Tsima Ro Rhambela Vanhu eXitsundzuxweni Ri Sungula Hi March 1

1. Hi ta sungula rini ku rhambela vanhu eXitsundzuxweni, naswona ha yini tsima ra nan’waka ri lehile?

¹ Hi Ravuntlhanu, March 1, hi ta sungula tsima ra hina ro rhamba van’wana leswaku va ta hlanganyela na hina eXitsundzuxweni. Xitsundzuxo xi ta va hi March 26, leswi vulaka leswaku tsima ra nan’waka ri ta va ri lehile ku tlula ra malembe lama nga hundza. Leswi swi ta endla leswaku vanhu vo tala va kuma swirhambo, ngopfu-ngopfu loko va tshama endhawini leyi vandlha ri nga ni nsimu leyikulu.

2. Hi wahi malunghiselelo yo kuma swirhambo ni yo hlanganisa nsimu hinkwayo?

² Ku Hlela: Vakulu va ta nyika nkongomiso wa ndlela leyi nsimu yi nga ta tirhiwa ha yona, ku katsa niloko swi fanerile ku siya swirhambo laha ku nga riki na munhu. Loko swirhambo swi sala endzhaku ko heta nsimu, swi nga ha fambisiwa loko hi chumayela etindhawini ta mani na mani. Mulanguteri wa ntirho u ta tiyiseka leswaku swirhambo leswi nga ni ndhawu ni nkarhi swi vekiwe endhawini ya timagazini kumbe tibuku leswaku vahuweleri va kota ku titekela swona, kambe swirhambo a swi nge humesiwi hinkwaswo hi nkarhi wun’we. A hi fanelanga hi teka swirhambo swo tala, hi fanele hi teka leswi hi tivaka leswaku hi ta swi tirhisa vhiki rero ntsena.

3. I yini leswi hi faneleke hi swi tsundzuka loko hi fambisa swirhambo?

³ I Yini Leswi Hi Nga Ta Swi Vula? I swinene ku komisa, hikuva swi ta hi pfuna ku fikelela vanhu vo tala hilaha hi nga kotaka ha kona. Tluka 4 ri ni swiringanyeto leswi hi nga swi tirhisaka leswaku swi fambisana ni nsimu ya hina. Entiyisweni, a hi fanelanga hi hatlisa hi famba loko n’wini wa muti a ri ni xinghana kumbe a ri ni swivutiso. Loko hi fambisa swirhambo hi mahelo-vhiki, hi nga ha tlhela hi fambisa ni timagazini loko swi fanerile. Hi March 2, ku ta va siku ro Hlawuleka ro fambisa Timagazini, xisweswo hi ta fambisa timagazini ni swirhambo ematshan’weni yo sungula tidyondzo ta Bibele hilaha hi endlaka ha kona hi ntolovelo hi Mugqivela wo sungula wa n’hweti.

4. Ha yini hi fanele hi hlanganyela hi ku hiseka eka tsima leri?

⁴ Hi ni ntshembo wa leswaku vo tala va ta va kona eXitsundzuxweni. Nkulumo leyi nga ta nyikeriwa yi ta hlamusela leswaku Yesu i mani. (1 Kor. 11:26) Yi ta tlhela yi hlamusela ndlela leyi rifu rakwe ri hi pfunaka ha yona. (Rhom. 6:23) Naswona yi ta kandziyisa leswaku ha yini swi ri swa nkoka ku tshama hi ri karhi hi n’wi tsundzuka. (Yoh. 17:3) Onge hi nga hlanganyela eka tsima leri hi ku hiseka!