‘Mahungu Lawa Lamanene Ma Ta Chumayeriwa’!
1. Hi swi tivisa ku yini leswaku a xi kona lexi nga sivelaka ntirho wo chumayela?
1 A xi kona lexi nga sivelaka Yehovha leswaku a hetisisa ku rhandza kakwe. (Esa. 14:24) Hambileswi a swi vonaka onge a swi nge koteki leswaku Muavanyisi Gidiyoni ni vavanuna vakwe va 300 va hlula vuthu ra Vamidiyani leri a ri ri ni vavanuna va 135 000, Yehovha u n’wi byele leswi: “U ta ponisa Israyele exandleni xa Midiyani. Xana a ndzi ku rhumi?” (Vaav. 6:14) Hi wihi ntirho lowu Yehovha a wu seketelaka namuntlha? Yesu u te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke.” (Mat. 24:14) A nga kona loyi a nga sivelaka ntirho wo chumayela leswaku wu ya emahlweni!
2. Ha yini hi fanele hi langutela leswaku Yehovha a pfuna un’wana ni un’wana wa hina loko hi ri ensin’wini?
2 Yehovha U Pfuna Un’wana Ni Un’wana Wa Hina: Hambileswi hi swi tivaka leswaku Yehovha a nga pfuna Timbhoni takwe tanihi ntlawa, hi nga langutela leswaku a hi pfuna ha un’we-un’we. Loko muapostola Pawulo a lava mpfuno, Yehovha u n’wi seketerile hi ku tirhisa N’wana wakwe, Yesu. (2 Tim. 4:17) Hi nga tiyiseka leswaku Yehovha u ta katekisa matshalatshala lawa un’wana ni un’wana wa hina a ma endlaka leswaku a hetisisa ku rhandza kakwe.—1 Yoh. 5:14.
3. Hi swihi swiyimo leswi Yehovha a nga hi pfunaka eka swona?
3 Xana swiphiqo leswi u langutanaka na swona evuton’wini swi endla leswaku u nga ha kumi nkarhi lowu eneleke wo chumayela? “Loyi a karhaleke u n’wi nyika matimba.” (Esa. 40:29-31) Xana u langutane ni nxaniso kumbe nkaneto? “Lahlela ndzhwalo wa wena eka Yehovha, u ta ku seketela.” (Ps. 55:22) Xana u pfa u heleriwa hi ntshembo? ‘Famba, mina ndzi ta va ni nomu wa wena.’ (Eks. 4:11, 12) Xana u ni swiphiqo swa rihanyo leswi ku sivelaka ku ya ensin’wini? Yehovha u ku teka u ri wa nkoka naswona u ta katekisa matshalatshala lawa u ma endlaka hi mbilu hinkwayo ku nga khathariseki leswaku ma fika kwihi.—1 Kor. 3:6, 9.
4. Xana ku va ni ntshembo eka Yehovha swi nga hi khumba njhani?
4 Voko ra Yehovha “ri tshambulutekile, i mani la nga ri tlherisaka?” (Esa. 14:27) Leswi hi tiyisekaka leswaku Yehovha u ta katekisa ntirho wa hina, onge hi nga hambeta hi chumayela “hi vurhena hi vulawuri bya Yehovha.”—Mint. 14:3.