Swikombo Swa Mikandziyiso Leyi Nga Eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela
© 2024 Watch Tower Bible and Tract Society of Pennsylvania
SEPTEMBER 2-8
LESWI HI SWI DYONDZAKA EBIBELENI | PISALEMA 79-81
Kombisa Rirhandzu Eka Vito Ra Yehovha Ro Kwetsima
Nkutsulo I ‘Nyiko Leyi Hetisekeke’ Leyi Humaka Eka Tatana
5 Hi nga swi kombisa njhani leswaku ha ri rhandza vito ra Yehovha? Hi nga swi kombisa hi ndlela leyi hi tikhomaka ha yona. Yehovha u lava leswaku hi kwetsima. (Hlaya 1 Petro 1:15, 16.) Leswi swi vula leswaku hi fanele hi gandzela Yehovha ntsena naswona hi n’wi yingisa hi timbilu ta hina hinkwato. Hambiloko hi xanisiwa, hi endla hinkwaswo leswi hi nga swi kotaka leswaku hi hanya hi milawu ya Yehovha yo lulama. Loko hi hanya hi ndlela leyinene, vanhu va ta hi xixima naswona sweswo swi ta endla leswaku vito ra Yehovha ri vangamisiwa. (Mat. 5:14-16) Tanihi vanhu lava kwetsimaka, hi swi kombisa hi mahanyelo ya hina leswaku milawu ya Yehovha i yinene ni leswaku swihehlo swa Sathana i mavunwa. Loko hi endla swihoxo, ha hundzuka hilaha ku heleleke naswona hi tshika ku endla swilo leswi nga tisaka xisandzu eka Yehovha.—Ps. 79:9.
Varhoma 10:13—“[Vitana] Vito Ra Yehovha”
EBibeleni xiga “[ku vitana] vito ra Yehovha’’ xi vula swo tala ku tlula ku tiva vito ra Xikwembu ni ku ri tirhisa loko hi gandzela. (Pisalema 116:12-14) Xi vula ku tshemba Xikwembu ni ku kombela mpfuno eka xona.—Pisalema 20:7; 99:6.
Vito ra Xikwembu a ri ri ra nkoka eka Yesu Kreste. U vule leswi eka xikhongelo lexi a xi dyondziseke vanhu: “Tata wa hina la nga matilweni, vito ra wena a ri kwetsimisiwe.” (Matewu 6:9) Yesu u kombise leswaku hi fanele hi tiva, hi yingisa ni ku rhandza Xikwembu lexi vitaniwaka hi vito rero loko hi lava ku kuma vutomi lebyi nga heriki.—Yohane 17:3, 6, 26.
Endla Ndzavisiso
it-2 E 111
Yosefa
Vito Ra Yosefa Ri Nyikiwe Ndhuma. Loko ku langutiwa xikhundlha xa nkoka lexi Yosefa a ri na xona exikarhi ka majaha ya Yakobo, a swi fanerile leswaku vito rakwe mikarhi yin’wana ri tirhisiwa ku yimela tinyimba hinkwato ta Israyele (Ps 80:1) kumbe leti a ti katseka eka mfumo wa le n’walungwini. (Ps 78:67; Am 5:6, 15; 6:6) Vito rakwe ri tlhela ri katseka eka vuprofeta bya Bibele. Exivon’weni xa vuprofeta bya Ezekiyele, ndzhaka ya Yosefa i swiphemu swimbirhi (Ezk 47:13) eka yin’we ya tigede ta muti “Yehovha U Kwalaho” yi ni vito ra Yosefa (Ezk 48:32, 35) naswona hi ku yimela ku hlanganisiwa ka vanhu va Yehovha, Yosefa u vuriwa hosi ya xiphemu xin’we xa tiko kasi Yuda i hosi ya xiphemu lexin’wana. (Ezk 37:15-26) Vuprofeta bya Obadiya byi kombise leswaku “yindlu ya Yosefa” a yi ta katseka eka ku lovisa “yindlu ya Esawu” (Oba 18) kasi bya Zakariya byi kombisa Yehovha a ponisa “yindlu ya Yosefa.” (Zk 10:6) Ematshan’wini ya Efrayimi, Yosefa u humelela tanihi hi un’wana wa tinyimba ta Israyele wa moya kumbe wa Xikwembu.—Nhl 7:8.
