Xirhambo Xo Hlawuleka
1. Tsima ro rhambela vanhu eka mintsombano ya 2014 ri ta sungula rini?
1 Loko a wu hlele ku dya swakudya swo hlawuleka ni vanghana kumbe ndyangu wa wena, leswi u bohekeke ku tikarhata loko u swi sweka swi tlhela swi ku lava mali yo tala, a swi kanakanisi leswaku a wu ta hiseka loko u rhamba vanhu. Hilaha ku fanaka, ku tirhiwe swinene loko ku lunghiseleriwa nkhuvo wa moya lowu nga ta va kona eka mintsombano ya hina ya muganga ni ya matiko ya 2014. Loko ku sele mavhiki manharhu leswaku hi va ni ntsombano, hi ta va ni lunghelo ra ku rhamba van’wana. I yini lexi nga ta hi pfuna ku rhamba vanhu hi ku hiseka?
2. I yini lexi nga ta hi susumetela ku hlanganyela hi xitalo eka tsima ro rhambela vanhu entsombanweni?
2 Loko hi anakanyisisa hi ndlela leyi hi vuyeriwaka ha yona eka nkhuvo wa moya lowu Yehovha a hi lunghiselelaka wona emintsombanweni ya hina, hi ta susumeteleka ku hlanganyela hi xitalo eka tsima leri. (Esa. 65:13, 14) Nakambe, hi fanele hi tsundzuka leswaku tsima ra hina ra lembe ni lembe ri tswala mihandzu. Vanhu van’wana lava hi nga ta va rhamba va ta ta entsombanweni. Hambiswiritano, ku nga khathariseki leswaku i vangani lava nga ta ta, ku hiseka ka hina hi nkarhi wa tsima ku ta yisa ku dzuneka eka Yehovha naswona ku ta kombisa ku hanana ka yena.—Ps. 145:3, 7; Nhlav. 22:17.
3. Swirhambo swi ta fambisiwa njhani?
3 Huvo yin’wana ni yin’wana ya vakulu yi fanele yi vona leswaku vandlha ri nga swi fambisa njhani swirhambo eka vanhu vo tala swinene, ku katsa ni ku swi siya emakaya lawa ku nga riki na vanhu kumbe ku swi fambisela vanhu etindhawini ta mani na mani ensin’wini ya rona. Hi mahelo-vhiki timagazini ti fanele ti fambisiwa swin’we ni swirhambo loko swi fanerile. Loko Mugqivela wo sungula en’hwetini wu wela eka masiku ya tsima rolero, ku fanele ku fambisiwa swirhambo ematshan’weni yo sungula tidyondzo ta Bibele. Loko tsima se ri herile, hi ta tsaka swinene ku tiva leswaku hi hlanganyele hi ku hiseka ni leswaku hi rhambe vanhu vo tala swinene leswaku va ta va na hina eka nkhuvo wa moya lowu Yehovha a hi lunghiseleleke wona!