Landzelani Ntila Wa Vaprofeta—Hosiya
1. I xivutiso xihi lexi u nga ha vaka u tivutise xona?
1 ‘Xana ndzi tiyimisele ku titsona yini hikwalaho ka Yehovha?’ Kumbexana u tivutise xivutiso xexo loko u anakanyisisa hi ku tala ka musa ni tintswalo takwe. (Ps. 103:2-4; 116:12) Hosiya u endle leswi Yehovha a n’wi leriseke leswaku a swi endla hi ku swi rhandza, hambileswi a swi lava leswaku a titsona swo karhi. Hi nga n’wi tekelela njhani Hosiya?
2. Hi nga xi tekelela njhani xikombiso lexinene xa Hosiya xo phikelela entirhweni wo chumayela?
2 Chumayela Hi Nguva Ya Ku Karhateka: Eku sunguleni rungula ra Hosiya a ri kongomisiwe eka tinyimba ta khume ta mfumo wa Israyele, laha vugandzeri bya ntiyiso a byi ri ekusuhi ni ku herisiwa. Hosi Yerobuwamu wa Vumbirhi u endle swo biha ematihlweni ya Yehovha naswona u hambete a kondletela ku gandzeriwa ka rhole loku sunguriweke hi Yerobuwamu wo Sungula. (2 Tih. 14:23, 24) Tihosi leti landzeleke ti ye emahlweni ni ku tsanisa vumoya bya mfumo wa tinyimba ta khume ku fikela loko wu lovisiwa hi ku helela hi 740 B.C.E. Kambe, ku nga khathariseki ku andza ka vugandzeri bya mavunwa, Hosiya u tirhe tanihi muprofeta ku ringana malembe ya 59 a tshembekile. Xana hilaha ku fanaka hi tiyimisele ku chumayela malembe hinkwawo, hambiloko vanhu va nga tsakeli kumbe va hi kaneta?—2 Tim. 4:2.
3. Vutomi bya Hosiya byi kombisa tintswalo ta Yehovha hi ndlela yihi?
3 Anakanyisisa Hi Tintswalo Ta Yehovha: Yehovha u byele Hosiya leswaku a teka “nsati wa vumbhisa.” (Hos. 1:2) Hambileswi nsati wa yena Gomere a n’wi velekeleke jaha, eku heteleleni u endle vuoswi ivi a veleka vana vambirhi. Ku va Hosiya a tsakele ku rivalela nsati wakwe a swi fanekisela tintswalo letikulu ta Yehovha eka Vaisrayele loko va hundzuka. (Hos. 3:1; Rhom. 9:22-26) Xana hi tiyimisele ku vekela etlhelo swilo leswi hi swi rhandzaka leswaku hi endla leswaku tintswalo ta Yehovha ti tiviwa hi vanhu va mixaka hinkwayo?—1 Kor. 9:19-23.
4. I yini swin’wana leswi hi nga titsonaka swona leswaku hi tirhela Yehovha?
4 Man’wana ya malandza ya Yehovha ma tshike mintirho leyi holelaka swinene leswaku ma ta va ni nkarhi wo tala ensin’wini. Van’wana a va byi ngheneli vukati kumbe a va na vana leswaku va rhangisa ntirho wa Mfumo. Loko hi anakanyisisa hi vutomi bya Hosiya, hi nga ha ku, ‘A ndzi nga ta swi endla leswi a swi endleke.’ Kambe, loko ku tlangela ka hina musa wa rirhandzu wa Yehovha ku kula ni ku titshega hi moya wa yena lowo kwetsima leswaku hi kuma matimba, a nga hi tirhisa hi tindlela leti a hi nga ti anakanyi, ku fana na Hosiya.—Mat. 19:26; Filp. 2:13.