Mhaka ya leswaku Yosefa u boxiwa eka Nhlavutelo 7:8 yi kombisa leswaku vuprofeta lebyi Yakobo a byi vuleke loko a ri kusuhi ni ku fa a byi ta tirha eka Israyele wa Xikwembu. Hikwalaho, swi le rivaleni leswaku lowa Matimba Hinkwawo Wa Yakobo, Yehovha Xikwembu, u nyikele hi Kreste Yesu tanihi Murisi Lonene loyi a nyikeleke hi vutomi byakwe hikwalaho “ka tinyimpfu.” (Yh 10:11-16) Kreste Yesu i ribye ra nkoka swinene ra masungulo ra laha tempele ya Xikwembu ya Vaisrayele va Xikwembu yi tshameke kona. (Ef 2:20-22; 1Pe 2:4-6) Naswona Murisi ni Ribye va ni lowa Matimba Hinkwawo.—Yh 1:1-3; Mi 7:56; Hv 10:12; ringanisa na Gn 49:24, 25.
SEPTEMBER 9-15
LESWI HI SWI DYONDZAKA EBIBELENI | PISALEMA 82-84
Tlangela Leswi U Swi Endlelaka Yehovha
Leswi Hi Swi Dyondzaka Eka Swinyenyana
Vanhu va le Yerusalema a va ti tiva kahle timbewulana, leti hakanyingi ti akaka swisaka swa tona emakorhweni ya malwangu ya miako. Tin’wana a ti aka swisaka etempeleni leyi akiweke hi Solomoni. Swi nga ha endleka leswaku timbewulana leti a ti aka swisaka swa tona etempeleni lembe ni lembe, a ti kota ku kurisa mavondlo ya tona handle ko kavanyetiwa.
Mutsari wa Pisalema 84, ku nga un’wana wa vana va Kora, loyi a a tirha etempeleni vhiki rin’we endzhaku ka tin’hweti ta tsevu, u vone swisaka swa timbewulana etempeleni. A a navela ku tshama endlwini ya Yehovha vutomi byakwe hinkwabyo ku fana na tona. U yimbelerile a ku: “Mawaku ku xonga ka tabernakela ya wena leyikulu, Oho Yehovha wa mavuthu! Moya-xiviri wa mina a wu navela ni ku hisekela swivava swa Yehovha. . . . Ni nyenyana yi kume yindlu, ni nyenga [mbewulana] yi tikumele xisaka, laha yi vekeke mavondlo ya yona—Alitari ya wena leyikulu, wena Yehovha wa mavuthu, Hosi yanga ni Xikwembu xanga!” (Pisalema 84:1-3) Xana hina ni vana va hina hi kombisa leswaku hi swi navela hi mbilu hinkwayo ku ti hlanganisa ni vanhu va Xikwembu evandlheni minkarhi hinkwayo?—Pisalema 26:8, 12.
Tivekele Tipakani Leti U Nga Ta Ti Fikelela U Tlhela U Tsaka
Ku dyuhala kumbe mavabyi swi nga ha hi kavanyeta entirhweni wa Yehovha. Loko u ri mutswari, u nga ha va u titwa onge a wu vuyeriwi eka dyondzo ya munhu hi yexe kumbe eminhlanganweni ya Vukreste hileswi u faneleke u tirhisa nkarhi ni matimba ya wena yo tala eka vana va wena. Hambiswiritano, xana ku anakanya ngopfu hi ku tsana ka wena minkarhi yin’wana swi nga ku sivela ku vona swilo leswi nga ha ku tsandzaka ku swi endla?
