Ku Tiyisa Ntshembo Wa Hina Eka Vululami Bya Xikwembu

“Nḍi ta ku dyonḍisa namuntlha wena hi šiviri, leŝaku u v̌eka ku ṭhemba ka wena e ka Yehova.”—SWIVURISO 22:19.

1, 2. (a) Ha yini Timbhoni ta Yehovha ti tshemba Yehovha? (Swivuriso 22:19) (b) I yini lexi kombisaka leswaku vanhu van’wana va fanele va tiyisa ntshembo wa vona eka Yehovha?

VAKRESTE va ntiyiso va katekile hileswi va tivaka Yehovha ni swikongomelo swakwe hilaha ku kongomeke. “Hlonga ro tshembeka ni ro tlhariha” hi rirhandzu ri va phamela ‘swakudya swa moya hi nkarhi lowu faneleke.’ (Matewu 24:45) Vutivi lebyi va byi kumaka byi va nyika xisekelo lexi tiyeke xo tshemba Xikwembu. Kutani tanihi ntlawa, Timbhoni ta Yehovha ti kombisa ntshembo lowukulu eka Yehovha ni le ku lulameni ka yena.

² Hambiswiritano, swi tikomba onge Timbhoni tin’wana ti fanele ti tiyisa ntshembo wo tano. Minkarhi yin’wana Sosayiti yi kuma mapapila lama kombisaka ku kanakana tinhlamuselo leti nyikeriweke etibukwini ta yona. Ku kanakana loku ku nga ha va ku vangiwa hi mindzulamiso leyi endliweke eka matwisiselo ya swilo, kumbe hi timhaka leti khumbaka mutsari wa papila, ngopfu-ngopfu emintlhavekweni.—Ringanisa Yohane 6:60, 61.

3. Ku nga humelela yini hambi ku ri eka malandza ya Yehovha lama tshembekaka, naswona ha yini?

³ Hambi ku ri malandza ya ntiyiso ya Yehovha ma humeleriwa hi leswi vuriwaka hi Eklesiasta 9:11: “Nḍi tlherile kambe nḍi v̌ona hansi ka dyambu leŝaku e ku siyisaneni, ŝiṭuṭumi a ŝi siyi v̌aṅwana hi masiku, kumbe tinhenha a ti hluri hi masiku, ni ŝakudya a hi ŝa la’v̌o tlhariha hi masiku, ni rifuwo a hi ra la’v̌a nga ni ku twisisa hi masiku, ni ku funḍiwa a hi ka tintlhari hi masiku, hikuv̌a nkari ni khombo, i ŝa hikwav̌o.” Xana leswi swi nga va ntiyiso njhani hi ndlela leyi navisiweke kumbe hi tlhelo ra moya? Kumbexana hi tiva Vakreste lava a va nga bi mariri eku tirhiseni ka ndzayo ya Bibele, lava a va lwela ntiyiso hi matimba, lava a va tirhisa misinya ya milawu ya Bibele hi vutlhari, naswona va hiseka eku kumisiseni ka vutivi lebyi kongomeke. Kambe, hikwalaho ka ‘nkarhi ni khombo leri nga voniwiki ka ha ri emahlweni,’ van’wana va nga tikuma va nga ha koti ku endla swo tala hikwalaho ka mhangu kumbe ku dyuhala. Va nga ha tivutisa loko va ta nghena emisaveni leyintshwa ya Xikwembu va ha hanya.

4, 5. Ha yini Vakreste va nga ri na xivangelo xo lahlekeriwa hi ntshembo lowu va nga na wona eka vululami bya Yehovha?

⁴ Loko Mukreste a feriwa hi munghana wakwe wa vukati u twa ku vava ni ku titwa a lahlekeriwile swinene. Va nga ha va va tirhele Yehovha swin’we hi malembe yo tala. Munghana wa vukati loyi a ha hanyaka wa swi tiva leswaku rifu ri herisa xiboho xa vukati.a (1 Vakorinto 7:39) Kutani, leswaku ntshembo wa yena wu nga heli, u fanele a lawula mintlhaveko yakwe.—Ringanisa Marka 16:8.

