Ku Antswisa Vutshila Bya Hina Ensin’wini—Ndlela Yo Letela Swichudeni Swa Bibele Ku Hlakulela Ndlela Leyinene Yo Dyondza

Lexi Endlaka Swi Va Swa Nkoka: Leswaku swichudeni swa Bibele swi wupfa hi tlhelo ra moya a swi fanelanga swi wundla mianakanyo ni timbilu ta swona hi tidyondzo ta xisekelo ta Rito ra Xikwembu ntsena. (Hev. 5:12–6:1) Ku dyondza swi lava matshalatshala. Swi katsa ku hlanganisa rungula lerintshwa ni leswi se hi swi tivaka hi tlhela hi xiya ndlela leyi ri hi pfunaka ha yona. (Swiv. 2:1-6) Ku dyondza ku tiendlela ndzavisiso swi ta endla leswaku swichudeni swi kota ku hlamula swivutiso swa le Bibeleni swi tirhisa minkandziyiso ya hina ya Vukreste. Matshalatshala lamakulu lama swi ma endlaka yo tirhisa leswi swi swi dyondzaka ma ta swi hlomisa leswaku swi tiyisela miringo leyi swi nga ta langutana na yona tanihi Vakreste.—Luka 6:47, 48.

Ndlela Leyi U Nga Swi Endlaka Ha Yona:

Kandziyisa leswaku i swa nkoka ku khongela mi kombela mpfuno wa Yehovha mi nga si sungula dyondzo yin’wana ni yin’wana.—Yoh. 14:26; 1 Kor. 2:10.
To ho suka, khutaza xichudeni xa wena ku lunghiselela dyondzo ya xona ya Bibele ka ha ri emahlweni. Xi kombe buku ya wena kutani u xi dyondzisa ndlela yo khwatihata kumbe ku fungha maritonkulu kumbe xivulwa.
Xi kombele leswaku xi hlamula hi marito ya xona n’wini. Papalata ku endla dyondzo ya n’wina yi va bulo ra swivutiso ni tinhlamulo laha xichudeni xi hlayaka nhlamulo ya xona ebukwini.
Khutaza xichudeni xa wena leswaku xi hlaya Rito ra Xikwembu siku ni siku. Xi kombe xiyimiso xo hlaya Bibele lexi nga eka jw.org, lexi kombisaka kahle ndlela leyi xi nga swi endlaka ha yona sweswo. Ku hlakulela mukhuva wo hlaya Bibele siku ni siku swi lava ku tiyimisela, kambe swa vuyerisa swinene.—Ps. 1:2, 3.
Komba xichudeni xa wena ndlela leyi xi nga kumaka tinhlamulo ta swivutiso swa le Bibeleni xi tirhisa Watchtower Library kumbe Watchtower LAYIBURARI YA LE KA WEBSITE. Xi pfune leswaku xi tiva nkomiso wa marito lama yimelaka minkandziyiso lama talaka ku tirhisiwa eminhlanganweni ya vandlha; hi xikombiso, fg yi yimela broxara leyi nge Mahungu Lamanene Lama Humaka Eka Xikwembu!

Ringeta Ku Endla Leswi N’hweti Leyi:

Loko mi heta xihlokwana kumbe ndzima, xi kombele leswaku xi hlamusela leswi xi swi dyondzeke hi ku komisa. Loko u pfumala xichudeni, ringeta ku katsakanya ndzimana ya Bibele kumbe ya Xihondzo xo Rindza leswaku u antswisa matwisiselo ya wena.