Eka malembe ya magidi-gidi lama hundzeke, Mulevhi un’wana u phofule ku navela ka yena loku a nga ta swi kota ku ku enerisa. Lembe ni lembe a a ri ni lunghelo ro tirha mavhiki mambirhi etempeleni. Hambiswiritano, u phofule ku navela loku bumabumeriwaka ko tshama hilaha ku nga heriki ekusuhi ni alitari. (Ps. 84:1-3) I yini lexi pfuneke wanuna loyi wo tshembeka leswaku a eneriseka? U swi xiyile leswaku hambi ku tshama siku rin’we exivaveni xa tempele a ku ri lunghelo ro hlawuleka. (Ps. 84:4, 5, 10) Hilaha ku fanaka, ematshan’weni yo anakanya hi ku tsana ka hina, hi fanele hi ringeta ku twisisa ni ku tlangela swilo leswi hi nga kotaka ku swi endla.
Yehovha Xikwembu Xa Wena U Ku Teka U Ri Wa Nkoka!
12 Loko u vabya, tiyiseka leswaku Yehovha wa ma vona maxangu lawa u langutanaka na wona. N’wi kombele a ku pfuna u kota ku langutana ni xiyimo hi ndlela leyinene. Hlaya Bibele u twa marito lamanene lawa Yehovha a ku tsaleleke wona. Hlaya tindzimana leti vulavulaka hi ndlela leyi Yehovha a ma tekaka ma ri ya nkoka ha yona malandza yakwe. Loko u endla tano, u ta swi vona leswaku Yehovha wa khathala hi vanhu lava n’wi tirhelaka hi ku tshembeka.—Ps. 84:11.
Endla Ndzavisiso
it-1 E 816
N’wana Loyi A Nga Riki Na Tatana
Tanihi leswi a swi olova ku rivala hi lava feriweke ni vana lava nga kotiki ku ti lwela, Yehovha u tirhise xiga lexi nge “n’wana loyi a nga riki na tatana” ku hlamusela xiyimo xa vululami eka vana va Israyele kumbe loko va tsandzeka ku landzela milawu yakwe ya mahanyelo. Loko tiko ri tiphina hi ku va na vuxaka lebyinene na Yehovha, n’wana loyi a nga riki na tatana na yena a a khathaleriwa. Loko vululami byi soholotiwa etikweni, hi nga vula hi nga kanakani leswaku n’wana loyi a nga riki na tatana a nga khathaleriwi kutani lexi a ku ri xikombiso xa ku onhaka ka mahanyelo ya tiko. (Ps 82:3; 94:6; Esa 1:17, 23; Yr 7:5-7; 22:3; Ezk 22:7; Zk 7:9-11; Mlk 3:5) Yehovha a a rhukana lava tshikilelaka lava nga riki na vatatana. (Dt 27:19; Esa 10:1, 2) Yehovha u tihlamusela tanihi Mukutsuri (Swiv 23:10, 11), Mupfuni (Ps 10:14) ni Tatana (Ps 68:5) wa vanhu vo tano. Hi yena a avanyisaka hi ndlela leyinene (Dt 10:17, 18), u va komba tintswalo (Hs 14:3), wa va sirhelela (Ps 146:9) ni ku va hlayisa va hanya.—Yr 49:11.
Mfungho wun’wana wa Vakreste va ntiyiso i ku anakanyela lava feriweke hi vavanuna va vona kumbe vatswari. Mudyondzisiwa Yakobo u tsalele Vakreste a ku: “Vugandzeri lebyi baseke hi ku ya hi Xikwembu tlhelo Tata wa hina hi lebyi: ku hlayisa vana lava nga riki na vatswari ni tinoni leti nga emaxangwini, ni ku va munhu a tshama a nga ri na xivati xa misava.”—Yk 1:27.
SEPTEMBER 16-22
LESWI HI SWI DYONDZAKA EBIBELENI | PISALEMA 85-87
Xikhongelo Xi Hi Pfuna Leswaku Hi Tiyisela
Xana U Vonakarisa Ku Vangama Ka Yehovha?
