Yana eMahlweni U Endla Nhluvuko Tanihi Muhuweleri Wa Mahungu Lamanene
1. I swikombiso swihi swa le minkarhini ya vaapostola leswi kombisaka leswaku hi fanele hi endla nhluvuko tanihi vahuweleri va mahungu lamanene?
1 Vakreste va fanele va endla nhluvuko tanihi vahuweleri va mahungu lamanene. Hi yona mhaka Yesu a leteleke valandzeri vakwe hi ndlela leyi va pfuneke leswaku va antswisa vuswikoti bya vona entirhweni wo chumayela. (Luka 9:1-5; 10:1-11) Nakambe hi yona mhaka Akhwila na Prisila va fambeke na Apolosi kutani “va n’wi hlamusela ndlela ya Xikwembu hilaha ku lulameke.” (Mint. 18:24-26) Hikwalaho, Pawulo u khutaze Timotiya, muevhangeli la nga ni ntokoto leswaku a ya emahlweni a tinyiketela eka leswi a swi dyondzisaka leswaku ku ya emahlweni kakwe ku ta “vonaka eka vanhu hinkwavo.” (1 Tim. 4:13-15) Ku nga khathariseki leswaku hi ni nkarhi wo tanihi kwihi hi ri vahuweleri va mahungu lamanene lava nga mahlonga ya Hosi, hi fanele hi ya emahlweni hi antswisa vuswikoti bya hina byo chumayela.
2. Hi nga dyondza njhani eka van’wana?
2 Dyondza Eka Van’wana: Ndlela yin’wana yo antswisa vuswikoti bya hina i ku dyondza eka van’wana. (Swiv. 27:17) Hikwalaho, yingiserisisa loko vahuweleri van’wana va ri karhi va chumayela. Kombela swiringanyeto eka vahuweleri lava nga ni vuswikoti, naswona u yingiserisisa leswi va swi vulaka. (Swiv. 1:5) Xana a wu tiyiseki hi ndlela leyi u nga ri endlaka ha yona riendzo ro vuyela, ku sungula dyondzo ya Bibele, kumbe ku chumayela hi tindlela tin’wana? Kombela mulanguteri wa ntlawa wa n’wina kumbe muhuweleri la nga ni ntokoto leswaku a ku letela. Nakambe tsundzuka leswaku moya lowo kwetsima wa Yehovha wu nga antswisa vuswikoti bya hina, hikwalaho wu kombele nkarhi ni nkarhi loko u khongela.—Luka 11:13.
3. Hi fanele hi endla yini loko un’wana a ringanyeta leswaku hi antswisa emhakeni yo karhi, hambiloko hi nga n’wi kombelanga?
3 U nga khunguvanyeki loko un’wana, hambiloko u nga n’wi kombelanga, a ringanyeta leswaku u antswisa emhakeni yo karhi. (Ekl. 7:9) Ku fana na Apolosi, amukela mpfuno hi ku titsongahata u tlhela u wu tlangela. Loko u endla tano u ta va u kombisa leswaku u tlharihile.—Swiv. 12:15.
4. Hi xihi xivangelo lexikulu lexi Yesu a vuleke leswaku hi fanele hi endla nhluvuko tanihi vaevhangeli hikwalaho ka xona?
4 Ku Endla Nhluvuko Swi Dzunisa Xikwembu: Yesu u tirhise xifaniso leswaku a khutaza valandzeri vakwe leswaku va endla nhluvuko tanihi vahuweleri va mahungu lamanene. U tifanise ni murhi wa vhinya ivi valandzeri vakwe lava totiweke a va fanisa ni marhavi. U vule leswaku Tatana u basisa rhavi rin’wana ni rin’wana leri vekaka mihandzu “leswaku ri tswala mihandzu leyi engetelekeke.” (Yoh. 15:2) Tanihi leswi n’wini wa nsimu ya vhinya a lavaka leswaku marhavi ya mirhi ya vhinya ya yena ma tswala mihandzu leyi engetelekeke, Yehovha u lava leswaku hi ya emahlweni hi antswisa vuswikoti bya hina byo tswala “mbhandzu wa milomu” ya hina. (Hev. 13:15) Hi byihi vuyelo lebyi enerisaka lebyi nga ta va kona loko hi endla nhluvuko tanihi vaevhangeli? Yesu u hi nyika nhlamulo a ku: “Tatana u vangamisiwa hi sweswo, leswi mi hambetaka mi tswala mihandzu yo tala.”—Yoh. 15:8.