Xana U Ta Wu Tirhisa Nkarhi Lowu Ku Pfulekelaka?
Xitsundzuxo Lexi Tshineleke Xi Hi Nyika Nkarhi Wo Kombisa Ku Tlangela
1. Hi wihi nkarhi wo hlawuleka lowu hi nga ta va na wona hi nkarhi wa Xitsundzuxo?
1 Xitsundzuxo lexi nga ta va hi April 14 xi hi nyika nkarhi wo hlawuleka wo hlakulela ni ku kombisa ku tlangela vunene bya Yehovha. Rungula leri kumekaka eka Luka 17:11-18 ri kombisa ndlela leyi Yehovha na Yesu va ku tekaka ha yona ku nkhensa. Khombo ra kona, i munhu un’we ntsena eka lava khume lava tshunguriweke nhlokonho loyi a kombiseke ku nkhensa. Enkarhini lowu taka, nyiko ya nkutsulo yi ta endla leswaku mavabyi hinkwawo ma hola hi ku helela, kutani vanhu va ta hanya hilaha ku nga heriki. A swi kanakanisi leswaku hi nkarhi wolowo hi ta nkhensa Yehovha siku ni siku hikwalaho ka mikateko yoleyo. Kambe hi nga ku kombisa njhani ku nkhensa eka mavhiki lama landzelaka?
2. Hi nga wu hlakulela njhani moya wo tlangela nkutsulo?
2 Hlakulela Moya Wo Tlangela: Munhu u kombisa ku tlangela endzhaku ko anakanyisisa. Leswaku hi kurisa ndlela leyi hi wu tlangelaka ha yona nkutsulo, ku ni xiyimiso xa ku hlaya ka Bibele ka Xitsundzuxo eka minkandziyiso yo hlayanyana, yo tanihi xibukwana lexi nge Ku Kambisisa Matsalwa Siku Ni Siku. Ha yini mi nga tirhisi xiyimiso xexo tanihi ndyangu? Hi ku endla tano, swi ta kurisa ndlela leyi hi wu tlangelaka ha yona nkutsulo. Sweswo swi ta va ni vuyelo lebyinene eka ndlela leyi hi tikhomaka ha yona.—2 Kor. 5:14, 15; 1 Yoh. 4:11.
3. Hi tihi tindlela leti hi nga kombisaka ku tlangela ha tona hi nkarhi wa Xitsundzuxo?
3 Kombisa Ku Tlangela: Ku tlangela ku kombisiwa hi swiendlo. (Kol. 3:15) Munhu loyi a a ri ni nhlokonho u tikarhatele ku kuma Yesu kutani a n’wi nkhensa. A swi kanakanisi leswaku u hisekele ku byela van’wana malunghana ni ndlela leyi a hanyisiweke ha yona hi singita. (Luka 6:45) Xana ku tlangela nkutsulo ku ta hi susumetela ku hlanganyela hi ku hiseka eka tsima ro tivisa vanhu van’wana hi Xitsundzuxo? Ndlela yin’wana yo kombisa ku nkhensa i ku teka vuphayona bya nkarhinyana kumbe ku tirha nkarhi lowu engetelekeke ensin’wini hi nkarhi wa Xitsundzuxo. Hi madyambu ya siku ra Xitsundzuxo, timbilu ta hina leti tlangelaka ti ta hi susumetela ku amukela vaendzi hi tlhela hi hlamula swivutiso swa vona.
4. Hi nga wu tirhisa njhani nkarhi wa Xitsundzuxo handle ko tisola?
4 Xana lexi xi ta va Xitsundzuxo xa hina xo hetelela? (1 Kor. 11:26) A hi swi tivi. Kambe ha swi tiva leswaku loko xo kala xi hundza, nkarhi wo hlawuleka wo kombisa ku tlangela wu ta va wu hundzile. Xana u ta wu tirhisa? Onge marito yo tlangela ya milomu ya hina ni ku anakanyisisa ka timbilu ta hina swi nga tsakisa Yehovha, Munyiki lonkulu wa nkutsulo.—Ps. 19:14.