Tsima Ra Misava Hinkwayo Ro Tivisa Hi Ta Ntsombano Wa Muganga Lowu Nge “Nkutsulo Wu Tshinele!”
Vahuweleri eVandlheni Ha Rin’we Va Fanele Va Hlanganyela Eku Halangaseni Ka Xiphephana Xo Hlawuleka Xo Tivisa Hi Ta Ntsombano
1 Ku sukela hi ximun’wana xa 2006 loko mintsombano ya miganga yi sungula eMatikweni ya le N’walungwini kukondza loko yi hela emisaveni hinkwayo, ku ta va ku ri ni tsima ro hlawuleka ro fambisa xiphephana xo tivisa hi ta mintsombano ya muganga leyi nga ta khomiwa ematikweni ya kwalomu ka 155. Tsima leri ro hlawuleka ri ta katsa ni mintsombano yo hlawuleka leyi nga ta khomiwa eJarimani, eCzech Republic ni le Poland hi July ni hi vhiki ro sungula ra August 2006.
2 Hikwalaho ka leswi makumu ma nga le kusuhi swinene, mintsombano leyi kandziyisaka nkutsulo lowu Xikwembu xi wu tshembiseke emafambiselweni lawa yo biha ya swilo, yi ta ti khumba swinene timbilu ta lava va navelaka ku pona. Rungula ra yona ri fanele ri va susumetela ku lava ku tiva leswi vumundzuku byi va khomeleke swona. Leswaku vanhu va magidi-gidi ya timiliyoni va twa rungula leri chavelelaka ni leri nyikaka ntshembo, mavandlha lama tlulaka 98 000 ya Timbhoni ta Yehovha ma komberiwa ku hlanganyela hi ku hiseka eku tiviseni hi ta ntsombano lowu ma nga ta ya eka wona.
3 Mavandlha ma ta nyikiwa swiphephana leswi ringaneke leswaku muhuweleri ha un’we a kuma swa 30. Leswi nga ta sala swi nga ha nyikiwa maphayona leswaku ma swi fambisa. Evandlheni ha rin’we, tsima leri ri ta sungula ka ha sele mavhiki manharhu leswaku ku yiwa entsombanweni lowu vandlha ri averiweke eka wona. Leswi swi ta endla leswaku vandlha ha rin’we ri hlanganisa nsimu ya rona hinkwayo loko swi koteka.
4 Ku ringanyetiwa leswaku loko swi koteka, xiphephana xi nyikiwa n’wini wa muti evokweni. Kambe, loko ku nga ri na munhu ekaya, xi nga ha nghenisiwa ehansi ka rivanti hi vutlhari. Ku fanele ku endliwa matshalatshala yo gingiritekela ku swi fambisa hinkwaswo hi mavhiki wolawo manharhu.
5 Hi tshemba leswaku vanhu vo tala va ta chumayeriwa hikwalaho ka matshalatshala lamakulu lama endliweke leswaku ku tivisiwa hi ta Ntsombano wa Muganga lowu nge “Nkutsulo Wu Tshinele!” hilaha swi hlamuseriweke hakona laha. Hi khongelela leswaku mikateko leyikulu ya Yehovha yi va eka matshalatshala lawa muhuweleri ha un’we a nga ta ma endla leswaku a hlanganyela eka tsima leri nga ta endliwa emisaveni hinkwayo.