyi tirhiwaka hi ku phindha-phindha, swi nga ha koteka ku vulavula ni van’wana lava va veke ni nkarhi lowuntsongo wo twa mahungu lamanene. Hi ndlela yihi ke? Ensin’wini leyi nga fikelelekiki hi vutirheli bya yindlu na yindlu, ha yini u nga tirhisi ku nyikela vumbhoni hi riqingho? Kumbe u endla matshalatshala lama hlawulekeke yo vulavula ni wanuna wa muti loko u ri karhi u nyikela vumbhoni bya nimadyambu kumbe bya mahelo-vhiki. Hi ku hlayisa tirhekhodo letinene ta yindlu na yindlu, hi nga swi kota ku lavisisa swirho swin’wana swa ndyangu, swo tanihi kokwana wa xisati, ntukulu loyi a yaka exikolweni kumbe namu loyi a tirhaka exikarhi ka vhiki. Matshalatshala lama engetelekeke lama endliweke yo vulavula ni xirho xin’wana ni xin’wana xa ndyangu ma nga hakeriwa kahle.

4 Ku ni tindlela to tala letinene to kuma swikhokhelo en’hwetini. Yin’wana yi nga va ku khutaza swichudeni swa hina swa Bibele ni vanhu van’wana lava tsakelaka leswaku va endla xikhokhelo. Kumbexana xin’wana xa swichudeni swa hina swa Bibele ana se xi na xikhokhelo xa wun’wana wa timagazini. Ha yini u nga ringanyeti leswaku a kuma ha swimbirhi? Mindyangu yi nga ha khutaziwa ku kuma xikhokhelo xa Xihondzo xo Rindza xa xirho xin’wana ni xin’wana, leswaku va ta kota ku lunghiselela Dyondzo ya Xihondzo xo Rindza. Xiringanyeto xin’wana xi nga ha va ku vumba mintila ya timagazini ivi endzhaku u nyikela swikhokhelo eka lava va kombisaka ku tsakela loku tlulaka loku tolovelekeke. Nakambe hi fanele ku tinyikela ku dyondza Bibele ni lava va kombisaka ku tsakela ka xiviri.

NDLANDLAMUXA VUTIRHELI BYA WENA

5 Nkarhi wo yisa xikombelo xa ntirho wa vuphayona bya nkarhinyana hi n’hweti ya October a wu si hundza ngopfu. Tanihi ndyangu, xana mi kunguhata ku hlanganyela entirhweni wa vuphayona hi nkarhi wa tiholideyi ta misava hi December? Lowu i nkarhi wa leswaku mi sungula ku anakanya hi ndlela leyi mi nga swi endlaka hi laha ku humelelaka ha yona. Loko ndyangu hinkwawo wu nga swi koti ku phayona nkarhinyana, xana mi nga tirhisana leswaku xirho xin’we xa ndyangu kumbe leswi engetelekeke swi ta kota ku endla tano? Loko swi nga ri tano, xana swi nga koteka ku heta nkarhi lowu engetelekeke evutirhelini ku nyikeriwa timagazini ta Awake! na Xihondzo xo Rindza?

6 Ha yi tlangela mimpfuno ni mikateko ya moya leyi hi yi kumeke hi matluka ya Awake! na Xihondzo xo Rindza. Ha swi tiva leswaku vanhu va timbilu letinene lava nga ensin’wini ya hina na vona va ta pfuneka swinene hi ku hlaya timagazini leti exisekelweni xa nkarhi na nkarhi. Hi n’hweti ya October, a hi yiseni dyondzo ya hina emahlweni hi switirho leswinene leswi Yehova a endleke leswaku swi kumeka eka hina. Hi ku endla tano, hi ta tshovela mikateko ya Yehova kutani hi tikombisa hi ri nkateko eka van’wana.—Vagal. 6:9.