Ku Tlangela Nyiko Ya Nkoka Leyi Humaka Eka Xikwembu
1. Ha yini hi fanele hi n’wi tlangela swinene Yehovha?
1 Eka ‘tinyiko hinkwato letinene’ leti Yehovha a hi nyikeke tona, gandzelo ra nkutsulo ra N’wana wakwe la rhandzekaka hi rona ra nkoka. (Yak. 1:17) Ri endla leswaku hi kuma mikateko yo tala, hi tlhela hi rivaleriwa swidyoho swa hina. (Efe. 1:7) Leswi hi swi tlangela minkarhi hinkwayo. Hi nkarhi wa Xitsundzuxo, hi heta nkarhi hi ri karhi hi anakanyisisa hi nyiko leyi ya nkoka.
2. I yini leswi hi nga swi endlaka leswaku hi hambeta hi tlangela nkutsulo tanihi ndyangu naswona i yini leswi hina vini hi nga swi endlaka?
2 Hambetani Mi Tlangela Lunghiselelo Ra Nkutsulo: Leswaku u pfuna ndyangu wa wena wu tlangela lunghiselelo leri, i swinene leswaku u tirhisa nkarhi wa n’wina wa Dyondzo ya Ndyangu leswaku mi pfuxeta rungula leri vulavulaka hi nkutsulo eka mavhiki ma nga ri mangani lama landzelaka Xitsundzuxo lexi nga ta va hi March 30. Nakambe siku ni siku kambisisani ku hlaya ka Bibele ko hlawuleka ka nkarhi wa Xitsundzuxo tanihi ndyangu. I swinene leswaku xirho ha xin’we endyangwini xi anakanyisisa hi ndlela leyi lunghiselelo ra nkutsulo ri mi vuyeriseke ha yona, ndlela leyi mi n’wi langutaka ha yona Yehovha, ndlela leyi xirho ha xin’we xi vuyeriweke ha yona, ndlela leyi van’wana va vuyeriwaka ha yona ni ndlela leyi vumundzuku bya n’wina byi katsekaka ha yona. Nakambe mi nga vuyeriwa hi ku titoloveta tinsimu timbirhi leti nga ta yimbeleriwa eXitsundzuxweni, ku nga risimu 87 na 105.—Ps. 77:12.
3. Hi nga swi kombisa njhani leswaku ha nkhensa?
3 Ku Kombisa Ka Hina Ku Nkhensa: Ku nkhensa lunghiselelo leri ra nkutsulo swi hi susumetela ku byela van’wana hi Yehovha ni hi rirhandzu rakwe lerikulu ro hi rhumelela N’wana wakwe. (Ps. 145:2-7) Hi March, April na May, mindyangu yin’wana yi tlangela nkutsulo hi ku hlela leswaku xirho xin’we xa ndyangu xi teka vuphayona bya nkarhinyana. Loko leswi swi nga koteki, xana u nga swi kota ku “tixavela nkarhi” leswaku u ndlandlamuxa vutirheli bya wena? (Efe. 5:16) Tanihi ndyangu, hlelani ku hlanganyela hi xitalo hi siku ro hlawuleka ro fambisa Timagazini hi Mugqivela, April 17. Ku nkhensa swi ta tlhela swi hi susumetela ku rhamba van’wana leswaku va va kona eXitsundzuxweni. (Nhlav. 22:17) Sungula ku tsala vanhu hinkwavo lava u nga ta va rhamba, ku nga ha va vanhu lava u tshembiseke ku tlhelela eka vona, swichudeni swa Bibele, maxaka, vatirhi-kulorhi swin’we ni vaakelani va wena, kutani u hlanganyela hi xitalo eka tsima ro hlawuleka ro rhambela vanhu eXitsundzuxweni.
4. I yini leswi hi nga swi endlaka leswaku hi tirhisa nkarhi wa Xitsundzuxo hi vutlhari?
4 Nkarhi wa Xitsundzuxo wu hi nyika nkarhi wo komba Yehovha ndlela leyi hi yi tlangelaka ha yona nyiko leyi a yi nyikeke vanhu. Onge hi nga tirhisa nkarhi lowu leswaku hi engetela vutirheli bya hina ni ku tlangela lunghiselelo ra nkutsulo ni swilo hinkwaswo swa “rifuwo leri nga pimekiki ra Kreste.”—Efe. 3:8.