⁵ I vutlhari swinene ku languta rifu ra munghana wa vukati, mutswari, n’wana kumbe munghana lonkulu wa Vukreste tanihi nkarhi wo kombisa ntshembo eka vululami bya Yehovha! Hambiloko hi feriwile, hi nga tiyiseka leswaku Yehovha a nga hombolokanga. Hi nga tiyiseka leswaku un’wana ni un’wana loyi a kumaka vutomi lebyi nga heriki—hi ku ponela emisaveni leyintshwa kumbe hi ku pfuxiwa eku feni—u ta tsaka. Mupisalema u vule leswi landzelaka hi Xikwembu: “U funungula šandla ša wena, u šurisa hikwaŝo le’ŝi hanyaka. Yehova o lulamile tindleleni ta yena hikwato, o ni tintŝalo e mitirweni ya yena hikwayo. Yehova o le kusuhi ni hikwav̌o la’v̌a ṅwi khongelaka, ni ka hikwav̌o la’v̌a ṅwi khongelaka hi timbilu. O nyika la’v̌a ṅwi tšhav̌aka leŝi v̌a ŝi ranḍaka, o yingisa ŝirilo ŝa v̌ona, kutani wa v̌a kuṭula.”—Pisalema 145:16-19.

Loko Hi Vona Onge Hi Xanisiwe Swi Nga Fanelanga

6, 7. (a) Ha yini Timbhoni tin’wana leti xanisiweke enkarhini lowu hundzeke ti ri ni matwisiselo lama hambaneke sweswi? (b) Ha yini hi nga fanelanga hi languta Yehovha tanihi loyi a nga lulamangiki hileswi a pfumeleleke leswaku hi xaniseka hi ndlela yoleyo enkarhini lowu hundzeke?

⁶ Enkarhini lowu hundzeke, Timbhoni tin’wana ti xanisiwile hi ku ala ku hlanganyela eka ntirho lowu ripfalo ra tona sweswi ri nga ha vaka ri ti pfumelela ku hlanganyela eka wona. Hi xikombiso, kumbexana ti nga ha va ti hlawule ku endla tano malembe lama hundzeke malunghana ni mixaka yo karhi ya mintirho ya tiko. Ripfalo ra makwerhu sweswi ri nga ha n’wi pfumelela ku endla ntirho wo tano handle ko lwisana ni xiyimo xakwe xa Vukreste xa vukala-tlhelo eka mafambiselo ya namuntlha ya swilo.

⁷ Xana Yehovha u ve ni nsele loko a pfumelela ku xanisiwa kakwe hikwalaho ko ala ku endla leswi sweswi ripfalo rakwe ri n’wi pfumelelaka ku swi endla? Vo tala lava humeleriweke hi sweswo a va anakanyi tano. Ku ri na sweswo, va tsaka leswi va veke ni nkarhi wo kombisa erivaleni ni hi ndlela leyi twisisekaka leswaku a va tiyimisele ku yima va tiyile eka mphikamakaneta ya vuhosi bya vuako hinkwabyo. (Ringanisa Yobo 27:5.) Xana munhu a nga va ni xivangelo xihi xo tisola hi ku va a yingisele ripfalo rakwe eku tekeni ka goza leri tiyeke ro yima na Yehovha? Va fanelekele ku va vanghana va Yehovha hi ku namarhela misinya ya milawu ya Vukreste hi ku tshembeka hilaha a va yi twisisa hakona kumbe hi ku yingisa switsundzuxo swa ripfalo ra vona. Kunene, i vutlhari ku papalata ku famba hi ndlela leyi nga karhataka ripfalo ra wena kumbe leyi yi nga ha khunguvanyisaka van’wana. Emhakeni leyi hi nga anakanya hi xikombiso lexi vekiweke hi muapostola Pawulo.—1 Vakorinto 8:12, 13; 10:31-33.

8. Ha yini Vakreste va Vayuda, lava khale a va namarhela Nawu, a va nga ri na xivangelo xo kanakana ku lulama ka Yehovha?

