Tinsimu Letintshwa To Dzunisa!
1 Eka nhlangano wa lembe ni lembe wa Watch Tower Bible and Tract Society of Pennsylvania, lowu a wu khomiwe hi October 4, 2014, ku tivisiwe leswaku buku ya hina ya tinsimu leyi hi yi tirhisaka yi ta pfuxetiwa. Wolawo a ma ri mahungu yo tsakisa hakunene! Hinkwavo lava a va ri kona va tsundzuxiwe hi xiphemu xa nkoka lexi tinsimu ta hina ta Mfumo ti faneleke ti va na xona evugandzerini bya hina.—Ps. 96:2.
2 U nga ha tivutisa, ‘Ha yini buku ya hina ya tinsimu yi fanele yi pfuxetiwa?’ Ku ni swivangelo swo hlayanyana. Xo sungula, ndlela leyi hi ma twisisaka ha yona Matsalwa yi tshama yi ri karhi yi lulamisiwa, hikwalaho sweswo swi nga khumba marito ya tinsimu ta hina. (Swiv. 4:18) Xivangelo xin’wana xa ku pfuxetiwa ka buku ya hina ya tinsimu hi lexi: Marito ni swiga swo tala leswi tirhisiweke ebukwini ya tinsimu ya Xinghezi leyi tirhisiwaka sweswi ma tekiwe eka nkandziyiso wa Vuhundzuluxeri Bya Misava Leyintshwa lebya khale. Marito wolawo ma fanele ma cinciwa sweswi leswaku ma ta fambisana ni marito lama nga eka nkandziyiso lowu pfuxetiweke. Tanihi leswi a ku ta va ntirho lowukulu ku endla leswaku marito ya yona ma fambisana ni ya nkandziyiso wolowo, ku endliwe xiboho xo engetela tinsimu ti nga ri tingani letintshwa ebukwini ya hina ya tinsimu.
3 Xana hi ta boheka ku rindza ku kondza ku kandziyisiwa buku ya tinsimu leyintshwa ku ri kona hi nga sungulaka ku tirhisa tinsimu letintshwa? Doo! Hi tsakela ku mi tivisa leswaku eka tin’hweti ti nga ri tingani leti nga ta landzela, ku ta hoxiwa tinsimu to hlayanyana letintshwa eka Web site ya hina ya jw.org. Loko ku hoxiwe risimu lerintshwa, ri ta yimbeleriwa loko ku hela Nhlangano wa Ntirho naswona ku ta va ku tsariwe leswaku “risimu lerintshwa.”
4 Ndlela Yo Dyondza Tinsimu Letintshwa: Swi nga ha tika ku dyondza risimu lerintshwa. Nilokoswiritano, ku fana ni mupisalema, hi lava ku yimbelela hi rito ra le henhla eminhlanganweni ya vandlha ematshan’weni yo ‘miyela.’ (Ps. 30:12) Landzela magoza lawa yo olova leswaku u dyondza risimu lerintshwa.
Ri yingisele hi ku phindha-phindha risimu leri chayiwaka hi piyano leri nga ta va ri hoxiwe eka Web site ya hina. Loko u ri yingisela swinene, swi ta ku olovela ku ri tsundzuka.
Titolovete marito ya rona naswona u ringeta ku ma nhlokohata.
Yimbelela risimu rolero hi marito. Ri yimbelele u kala u ri tiva.
Yimbelelani tinsimu letintshwa minkarhi yo hlayanyana hi nkarhi wa Vugandzeri bya n’wina bya Ndyangu ku kondza mindyangu ya n’wina yi ti tolovela.
5 Etin’hwetini leti taka loko ku ri leswaku ku ta yimbeleriwa risimu lerintshwa loko ku hela Nhlangano wa Ntirho, vamakwerhu evandlheni va ta ri yingisela kan’we. Endzhaku ka sweswo va ta ri yimbelela va ri karhi va landzela risimu leri chayiwaka hi piyano, hilaha hi endlaka hakona eka tinsimu letin’wana.
6 Ku yimbelela eminhlanganweni ya hina swi endla leswaku hi tsakela ku yimbelela ni vamakwerhu leswaku hi dzunisa Yehovha. Hikwalaho, a hi fanelanga hi titoloveta ku humela ehandle swi nga bohi loko ku fanele ku yimbeleriwa risimu eminhlanganweni ya hina ya Vukreste.
7 Ku ni ndlela yin’wana leyi hi nga kombisaka ha yona leswaku ha byi tlangela vuyimbeleri bya hina byo kwetsima. Etinhlengeletanweni ku tlangiwa vuyimbeleri loko nongonoko wu nga si sungula. Vamakwerhu va xinuna ni va xisati lava tinyiketeleke lava humaka ematikweni yo hambana-hambana va hlangana kambirhi hi lembe le Patterson, eNew York, leswaku va ta lunghiselela vuyimbeleri lebyi tsakisaka lebyi hi nga ta byi tirhisa evugandzerini bya hina, naswona loko va ya kona va tihakelela. Hikwalaho, loko mutshama-xitulu a hi kombela leswaku hi tshamiseka kutani hi yingisela vuyimbeleri lebyi lunghiseleriweke hi ntlawa lowu, hi fanele hi endla tano. Sweswo swi ta hi pfuna leswaku hi lunghiselela timbilu ta hina leswaku ti yingisela vuyimbeleri lebyi nga ta tlangiwa.—Ezra 7:10.
8 Namuntlha hi ta gimeta minhlangano ya hina hi risimu lerintshwa leri nga ni nhloko-mhaka leyi nge, “Mfumo Wa Xikwembu Se Wu Lunghekele Ku Ta!” Risimu leri, leri tlangiweke eka nhlangano wa lembe ni lembe lowu khomiweke n’wexemu, ri qambhiwile hi leswi Mfumo wa Xikwembu wu nga ni malembe ya dzana wu ri karhi wu fuma.
9 Entiyisweni tinsimu leti letintshwa i “swilo leswinene” leswi humaka eka Yehovha. (Mat. 12:35a) A hi tiyimiseleni ku dyondza tinsimu leti letintshwa kutani hi ti yimbelela hi timbilu ta hina hinkwato, hi nyika Xikwembu xa hina ku dzuneka ni ku fundzhiwa loku xi fanelaka.—Ps. 147:1.