Tsima Leri Va Ka Ni Vuyelo Lebyinene

Eka mavhiki manharhu ntsombano wu nga si sungula, mavandlha ma ta tlhela ma katseka eka tsima ro rhamba lava tsakelaka ensin’wini leswaku va va kona entsombanweni. Ku ni xivangelo lexinene xa leswaku tsima leri ri va kona lembe ni lembe. Lava amukelaka xirhambo va tlhela va va kona entsombanweni hakanyingi va hlamarisiwa hi tinkulumo leti sekeriweke eMatsalweni, tindzawulo leti hlelekeke leti vumbiwaka hi vatirhi va ku tirhandzela ni hi mahanyelo lamanene ni vun’we lebyi hi nga na byona. (Ps. 110:3; 133:1; Esa. 65:13, 14) Hambiswiritano, xana tsima ra hina ri ni vuyelo lebyinene, ngopfu-ngopfu etindhawini leti lava tsakelaka va faneleke va famba mpfhuka wo leha leswaku va va kona entsombanweni?

Endzhaku ka ntsombano wa muganga wa 2011, rhavi ri amukele papila leri humaka eka wansati la kumeke xirhambo enyangweni ya yindlu ya yena. Hakanyingi wa tumbela loko Timbhoni ta Yehovha ti n’wi endzerile. U tsale a ku: “Ndzi ni kaya ro saseka, wanuna lonene naswona a ndzi anakanya leswaku ndzi ni hinkwaswo leswi nga ta ndzi endla ndzi tsaka. Lexi twisaka ku vava, a ndzi nga tsakanga naswona vutomi bya mina a byi nga ri na xikongomelo. Hikwalaho ndzi kunguhate ku chayela tikhilomitara ta 200 leswaku ndzi va kona eka nongonoko wa Mugqivela.” U wu tsakele swinene ntsombano lerova u bele nuna wakwe riqingho a n’wi byela leswaku a nge vuyi ekaya hikuva u lava ku tlhela a va kona eka nongonoko wa hi Sonto. “Ndzi yingisele tinkulumo hinkwato, ndzi hlangane ni Timbhoni ta Yehovha to tala naswona ndzi ti byele leswaku a ndzi swi lavi leswaku leswi swi hela.” Endzhaku ka loko a vuye ekaya, u sungule ku dyondza naswona endzhaku ka tin’hweti ta mune u ve muhuweleri la nga khuvuriwangiki. “Ndzi tsake swinene hileswi ndzi nga kuma xirhambo enyangweni ya yindlu ya mina hikuva sweswi vutomi bya mina byi ni xikongomelo!”

Van’wana lava kumaka xirhambo va ta va kona. Hikwalaho, katseka hi ku hiseka eka tsima leri ra nkoka. Tana ni swirhambo leswi saleke entsombanweni kutani u swi tirhisa ku chumayela hi xitshuketa.

[Bokisi leri nga eka tluka 5]

Hi Ta Swi Fambisa Njhani Swirhambo?

Leswaku hi kota ku hlanganisa nsimu ya hina, hi fanele hi komisa. Hi nga ha ku: “Xewani. Hi le ka tsima ra misava hinkwayo ro fambisa swirhambo leswi. Xa wena hi lexi. U ta kuma vuxokoxoko lebyi engetelekeke endzeni ka xona.” U fanele u hiseka. Loko hi fambisa swirhambo hi mahelo-vhiki hi nga ha swi fambisa ni timagazini loko swi fanerile.