I Vamani Lava Endlaka Ku Rhandza Ka Yehovha Namuntlha?
1. Hi ta sungula rini ku dyondza broxara leri nge, I Vamani Lava Endlaka Ku Rhandza Ka Yehovha Namuntlha? naswona swi ta hi vuyerisa njhani?
1 Ku sukela eka vhiki leri sungulaka hi October 28, hi ta dyondza broxara leyi nge, I Vamani Lava Endlaka Ku Rhandza Ka Yehovha Namuntlha? eka Dyondzo ya Bibele ya Vandlha. Broxara leyi leyintshwa leyi humesiweke eNtsombanweni wa Muganga lowu a wu ri ni nhloko-mhaka leyi nge, “Sirhelela Mbilu Ya Wena!” yi endleriwe ku kongomisa swichudeni swa Bibele enhlengeletanweni. Ku va hi dyondza nkandziyiso lowu a swi nge hi pfuni leswaku hi tlangela ku va xiphemu xa nhlengeletano ya Yehovha ntsena kambe swi ta tlhela swi hi pfuna leswaku hi tolovelana ni xitirhisiwa lexi xa nkoka ensin’wini.—Ps. 48:13.
2. Broxara leyi yi ta dyondziwa njhani evandlheni?
2 Ndlela Leyi Yi Nga Ta Dyondziwa Ha Yona: Mufambisi wa dyondzo u fanele a ava nkarhi wa yena leswaku dyondzo ha yin’we yi kandziyisiwa kahle. U ta rhanga hi ku tivisa dyondzo ha yin’we eka leta 28 hi ku va a hlaya xivutiso lexi nga eka nhloko-mhaka. Endzhaku, u ta kombela muhlayi leswaku a hlaya ndzimana ya xingheniso. Kutani, mufambisi wa dyondzo u ta vutisa vayingiseri xivutiso lexi a xi lunghiseleke eka ndzimana ya xingheniso. Endzhaku, xiyenge xin’wana ni xin’wana lexi sungulaka hi xivulwa lexi tsariweke hi marito yo ndzwihala xi ta hlayiwa kutani ku buriwa ha xona. Loko xiyenge xi hlayiwile, mufambisi wa dyondzo u ta vutisa vayingiseri leswaku xiyenge lexi hlayiweke xi xi hlamula njhani xivutiso xa nhloko-mhaka ya dyondzo. Nakambe broxara yi ni swifaniso swo tala leswi ku nga buriwaka ha swona. Matsalwa lama seketelaka xihloko ma fanele ma hlayiwa loko nkarhi wu pfumela. Loko mufambisi wa dyondzo a nga si hundzela eka dyondzo yin’wana, u fanele a endla mpfuxeto hi ku vutisa swivutiso leswi nga emakumu ka tluka. Loko ku ri ni bokisi leri nge, “Kuma Leswi Engetelekeke,” ri fanele ri hlayiwa kutani endzhaku u fanele a kombela vayingiseri leswaku va hlamusela ndlela leyi xichudeni xa Bibele xi nga vuyeriwa ha yona loko xi landzela xiringanyeto xexo. Loko nkarhi wu pfumela, mufambisi wa dyondzo a nga ha tirhisa swivutiso swa tinhloko-mhaka leswaku a endla mpfuxeto emakumu ka dyondzo. Tsundzuka leswaku a swi bohi leswaku nkongomiso lowu wu tirhisiwa eka dyondzo ya le kaya ya Bibele.
3. Hi nga vuyeriwa njhani hi ku dyondza broxara leyi?
3 Leswaku u vuyeriwa swinene, tana eminhlanganweni u lunghiselele kahle. Tikarhatele ku hlamula. Hi nkarhi wa dyondzo, anakanya hi xivangelo xo va rungula rero ri vuyerisa swichudeni swa Bibele. Onge ku dyondza ka hina broxara leyi leyintshwa swi nga hi hlomisela ku pfuna van’wana leswaku va va na hina eku endleni ka ku rhandza ka Xikwembu leswaku na vona va ta va ni ntshembo wa ku hanya hilaha ku nga heriki!—1 Yoh. 2:17.