⁸ Leswaku va tsakisa Yehovha, Vayuda a va fanele va yingisa Milawu ya Khume ni milawu yin’wana yo hambana-hambana ya kwalomu ka 600. Endzhaku, ehansi ka lunghiselelo ra Vukreste, ku yingisa milawu leyi hi ku kongoma a swi nga ha bohi eku tirheleni Yehovha, hambi ku ri eka Vayuda va nyama. Milawu leyi a yi nga ha bohi a yi katsa ku yimba, ku hlayisa Savata, ku nyikela magandzelo ya swiharhi ni ku hlayisa milawu leyi sivelaka swakudya swo karhi. (1 Vakorinto 7:19; 10:25; Vakolosa 2:16, 17; Vaheveru 10:1, 11-14) Vayuda—ku katsa ni vaapostola—lava veke Vakreste va rhuriwe ndzhwalo wo hlayisa milawu leyi a va fanele va yi hlayisa loko va ha ri ehansi ka ntwanano wa Nawu. Xana va vilerile va vula leswaku lunghiselelo ra Xikwembu a ri ri ra nsele loko eku sunguleni xi lave leswaku va endla swilo leswi se a swi nga ha bohi? E-e, va tsakile hi ku va ni vutivi lebyi ndlandlamukeke hi swikongomelo swa Yehovha.—Mintirho 16:4, 5.

9. I yini leswi humeleleke eka Timbhoni tin’wana, kambe ha yini ti nga ri na xivangelo xo tisola?

⁹ Eminkarhini ya manguva lawa, ku ve ni Timbhoni tin’wana leti a ti ri ni vuxiyaxiya lebyikulu malunghana ni leswi a ti fanele ti swi endla ni leswi a ti nga fanelanga ti swi endla. Hikwalaho ti xanisiwe swinene ku ri ni van’wana. Endzhaku, vutivi lebyi engetelekeke byi ti pfune ku ndlandlamuxa langutelo ra tona hi swilo. Kambe a ti na xivangelo xo tisola hileswi eku sunguleni ti fambisaneke ni ripfalo ra tona, hambiloko kumbexana swi ti vangele maxangu lama engetelekeke. I swinene hakunene leswi ti kombiseke ku tiyimisela ka tona ku xaniseka hikwalaho ka ku tshembeka eka Yehovha, leswaku ti “endla swilo hinkwaswo hikwalaho ka mahungu lamanene.” Yehovha wa ku katekisa ku tinyiketela eka yena hi mukhuva wolowo. (1 Vakorinto 9:23; Vaheveru 6:10) Muapostola Petro u tsale hi vutlhari a ku: “Loko mi endla leswinene ivi mi xanisiwa, kutani mi tiyisela, sweswo hi leswi amukelekaka eka Xikwembu.”—1 Petro 2:20.

Ku Dyondza Eka Yonasi

10, 11. Yonasi u swi kombise njhani leswaku a a nga n’wi tshembi hi ku helela Yehovha (a) loko a nyikiwe xiavelo xo ya eNinivha? (b) loko Xikwembu xi nga va lovisanga Vaninivha?

¹⁰ Loko a rhumiwe eNinivha, Yonasi u kombise langutelo ra ku nga yi tlangeli ndlela leyi Yehovha a a n’wi tshembe ha yona. Endzhaku ka ntokoto lowu chavisaka lowu vangiweke hi ku ala ka yena ku yingisa, Yonasi u tianakanyile, a xiya xihoxo xakwe, a amukela xiavelo xakwe xo ya etikweni rimbe, kutani a lemukisa Vaninivha hi ndzoviso lowu a wu tshinele. Kutani ku humelele leswi yena a a nga swi langutelanga: Hikwalaho ka leswi Vaninivha va hundzukeke, Yehovha u endle xiboho xo tshika ku va lovisa.—Yonasi 1:1–3:10.

