Ntirho Lowu Tsakisaka Swinene
1. Hi wihi ntirho wo hanyisa hi tlhelo ra moya lowu endliwaka enkarhini wa hina?
1 Hi lembe-xidzana ro sungula vanhu swi va tsakisile ku vona vanhu va hanyisiwa. (Luka 5:24-26) Ninamuntlha swa hi tsakisa ku pfuna vanhu leswaku va tiva Yehovha. (Nhlav. 22:1, 2, 17) Hakunene swa tsakisa ku hlaya hi mintokoto ya vanhu lava hundzuleke vutomi bya vona hikwalaho ko pfuniwa hi Rito ra Yehovha ni hi moya lowo kwetsima! Kambe lexi tsakisaka no tlurisa i ku hlanganyela entirhweni lowu hi ku fambisa dyondzo ya Bibele leyi endlaka nhluvuko.
2. I yini leswi nga endlaka leswaku hi tsaka loko hi dyondzisa munhu ntiyiso?
2 Vito ra Xikwembu i mani? Ha yini xi pfumelela ku xaniseka? Xana Mfumo wa Xikwembu wu ta va endlela yini vanhu? A hi kumi ntsako ntsena hi ku hlamula swivutiso leswi, kambe ha tsaka loko hi vona xichudeni xi twisisa ntiyiso lowu xi wu dyondzaka. (Swiv. 15:23; Luka 24:32) Loko xichudeni xi ri karhi xi endla nhluvuko, xi nga ha sungula ku tirhisa vito ra Xikwembu, xi cinca ndlela leyi xi ambalaka ni ku tisasekisa ha yona, xi tshika swiendlo swo biha kutani xi sungula ku chumayela vanhu. Loko xi endla nhluvuko kukondza xi tinyiketelela ni ku khuvuriwa, xi ta va makwerhu ni mutirhi-kulorhi. Magoza lawa hinkwawo hi wona lama endlaka leswaku hi tsaka.—1 Tes. 2:19, 20.
3. I yini leswi u nga swi endlaka leswaku u sungula dyondzo ya Bibele?
3 Xana U Nga Hoxa Xandla? Loko u tsakela ku hoxa xandla entirhweni lowu wo tsakisa swinene, kombela Yehovha leswaku a ku pfuna u fambisa dyondzo ya Bibele kutani u endla hi ku pfumelelana ni swikhongelo swa wena. (1 Yoh. 5:14) Chumayela laha vanhu va kumekaka kona naswona hi nkarhi lowu va kumekaka ha wona. Kombela ku fambisela munhu dyondzo ya Bibele nkarhi wun’wana ni wun’wana. (Ekl. 11:6) Loko u kuma munhu la tsakelaka kutani u byala mbewu ya ntiyiso, tlhelela leswaku u ya yi cheleta.—1 Kor. 3:6-9.
4. Ha yini hi fanele hi swi hisekela ku kombela ku fambisela vanhu tidyondzo ta Bibele?
4 Vanhu vo tala va ha ri ni ndlala ni torha ra leswo lulama. I mani loyi a nga va pfunaka leswaku va enerisa xilaveko xa vona xa moya hi ku va fambisela dyondzo ya Bibele? (Mat. 5:3, 6) Onge hi nga tinyiketela hi ku tirhandzela leswaku hi hetisisisa ntirho wa hina wo chumayela ni wo endla vadyondzisiwa, ntshovelo wu nga si fika emakumu.—Esa. 6:8.