10 Leswaku hi vonakarisa ku vangama ka Yehovha, hi fanele hi tlhela hi “phikelela exikhongelweni.” (Rhom. 12:12) Hi fanele hi khongela eka yena hi kombela leswaku a hi pfuna hi n’wi tirhela hi ndlela leyi amukelekaka. Hi nga n’wi kombela leswaku a hi nyika moya lowo kwetsima, ripfumelo leri tiyeke, matimba yo lwisana ni ndzingo ni vuswikoti byo ri “tamela khwatsi rito ra ntiyiso.” (2 Tim. 2:15; Mat. 6:13; Luka 11:13; 17:5) Tanihi leswi n’wana a titshegaka hi tata wakwe, hi fanele hi titshega hi Tata wa hina wa le tilweni, ku nga Yehovha. Loko hi n’wi kombela leswaku a hi pfuna leswaku hi n’wi tirhela hi xitalo, hi nga tiyiseka leswaku u ta endla tano. A hi fanelanga hi titwa onge ha n’wi tikisela. Ematshan’weni ya sweswo, loko hi khongela a hi n’wi vangamiseni, hi n’wi nkhensa, hi kombela nkongomiso wakwe ngopfu-ngopfu loko hi ri endzingweni. Hi nga tlhela hi n’wi kombela leswaku a hi pfuna hi n’wi vangamisa entirhweni wa hina wo chumayela.—Ps. 86:12; Yak. 1:5-7.
Ndlela Leyi Yehovha A Swi Hlamulaka Hayona Swikhongelo Swa Hina
17 Hlaya Pisalema 86:6, 7. Mupisalema Davhida a a tiyiseka leswaku Yehovha wa swi yingisa ni ku tlhela a hlamula swikhongelo swakwe. Na wena u nga tiyiseka. Swikombiso leswi hi buleke ha swona eka nhlokomhaka leyi, swa hi tiyisekisa leswaku Yehovha a nga hi nyika vutlhari ni matimba lama hi ma lavaka leswaku hi tiyisela. A nga ha tirhisa vamakwerhu kumbe vanhu lava nga n’wi gandzeriki sweswi leswaku va hi pfuna hi ndlela yo karhi.
18 Hambileswi mikarhi yin’wana Yehovha a nga swi hlamuliki swikhongelo swa hina hi ndlela leyi a hi langutele hayona, ha swi tiva leswaku u ta swi hlamula. U ta hi nyika leswi hi swi lavaka naswona hi nkarhi lowu hi swi lavaka ha wona. Yana emahlweni u khongela, u va ni ripfumelo ni ku tiyiseka leswaku Yehovha u ta ku khathalela sweswi naswona emisaveni leyintshwa u ta “enerisa ku navela ka swivumbiwa hinkwaswo leswi hanyaka.”—Ps. 145:16.
Endla Ndzavisiso
it-1 E 1058 ¶5
Mbilu
Ku Tirha ‘‘Hi Mbilu Hinkwayo.” Mbilu ya xiviri yi fanele yi va leyi heleleke leswaku yi kota ku tirha kahle kambe mbilu yo fanekisela yi nga avana. Davhida u khongele a ku: ‘‘Ndzi endle ndzi chava vito ra wena hi mbilu ya mina hinkwayo,’’ leswi kombisaka leswaku mbilu ya munhu yi nga va leyi avaneke hikwalaho ka leswi a swi rhandzaka ni hikwalaho ka leswi a swi chavaka. (Ps 86:11) Munhu wo tano a nga ha va ni timbilu timbirhi, a nga hiseki naswona a gandzela Xikwembu hi ndlela leyi kufumelaka. (Ps 119:113; Nhlav 3:16) Munhu a nga tlhela a va ni timbilu timbirhi hi ku ringeta ku tirhela tihosi timbirhi kumbe hi ku tikanganyisa a vula swin’wana loko hi hala tlhelo a ehleketa leswi hambaneke. (1 Tikr 12:33; Ps 12:2, nhlamuselo ya le hansi) Yesu u byi sole hi ku helela vukanganyisi byebyo bya ku va ni timbilu timbirhi.—Mat 15:7, 8.