¹¹ Yonasi u titwise ku yini ke? Leswi a a nga enerisekanga, u vilele eka Xikwembu hi xikhongelo. Kahle-kahle xirilo xa yena a xi ku: ‘A ndzi anakanya leswaku swilo swi ta va hi ndlela leyi. Hikokwalaho a ndzi nga swi tsakeli ku ta eNinivha eku sunguleni. Kutani loko se ndzi humeleriwe hi swilo leswi hinkwaswo, ku katsa ni ku chavisiwa kun’we ni ku tsongahatiwa hi ku mitiwa hi nhlampfi leyikulu, ni loko ndzi tikarhatile ndzi lemukisa Vaninivha hi ta ndzoviso lowu tshineleke, vuyelo bya kona byi ve lebyi! Ndzi tirhele mahala ni ku xanisekela mahala! Swa antswa ndzi fa kunene!’—Yonasi 4:1-3.

12. Hi nga dyondza yini eka ntokoto wa Yonasi?

¹² Xana Yonasi a a ri ni xivangelo lexi twalaka xo vilela? Xana Yehovha a a ri ni nsele loko a tsetselela vadyohi lava hundzukeke? Kahle-kahle, Yonasi a a fanele a tsakile; a ku ta ponisiwa makume ya magidi ya vanhu endzovisweni! (Yonasi 4:11) Kambe langutelo leri ri nga kombisiki xichavo ni ra ku vilela ri kombise leswaku a a nga ri ni ntshembo lowukulu eku lulameni ka Yehovha. A a anakanyela yena n’wini ngopfu, van’wana a nga va anakanyeli ngopfu. A hi dyondzeni eka Yonasi hi ku ka hi nga anakanyi ngopfu hi hina vini ni mintlhaveko ya hina. A hi tiyisekeni leswaku ku yingisa Yehovha, ku landzelela vukongomisi lebyi a byi nyikaka hi ku tirhisa nhlengeletano yakwe ni ku amukela swiboho swakwe, i nchumu lowu faneleke ku wu endla. Ha tiyiseka leswaku “la’v̌a tšhav̌aka Šikwembu v̌a ta endleriwa ŝinene.”—Eklesiasta 8:12.

Sweswi I Nkarhi Wo Tiyisa Ntshembo Wa Hina!

13. Hinkwerhu ka hina hi nga tiyisa ntshembo lowu hi nga na wona eka Yehovha hi ndlela yihi?

¹³ Ku tiyisa ntshembo wa hina eka Yehovha i ndlela ya vutlhari. (Swivuriso 3:5-8) Kunene, a hi fanelanga hi khongelela leswaku Yehovha a hi pfuna ku va ni ntshembo lowukulu ntsena. Ntshembo wu kula hi ku sekeriwa evutivini lebyi kongomeke, kutani hi fanele hi endla leswaku dyondzo ya hina ya Bibele, ku hlaya Bibele ni tibuku leti hlamuselaka Bibele, swi va nchumu lowu hi wu endlaka siku na siku. Ku va kona nkarhi na nkarhi eminhlanganweni ya Vukreste i swa nkoka, kun’we ni ku lunghiselela kahle ni ku hlanganyela hilaha swi nga kotekaka hakona. Ku titoloveta ku avelana mintiyiso ya Bibele ni van’wana, ku hlula swihinga hi vuxiyaxiya na swona swi kurisa ntshembo lowu hi nga na wona eka Yehovha ni le ka Rito rakwe. Xisweswo hi fambisana na yena siku na siku.

14. Ha yini vanhu va Xikwembu va ta boheka ku kombisa ntshembo wa vona eka Yehovha ku tlula rini ra rini ku nga ri khale?

¹⁴ Nhlomulo lowukulu lowu nga si tshamaka wu wela vanhu wu ta tlhekeka hi xitshuketa ku nga ri khale. (Matewu 24:21) Loko wu tlhekeka, malandza ya Xikwembu ma ta fanela ku kombisa ntshembo lowukulu swinene eka vululami bya Yehovha ni vukongomisi lebyi nyikeriwaka hi nhlengeletano yakwe. Hi ndlela yo fanekisela, ma ta yingisa xileriso xa Xikwembu hi ku tiyiseka, loko xi ku: “Yana, tiko ra mina, u nghena e makamareni ya wena, u pfala nyangwa e nḍaku ka wena; tumbela hi nkari, v̌ukari byi ko byi hunḍa.” (Esaya 26:20) Ana se va titwa va sirhelelekile emavandlheni ya 85000 ematikweni ya 232. Hambi ku nga va na yini xin’wana lexi katsekaka eka xileriso lexi nge “nghena e makamareni ya wena,” hi nga tiyiseka leswaku Yehovha u ta hi pfuna leswaku hi xi endla.

