Tsima Ro Fambisa Swirhambo Swa Xitsundzuxo eMisaveni Hinkwayo!

1. Hi rihi tsima ro hlawuleka leri nga ta endliwa emisaveni hinkwayo emahlweni ka Xitsundzuxo?

¹ “Tshamani mi ri karhi mi endla leswi leswaku mi ndzi tsundzuka.” (Luka 22:19) Hi ku yingisa xileriso lexi xa Yesu, vagandzeri va Yehovha va ta hlengeletana swin’we ni vanhu lava tsakelaka hi March 30, 2010, leswaku va tsundzuka rifu ra Yesu. Swirhambo swo hlawuleka swa Xitsundzuxo swi ta fambisiwa emisaveni hinkwayo ku sukela hi March 13 ku ya fika hi March 30.

2. Hi nga xi fambisa njhani xirhambo?

² Ndlela Yo Xi Fambisa: U nga ha nyika n’wini wa muti xirhambo leswaku a vona xifaniso lexi nga exifunengetweni, ivi u ku: “Hi March 30 nimadyambu, timiliyoni ta vanhu emisaveni hinkwayo ti ta hlengeletana leswaku ti tsundzuka rifu ra Yesu. Hi lexi xirhambo xa wena swin’we ni ndyangu wa wena. U nga ha ta ni vanghana va wena. Nkarhi ni ndhawu swi tsariwile exiphephanini lexi.” Loko swiyimo swi ku pfumelela, u nga ha n’wi hlayela Luka 22:19 leswaku a vona laha xileriso lexi xi kumekaka kona eMatsalweni. Tsundzuka leswaku tanihi leswi hi nga riki na nkarhi wo tala wo fambisa xirhambo lexi, hi fanele hi komisa.

3. I vamani lava hi nga va rhambaka?

³ Loko vandlha ra n’wina ri ri ni nsimu leyikulu, vakulu va nga ha endla xiboho xa leswaku mi siya swirhambo emitini leyi mi nga kumangiki munhu eka yona. Loko swi koteka, u nga ha fambisa timagazini swin’we ni xirhambo. U nga rivali ku rhamba vanhu lava u endleke maendzo yo vuyela eka vona, lava u dyondzaka na vona Bibele, vatirhi-kulorhi, vadyondzi-kulorhi, maxaka, vaakelani ni vanhu van’wana lava u va toloveleke.

4. Xana ku tlangela rirhandzu ra Yehovha hikwalaho ka leswi a hi nyikeke nkutsulo swi ta hi susumetela ku endla yini?

⁴ Tilunghiselele Ku Hlanganyela Hi Xitalo: Nkarhi wa Xitsundzuxo i nkarhi lowunene wo ndlandlamuxa ntirho wa hina wa nsimu. Xana u nga swi kota ku lulamisa xiyimiso xa wena leswaku u teka vuphayona bya nkarhinyana? Xana u ni vana kumbe swichudeni swa Bibele leswi endlaka nhluvuko hi tlhelo ra moya? Loko swi ri tano, vonana ni vakulu ku vona loko vanhu volavo va faneleka ku hlanganyela eka tsima leri ro hlawuleka tanihi vahuweleri lava nga khuvuriwangiki. Ku tlangela rirhandzu ra Yehovha hikwalaho ka leswi a hi nyikeke nkutsulo a swi nge hi susumeteli ku va kona eXitsundzuxweni ntsena, kambe swi ta tlhela swi hi susumetela ku rhamba vanhu vo tala leswaku va va kona.—Yoh. 3:16.