Web Site Ya Hina Leyi Nga eNawini—Yi Endleriwe Ku Pfuna Hina Ni Van’wana
Yesu u hi lerise ku chumayela mahungu lamanene ya Mfumo “emisaveni hinkwayo leyi akiweke leswaku byi va vumbhoni ematikweni hinkwawo.” (Mat. 24:14) Leswaku hi ‘hetisisa vutirheli bya hina hi xitalo,’ Web site ya watchtower.org, jw-media.org, ni ya jw.org ti hlanganisiwile leswaku ku vumbiwa Web site ya jw.org.—2 Tim. 4:5.
“EMisaveni Hinkwayo Leyi Akiweke”: Hi xiringaniso, munhu un’we eka vanharhu emisaveni hinkwayo u tirhisa Internet. Se yi hundzuke xitirhisiwa lexinene xa leswaku vanhu vo tala va kuma vuxokoxoko, ngopfu-ngopfu vantshwa. Web site ya hina yi endla leswaku vanhu lava tirhisaka Internet va kuma tinhlamulo ta swivutiso swa Bibele. Yi endla leswaku va tiva nhlengeletano ya Yehovha naswona yi endla leswaku swi va olovela ku kombela dyondzo ya mahala ya le kaya ya Bibele. Xisweswo swa olova leswaku mahungu lamanene ma fika etindhawini leti swi nonon’hwaka leswaku vanhu va kuma rungula ra Mfumo.
“EMatikweni Hinkwawo”: Leswaku byi va vumbhoni “ematikweni hinkwawo,” ntiyiso wa Bibele wu fanele wu kumeka hi tindzimi to hambana-hambana. Vanhu lava nghenaka eka jw.org va nga kuma rungula hi ku olova hi tindzimi ta kwalomu ka 400, ku tlula Web site yihi na yihi.
Yi Tirhise Hi Ndlela Leyinene: Web site ya jw.org leyi endliweke hi vuntshwa a yi endleriwanga ku chumayela eka lava nga riki vapfumeri ntsena. Yi endleriwe leswaku ni Timbhoni ta Yehovha ti yi tirhisa. Loko u kota ku nghena eka Internet, hi ku khutaza leswaku u tolovelana ni Web site leyi. Leswi landzelaka i swiringanyeto swa ndlela leyi yi faneleke yi tirhisiwa ha yona.
[Dayagramu leyi nga eka tluka 3]
(Leswaku u vona rungula leri hleriweke hi ku helela, vona nkandziyiso wa kona)
Yi Ringete
1 Loko u nghena eka Internet ekhompyuteni ya wena tsala u ku, www.jw.org/ts
2 Valanga eka yona hi ku tlilika xiyenge xa tinhloko-mhaka, ni le ka swiphemu swin’wana.
3 Ringeta ku tirhisa Web site ya jw.org eka xitirhisiwa xa wena xa elektroniki lexi kotaka ku nghena eka Internet. Rungula ri kota ku vonaka kahle ni le ka swikirini leswitsongo.