SEPTEMBER 23-29
LESWI HI SWI DYONDZAKA EBIBELENI | PISALEMA 88-89
Yehovha U Fuma Hi Ndlela Leyinene
Seketela Vuhosi Bya Yehovha!
5 Ku ni xivangelo xin’wana lexi endlaka leswaku Yehovha a fanelekela ku fuma vuako hinkwabyo. Vulawuri byakwe u byi tirhisa hi vululami lebyi hetisekeke. U ri: “Hi mina Yehovha, Loyi a kombisaka musa wa rirhandzu, vululami ni ku tshembeka emisaveni; hikuva swilo leswi ndza swi tsakela.” (Yer. 9:24) Yehovha a nga titsheganga hi milawu leyi endliweke hi vanhu lava nga hetisekangiki leswaku yi n’wi pfuna ku tiva swilo leswi lulameke. Ku ri na sweswo, hi yena loyi a nyikeke vanhu milawu leyi nga va pfunaka ku hambanisa leswi lulameke ni leswi nga lulamangiki. Kutani hi nga tiyiseka leswaku milawu, misinya ya milawu ni swiboho leswi a swi endlaka swi lulamile hikuva “ku lulama ni vuavanyisi i ndhawu ya xiluvelo xa [yena].” (Ps. 89:14; 119:128) Ku hambana ni sweswo, hambileswi Sathana a soleke mfanelo ya Yehovha yo fuma vuako hinkwabyo, u tsandzekile ku endla leswaku misava leyi yi va ni ku rhula.
Seketela Vuhosi Bya Yehovha!
10 Yehovha a nga va tikiseli lava a va fumaka. U endla leswaku va va ni ntshunxeko ni ntsako. (2 Kor. 3:17) Davhida u swi veke hi ndlela leyi: “Xindzhuti ni ku vangama swi le mahlweni ka [Xikwembu], ntamu ni ntsako swi le ndhawini [ya xona].” (1 Tikr. 16:7, 27) Nakambe mupisalema Ethani u tsale a ku: “Va tsaka vanhu lava tivaka ku huwelela ka ku tsaka. Oho Yehovha, va hambeta va famba hi ku landza ku vonakala ka xikandza xa wena. Va tsaka siku hinkwaro evitweni ra wena naswona va tlakusiwa hi ku lulama ka wena.”—Ps. 89:15, 16.
11 Loko hi tshama hi ri karhi hi anakanyisisa hi swilo leswinene leswi Yehovha a hi endleleke swona, hi ta ya hi tiyiseka leswaku i Mufumi lonene. Na hina hi ta titwa ku fana ni mupisalema loyi a nga te: “Siku rin’we eswivaveni swa wena ri tlula gidi endhawini yin’wana.” (Ps. 84:10) I yini lexi nga endlaka hi titwa hi ndlela yoleyo? Leswi Yehovha a nga Muvumbi wa hina, wa swi tiva leswi nga hi tsakisaka naswona u hi nyika swona hi mpimo lowukulu. Leswi a swi languteleke eka hina swi vuyerisa hina swi tlhela swi hi endla hi tsaka swinene. Hambiloko swi lava hi titsona swo karhi leswaku hi n’wi yingisa, hi ta tshama hi tsakile.—Hlaya Esaya 48:17.
Mi Va Ni Ripfumelo Leri Tiyeke Eka Mfumo Wa Xikwembu
13 Xitshembiso lexi endliweke le Edeni ni ntwanano wa Abrahama swi kombise yinhla ya nkoka ya leswaku vuhosi bya Yehovha lebyi yimeriwaka hi Mfumo wa Mesiya byi sekeriwe byi tiya eka milawu ya Xikwembu yo lulama. (Ps. 89:14) Xana mfumo wa Mesiya wu ta va ni vukanganyisi kutani wu boheka ku siviwa hi wun’wana? Ntwanano wun’wana wu tiyisekisa leswaku sweswo a swi nge pfuki swi endlekile.