15. Mhaka ya ntshembo yi kandziyisiwe njhani hi 1998, naswona ha yini swi fanerile?

¹⁵ Swa fanela leswaku hi tiyisa ntshembo wa hina sweswi. Loko hi nga va tshembi vamakwerhu lava nga Vakreste ni nhlengeletano ya Yehovha, naswona ku tlula hinkwaswo, loko hi nga tshembi Yehovha hi byakwe, a hi nge swi koti ku pona. Kutani swa fanela swonghasi leswi hi 1998, Timbhoni ta Yehovha emisaveni hinkwayo ti tsundzuxiwaka hi ku phindha-phindha hi marito ya ndzimana ya tona ya lembe lama nge “un’wana ni un’wana loyi a vitanaka vito ra Yehovha u ta ponisiwa”! (Varhoma 10:13) Hi fanele ku hambeta hi tiyiseka hi sweswo. Hambiloko hi lemuka ku kanakana kutsongo swinene eka ntshembo lowu, hi fanele hi lwela ku endla ndzulamiso sweswi, ina, namuntlha.

Ku Avanyisa Ka Yehovha Ku Ta Va Loku Lulameke

16. Ku nga humelela yini hi ntshembo loko wu nga hlakuleriwi, naswona leswi hi nga swi sivela njhani leswaku swi nga humeleli?

¹⁶ Eka Vaheveru 3:14, Vakreste lava totiweke va tsundzuxiwa: “Kahle-kahle hi hlanganyela na Kreste ntsena loko hi khoma ku tiyiseka loku a hi ri na kona eku sunguleni ku tiyile, ku yisa emakumu.” Kahle-kahle, marito lawa ma tirha ni le ka Vakreste lava nga ni ntshembo wo hanya emisaveni. Ntshembo lowu munhu a a ri na wona eku sunguleni wu nga nyamalala loko wu nga hlakuleriwi. I swa nkoka swonghasi leswaku hi hambeta hi lwela ku kuma vutivi lebyi kongomeke, xisweswo hi tiyisa xisekelo xa ntshembo wa hina!

17. Ha yini hi nga tiyisekaka leswaku Yesu u ta va avanyisa hilaha ku lulameke lava nga ta pona?

¹⁷ Ku nga ri khale, Kreste u ta kambela matiko hinkwawo leswaku a ta “hambanisa vanhu van’wana eka van’wana, ku fana ni loko murisi a hambanisa tinyimpfu eka timbuti.” (Matewu 25:31-33) Hi nga tiyiseka leswaku Kreste u ta tirhisa vululami loko a avanyisa lava nga ta fanelekela ku pona. Yehovha u n’wi nyike vutlhari, ku twisisa ni timfanelo tin’wana leti lavekaka “hi xikongomelo xo avanyisa misava leyi akiweke hi ku lulama.” (Mintirho 17:30, 31) Onge ntshembo wa hina wu nga fana ni wa Abrahama loyi a nga te: “A ŝi v̌e kule na wena [Yehovha] e ku lov̌isa l’a lulameke ŝiṅwe ni l’a hombolokeke, ŝi v̌a leŝaku l’a lulameke a endliwa le’ŝo nge o hombolokile! A ŝi v̌e kule na wena! Loyi a av̌anyisaka misav̌a hikwayo, a nga ka a nga av̌anyisi hi ku lulama šana?”—Genesa 18:25.

