Xirhambo
1. Tsima ro rhambela vanhu eka nhlengeletano ya xifundzha ri ta sungula rini?
1 Loko a wu hlele ku dya swakudya swo hlawuleka ni vanghana kumbe ndyangu wa wena, leswi u bohekeke ku tikarhata loko u swi sweka swi tlhela swi ku lava mali yo tala, a swi kanakanisi leswaku a wu ta hiseka loko u va rhamba vanhu. Hilaha ku fanaka, ku tirhiwe swinene loko ku lunghiseleriwa nkhuvo wa moya lowu nga ta va kona eka nhlengeletano ya hina ya xifundzha leyi taka. Loko ku sele mavhiki manharhu leswaku hi va ni nhlengeletano, Yehovha u ta hi nyika lunghelo ra ku rhamba van’wana. I yini lexi nga ta hi pfuna ku rhamba vanhu hi ku hiseka?
2. I yini lexi nga ta hi susumetela ku hlanganyela hi xitalo eka tsima ro rhambela vanhu enhlengeletanweni ya xifundzha?
2 Loko hi anakanyisisa hi ndlela leyi hi vuyeriwaka ha yona eka nkhuvo wa moya lowu Yehovha a hi lunghiselelaka wona eka tinhlengeletano leti, hi ta susumeteleka ku hlanganyela hi xitalo eka tsima leri. (Esa. 65:13, 14) Nakambe, hi fanele hi tsundzuka leswaku tsima ra hina ra lembe ni lembe ri tswala mihandzu. (Vona bokisi leri nge “Ri Tswala Mihandzu.”) Vanhu van’wana lava hi nga ta va rhamba va ta ta enhlengeletanweni kasi van’wana a va nge ti. Hambiswiritano, ku nga khathariseki leswaku i vangani lava nga ta ta, ku hiseka ka hina hi nkarhi wa tsima ku ta yisa ku dzuneka eka Yehovha naswona ku ta kombisa ku hanana ka yena.—Ps. 145:3, 7; Nhlav. 22:17.
3. Swirhambo swi ta fambisiwa njhani?
3 Huvo yin’wana ni yin’wana ya vakulu yi fanele yi vona leswaku vandlha ri nga swi fambisa njhani swirhambo eka vanhu vo tala swinene, ku katsa ni ku swi siya emakaya lawa ku nga riki na vanhu kumbe ku swi fambisela vanhu etindhawini ta mani na mani ensin’wini ya rona. Hi mahelovhiki timagazini ti fanele ti fambisiwa swin’we ni swirhambo loko swi fanerile. Loko tsima se ri herile, hi ta tsaka swinene ku tiva leswaku hi hlanganyele hi ku hiseka ni leswaku vanhu vo tala swinene va ve na hina eka nkhuvo wa moya lowu Yehovha a hi lunghiseleleke wona!