Endla Ndzavisiso
“A Ku Na Un’wana La Tshembekaka Handle Ka Wena”
4 Hi ku ya hi Matsalwa ya Xiheveru, rito leri nge “ku tshembeka”, ri vula musa lowu kombisiwaka munhu kumbe nchumu wo karhi hi ku helela. Ku tshembeka swi katsa swo tala. Ku tlula kwalaho, munhu a nga tshembeka eka swilo swo karhi ntsena. Ku hambana ni sweswo ku tshembeka ku fambisana ni rirhandzu. Hikwalaho rito ku “tshembeka” ri nga tirhisisiwa ni le ka swilo leswi nga hanyiki. Hi xikombiso, mupisalema u vula leswaku n’weti i “mbhoni yo tshembeka exibakabakeni,” hikwalaho ka leswi wu tshamaka wu ri kona nivusiku. (Pisalema 89:37) Kambe a hi nge vuli leswaku n’weti wa tshembeka. Hikwalahokayini? Hikuva ku tshembeka ku kombisiwa hi rirhandzu—ku nga nchumu lowu swilo leswi nga hanyiki swi nga swi kotiki ku wu endla.
5 Hi ku ya hi Matsalwa, ku tshembeka loku, ku fambisana ni rirhandzu. Ndlela leyi ku tshembeka loku ku vonakaka hayona, yi kombisa leswaku ku ni vuxaka byo karhi exikarhi munhu loyi a kombisaka vumunhu lebyi ni loyi a kombiwaka byona. Vutshembeki lebyi byi tshama byi ri kona. A byi fani ni magandlati ya lwandle lama biwaka hi moya ma ya hala ni hala. Ku hambana ni sweswo, vutshembeki lebyi kumbe rirhandzu leri ro tshembeka, ra khomelela naswona ri ni matimba yo langutana ni swihinga leswikulu swinene.
SEPTEMBER 30–OCTOBER 6
LESWI HI SWI DYONDZAKA EBIBELENI | PISALEMA 90-91
Leswaku U Hanya Nkarhi Wo Leha, Tshemba Yehovha
Ku Lava Ku Hanya Vutomi Byo Leha
A hi van’wasayense hinkwavo lava pfumelaka leswaku mirhi yo tala yo sivela ku dyuhala yi nga endla leswaku hi hanya nkarhi wo leha ku tlula lowu hi wu hanyaka. I ntiyiso leswaku ku sukela hi va 1800 swi tlhele swi koteka leswaku vanhu va hanya nkarhi wo lehanyana. Leswi swi endliwa hi ku tshama endhawini leyi baseke ni leswi swi olovaka ku lwisana ni mavabyi lama tlulelaka ni ku tirhisa maphilisi lama lwisanaka ni switsongwatsongwana ni tinayiti to sivela mavabyi. Van’wasayense van’wana va ehleketa leswaku vutomi bya vanhu hi ntumbuluko byi pimiwile.
Kwalomu ka malembe ya 3 500 lama hundzeke mutsari wa Bibele Muxe u te: “Masiku ya malembe ya hina i malembe ya 70; Loko ku ri hikwalaho ka matimba yo hlawuleka i malembe ya 80, Kambe eka wona ku tshama ku ri ni ku karhateka ni swilo swo biha; Hikuva ma hundza hi ku hatlisa, kutani hi haha.” (Pisalema 90:10) Ku nga khathariseki matshalatshala lama vanhu va ma endleke ku endla leswaku vanhu va hanya nkarhi wo leha, vutomi bya ha ri hilaha Muxe a hlamuseleke ha kona.
Vanhu va hanya nkarhi wo koma kambe ku ni swiharhi leswi hanyaka malembe yo tlula 200 ni misinya leyi hanyaka malembe ya magidi. Loko hi pimanisa vutomi bya hina ni bya swivumbiwa swin’wana leswi hanyaka hi nga ha tivutisa leswaku, ‘Xana hi vumberiwe ku hanya malembe ya 70 kumbe ya 80 ntsena?’
wp19.1 5, box
Vito Ra Xikwembu I Mani?
