Hambeta U Vuyeriwa Eka Xihondzo xo Rindza ni Xalamuka!

Sweswi swikhokhelo swa magazini wa Xihondzo xo Rindza ni Xalamuka! swi yimisiwile, hikwalaho hi fanele hi endla matshalatshala ya leswaku hina ni lava hi va chumayelaka hi kuma minkandziyiso hinkwayo.

Tikopi Ta Hina Vini: Loko xikhokhelo xa wena xi hela, engetela odara ya wena eka timagazini leti u ti kumaka evandlheni. Vatswari va fanele ku oda timagazini leti eneleke leswaku un’wana ni un’wana endyangwini a kuma kopi ya yena n’wini. Ku tsala vito eka kopi ya wena n’wini swi ta ku pfuna leswaku u nga yi fambisi hi xihoxo ensin’wini. Loko timagazini ti fika, vamakwerhu lava ti khathalelaka va ta endla leswaku ti kumiwa hi xihatla eHolweni ya Mfumo.

Ntila Wa Timagazini: Vahuweleri va fanele va endla matshalatshala yo sungula ntila wa timagazini eka vanhu hinkwavo lava tsakelaka ku kuma minkandziyiso hinkwayo. Loko hi heleketa timagazini hi hexe sweswo swi ta hi pfulela ndlela yo hlakulela ku tsakela loku kombisiweke ni ku sungula tidyondzo ta Bibele.—Vona Vutirheli Bya Hina Bya Mfumo bya October 1998, tluka 12.

Lava Nga Ni Swilaveko Swo Hlawuleka: Loko munhu a kombisa ku tsakela ka xiviri kambe a tshama ensin’wini leyi nga aviwangiki, munhu wo tano a nga pfumeleriwa leswaku a kuma xikhokhelo xa timagazini hi poso. Loko swi nga koteki ku yisela munhu la tshamaka ensin’wini ya ka n’wina timagazini, kambe a swi tsakela hi mbilu hinkwayo ku ti kuma, vulavurisana ni Komiti ya Ntirho ya Vandlha. Loko va pfumela xikhokhelo xi nga endleriwa munhu yoloye la tsakelaka. Tifomo leti tolovelekeke ta xikhokhelo (M-1 na M-101) ti nga tirhisiwa emhakeni leyi.

Hi nga tiyiseka leswaku Yehovha u ta ya emahlweni a katekisa matshalatshala ya hina hinkwawo yo twarisa Mfumo hi ku tirhisa Xihondzo xo Rindza ni Xalamuka!