Tsima Ra Misava Hinkwayo Ro Tivisa Hi Ta Ntsombano Wa Muganga Lowu Nge “Landzela Kreste!”
Vahuweleri Va Ta Tlhela Va Fambisa Xirhambo Xo Hlawuleka
1 Tsima ra n’wexemu ro rhambela vanhu eNtsombanweni wa Muganga lowu nge “Nkutsulo Wu Tshinele!” ri va pfune ngopfu vanhu lava tsakelaka. Lava va amukeleke xirhambo lexi xo hlawuleka a vo sungula ku tivonela hi ya vona leswaku Timbhoni ta Yehovha ti tiphina hi ndzalo ya swakudya swa moya. (Esa. 65:13) Va tiphinile hi ku va swin’we ni vamakwerhu lava nga Vakreste lava rhandzanaka ni lava nga ni vun’we. (Ps. 133:1) Leswaku hi pfuna vanhu vo tala hilaha swi nga kotekaka hakona leswaku va va kona eNtsombanweni wa Muganga lowu nge “Landzela Kreste!” hi ta tlhela hi fambisa xirhambo xo hlawuleka emisaveni hinkwayo.
2 Vuyelo Bya N’wexemu: Hi ku landza swiviko leswi amukeriweke emisaveni hinkwayo, ku ve ni vuyelo lebyinene loko vanhu va tivisiwa hi ta Ntsombano wa Muganga lowu nge “Nkutsulo Wu Tshinele!” Etindhawini to tala hi bumabumeriwile. Hi xikombiso, phepha-hungu rin’wana ri kandziyise xihloko lexi nga ni tikholomu ta tsevu xi hlamusela hi ta tsima leri, xi ku: “Leswaku Timbhoni ti fikelela vanhu vo tala ka ha ri ni nkarhi, ti endle matshalatshala lamakulu yo fikelela vaakelani—ti tirhe tiawara to tala, ti famba mimpfhuka yo leha naswona a ti komisa rungula ra tona.” Tsima leri endliweke hi vun’we ro fambisa xiphephana lexi ri endle leswaku vatsari van’wana va mahungu edorobeni rin’wana va lava ku tsala mhaka leyi hi vuxokoxoko. Eka man’wana ya maphepha-hungu lama tsaleke hi ta hina, lama laveke ku va manharhu ma tsale rungula leri bumabumelaka ntirho wa hina emahlweni ko va ntsombano wu sungula. Mutsari un’wana wa mahungu u tsale swihloko swo hlayanyana swo leha, leswi tateke matluka yo tlula mambirhi eka rin’wana ra maphepha-hungu ya Sonto. Ri hlamusele leswi hi swi pfumelaka, vun’we bya hina, ku fambisiwa ka xiphephana ni hi ta ntsombano. Loko muhuweleri un’wana a nyika n’wini wa muti wun’wana xiphephana, n’wini wa muti u te: “Wa tiva ndzi le ku hlayeni hi xona eka phepha-hungu leri!” N’wini wa muti wun’wana u te: “A ndzi ri karhi ndzi hlaya hi ta n’wina kasi mi le ndleleni! Xana xexo hi xona xirhambo xa mina?” Hiloko a ku, “Wa bumabumeriwa ntirho lowu Timbhoni ta Yehovha ti wu endlaka.”
3 Vanhu vo tala lava tsakelaka va te entsombanweni va tamele swirhambo swa vona. Van’wana va fambe mimpfhuka yo leha va tela ku ta yingisa nongonoko wa ntsombano. Ku gingiriteka ka hina hi rhamba vanhu, ku pfune leswaku nhlayo ya lava veke kona entsombanweni yi andza, tiko rin’wana ri vike leswaku nhlayo ya lava veke kona yi tlula ya n’wexemu hi tiphesente ta 27.
4 Ku Hlanganisa Nsimu: Mi nga ha sungula ku fambisa xiphephana ka ha sele mavhiki manharhu leswaku ku yiwa entsombanweni wa le ndhawini ya ka n’wina. Ku fanele ku endliwa matshalatshala leswaku ku hlanganisiwa nsimu hinkwayo ya vandlha. Emavandlheni lama nga ni nsimu leyikulu, vahuweleri va fanele va nghenisa xiphephana hi vutlhari emakaya lawa va nga kumangiki munhu eka wona loko se ku lo sala vhiki leswaku ku yiwa entsombanweni. Mavandlha ma fanele ma tikarhatela ku fambisa swiphephana hinkwaswo ni ku hlanganisa nsimu hilaha ma nga kotaka hakona. Swirhambo leswi nga ta sala swi fanele swi nyikiwa maphayona evandlheni leswaku ma swi fambisa.
5 Leswi U Nga Swi Vulaka: U nga ha ku: “Hi le tsimeni ra misava hinkwayo ro rhambela vanhu eka xiendlakalo xa nkoka emavhikini lama taka. Hi lexi xirhambo xa wena. U ta kuma rungula leri engetelekeke endzeni ka xona.” Ku komisa rungula ra wena ku ta endla leswaku u fambisa swirhambo swo tala. Kambe loko n’wini wa muti a ri ni swivutiso swo tala, hi fanele hi swi hlamula. Loko u kuma vanhu lava tsakelaka, va tsale ehansi leswaku u ta vuyela eka vona hi ku hatlisa hilaha u nga kotaka hakona.
6 I swa nkoka swinene leswaku hi landzela Kreste! (Yoh. 3:36) Ntsombano wa hina wa muganga lowu taka wu ta pfuna hinkwavo lava nga ta ya eka wona leswaku va endla tano. A swi kanakanisi leswaku vanhu va ta tlhela va hi tiva swinene hikwalaho ka tsima leri nga ta endliwa hi vun’we ro tivisa hi ta Ntsombano wa Muganga lowu nge “Landzela Kreste!” Hikwalaho, hisekela ku rhamba vanhu vo tala hilaha u nga kotaka hakona. Onge Yehovha a nga ma katekisa hilaha ku fuweke matshalatshala ya wena yo hlanganyela etsimeni leri nga ta endliwa emisaveni hinkwayo.