18. Ha yini hi nga fanelanga hi karhateka ngopfu hi leswi kumbexana hi nga ta ka hi nga swi tivi sweswi?

¹⁸ Loko hi tshemba ku lulama ka Yehovha hi ku helela, a hi fanelanga hi tikarhatela ku kumisisa tinhlamulo ta swivutiso swo tanihi leswi nge: ‘Xana tincece ni vana lavatsongo va ta avanyisiwa ku yini? Xana swi nga endleka leswaku Armagedoni yi fika vanhu vo tala va nga si fikeleriwa hi mahungu lamanene? Ku vuriwa yini hi lava vabyaka emianakanyweni? Ku vuriwa yini hi . . . ?’ Kunene, swi nga endleka hi nga swi tivi sweswi leswaku Yehovha u ta ti tamela njhani timhaka leti. Hambiswiritano, u ta ti tamela hi ndlela leyi lulameke ni ya tintswalo. Sweswo hi nga tshuki hi swi kanakana. Entiyisweni swi nga hi hlamarisa ni ku hi tsakisa ku n’wi vona a ti tamela hi ndlela leyi ni ku yi anakanya a hi nga yi anakanyi.—Ringanisa Yobo 42:3; Pisalema 78:11-16; 136:4-9; Matewu 15:31; Luka 2:47.

19, 20. (a) Ha yini swi nga hoxanga ku vutisa swivutiso leswi twalaka? (b) Yehovha u ta ti nyikela rini tinhlamulo leti lavekaka?

¹⁹ Nhlengeletano ya Yehovha a yi lwisani ni swivutiso swo lava ku tiva hakunene ni leswi vutisiwaka hi nkarhi wa kona, hilaha vakaneti van’wana va vulaka hakona hi ku hoxisa. (1 Petro 1:10-12) Hambiswiritano, Bibele yi hi tsundzuxa leswaku hi papalata swivutiso swa vuhunguki, swo mbambela. (Tito 3:9) Ku vutisa swivutiso leswi twalaka ni ku kambisisa Rito ra Xikwembu ni tibuku ta Vukreste leswaku hi kuma tinhlamulo leti sekeriweke eMatsalweni swi nga engetela vutivi bya hina lebyi kongomeke xisweswo swi tiyisa ntshembo lowu hi nga na wona eka Yehovha. Nhlengeletano yi landzela xikombiso xa Yesu. U papalate ku hlamula swivutiso leswi nkarhi lowu faneleke wo swi hlamula a wu nga si fika. U te: “Ndza ha ri ni swilo swo tala swo mi byela swona, kambe sweswi a mi swi koti ku swi byarha.” (Yohane 16:12) Nakambe u pfumerile leswaku swilo swin’wana na yena a a nga swi tivi hi nkarhi wolowo.—Matewu 24:36.

²⁰ Yehovha wa ha ta paluxa swo tala. I vutlhari hakunene ku rindzela yena, hi tiyiseka leswaku nkarhi wo paluxa swikongomelo swakwe wu ta fika hi nguva ya kona leswaku hi hlangavetana ni swilaveko swa nkarhi wolowo. Hi nga tiyiseka leswaku loko nkarhi lowu faneleke wa Yehovha wu fika, swi ta hi tsakisa ku kota ku twisisa tindlela ta yena hi vuenti. Ina, hi ta hakeriwa, ntsena loko hi tshemba Yehovha hi ku helela ni nhlengeletano leyi a yi tirhisaka. Swivuriso 14:26 ya hi tiyisekisa yi ku: “E šitšhabyeni ša Yehova ku ni ku ṭhemba ka šiv̌iri, kutani ka v̌ana v̌a yena i šitšhav̌elo.”

[Nhlamuselo ya le hansi]

U Swi Vonisa Ku Yini?

◻ Ha yini ku nga ri vutlhari ku pfumelela mintlhaveko ya hina yi tsanisa ntshembo lowu hi nga na wona eka Yehovha?

◻ Hi nga dyondza yini eka ntokoto wa Yonasi?

◻ Ha yini ku dyondza Bibele ni ku va kona eminhlanganweni swi ri swa nkoka swinene?

[Xifaniso lexi nga eka tluka 16]

Hambiloko hi lahlekeriwile, hi nga tiyiseka leswaku Yehovha u lulamile

[Swifaniso leswi nga eka tluka 18]

Xana wa tiyiseka leswaku u tshemba Yehovha?