Xana Wa Swi Tirhisa Swiphephana Swa Xirhambo?

Siku rin’wana loko xifanyetana lexi nga ni 11 wa malembe hi vukhale xi ri karhi xi famba, xi thumbe xiphephana xa xirhambo xa nkulumo ya le rivaleni leyi vulavulaka hi tihele. Endzhakunyana xi te: “Leswi swi ndzi tsakisile swinene tanihi leswi a swi tikomba onge minkarhi hinkwayo ndzi endla swilo leswi nga fanelangiki naswona a ndzi vilela swinene leswaku loko ndzo fa ndzi ta ya etiheleni leti pfurhaka.” Xifanyetana lexi xi yile xi ya yingisela nkulumo yoleyo naswona endzhaku ka lembe loko se xi dyondze Bibele ko hlayanyana xi khuvuriwile. Hi yona ndlela leyi Karl Klein a veke Mukreste ha yona kutani hi ku famba ka nkarhi a heta malembe yo tala a ri xirho xa Huvo leyi Fumaka ya Timbhoni ta Yehovha. Sweswo hinkwaswo swi endleke hikwalaho ka xiphephana xa xirhambo.

Ninamuntlha swiphephana swa xirhambo swa ha ri mpfuno lowukulu eku chumayeleni. Vahuweleri vo tala va kume leswaku ku nyika munhu xiphephana i ndlela leyinene yo titivisa eka yena ni ku sungula mabulo na yena. Loko vatswari va ri ensin’wini va nga byela vana va vona leswaku va nyika n’wini wa muti xiphephana xa xirhambo. Vahuweleri lava chumayelaka hi mapapila va nga va rhambela eminhlanganweni vanhu lava va tsalelaka, hi ku va rhumela xiphephana xa xirhambo. Kasi, swiphephana swa xirhambo i ndlela leyinene yo rhamba swichudeni swa Bibele ni van’wana lava tsakelaka leswaku va ta eminhlanganweni ya hina.

Eka tluka ro sungula ra xona ku ni nhlamuselo yo koma ya nhlangano ha wun’we. Tanihi leswi adirese ya Holo ya Mfumo ni minkarhi ya minhlangano swi nga katsiwangiki, u fanele u tsala rungula leri loko u nyika munhu xiphephana xa xirhambo. Ku ni ndhawu yo tsala kumbe ya ku ba xitempe xa rungula rero loko u lava ku endla tano. Xana u swi tirhisa hilaha ku faneleke swiphephana swa swirhambo loko u ri ensin’wini?