Vanhu vo tala va tivutisa xivutiso lexi. Swi nga endleka na wena u tshame u tivutisa. Loko swilo hinkwaswo leswi nga kona swi lo vumbiwa, xana Xikwembu xi vumbe hi mani?
Van’wasayense va pfumela leswaku swilo hinkwaswo swi ni masungulo. Leswi va swi vulaka swi fambisana ni leswi ndzimana yo sungula ya Bibele yi swi vulaka, yi ri: “Eku sunguleni Xikwembu xi tumbuluxe matilo ni misava.”—Genesa 1:1.
Ntumbuluko a wu lo tiendlekela; a wu kona nchumu lowu nga vaka kona hi xiwelo. A ku na nchumu lowu nga lo tiendlekela. Loko ku ri hileswaku ku sukela eku sunguleni Xikwembu a xi nga ri kona, swi vula leswaku vuako hinkwabyo a byi nga ta va kona. Leswi swi vula leswaku, Xikwembu hi xona xi nga endla leswaku vuako hinkwabyo byi va kona. Swi le rivaleni leswaku Yehovha Xikwembu u ni matimba lamakulu ni vutlhari.—Yohane 4:24.
The Loko Bibele yi vulavula hi Xikwembu yi ri: “Tintshava ti nga si velekiwa, kumbexana u humese misava ni tiko leri noneke onge hiloko u swi humesa hi switlhavi swa ku veleka, u Xikwembu ku suka enkarhini lowu nga riki na makumu ku ya enkarhini lowu nga riki na makumu.” (Pisalema 90:2) Hikwalaho, Xikwembu a xi vumbanga hi munhu, a xi na masungulo. Xisweswo “eku sunguleni” xi tumbuluxe swilo hinkwaswo.—Nhlavutelo 4:11.
Ndlela Leyi Rirhandzu Ri Hi Pfunaka Hayona Hi Tshika Ku Chava
16 Sathana wa swi tiva leswaku ha swi rhandza ku hanya. U vula leswaku hi nga pfumela ku lahlekeriwa hi swilo hinkwaswo hambi ku ri vuxaka bya hina na Yehovha leswaku hi ponisa vutomi bya hina. (Yobo 2:4, 5) Sathana u be ehansi! Leswi “a nga ni matimba yo vanga rifu,” u tirhisa ku chava ka hina rifu leswaku a hi tshikisa ku tirhela Yehovha. (Hev. 2:14, 15) Mikarhi yin’wana, vanhu lava kuceteriwaka hi Sathana, va xungeta ku dlaya vagandzeri va Yehovha hileswi va alaka ku tshika ku N’wi tirhela. Mikarhi yin’wana loko rihanyo ra hina ri ri ekhombyeni, Sathana a nga ha tirhisa nkarhi wolowo leswaku a hi endla hi tlula milawu ya Yehovha Xikwembu. Madokodela kumbe maxaka lama nga riki Timbhoni ma nga hi sindzisa ku cheriwa ngati ku nga leswi lwisanaka ni nawu wa Xikwembu. Kumbexana munhu un’wana a nga hi wonga leswaku hi tirhisa vutshunguri lebyi nga fambisaniki ni Matsalwa.
17 Hambileswi hi nga laviki ku fa, ha swi tiva leswaku Yehovha a nge tshiki ku hi rhandza hambiloko ho fa. (Hlaya Varhoma 8:37-39.) Loko vanghana va Yehovha va fa, a nga va rivali naswona eka yena swi fana niloko va nga fanga. (Luka 20:37, 38) Wa swi navela ku va pfuxa. (Yobo 14:15) Swi n’wi koxe swo tala Yehovha “leswaku . . . [hi] kuma vutomi lebyi nga heriki.” (Yoh. 3:16) Ha swi tiva leswaku Yehovha u hi rhandza ni ku khathala ha hina ku fikela kwihi. Ematshan’weni yo fularhela Yehovha loko hi vabya kumbe loko hi xungetiwa ku dlayiwa, hi ya eka yena leswaku a hi nyika vutlhari, a hi chavelela ni ku hi tiyisa. Sweswo hileswi nga endla hi Valérie ni nuna wakwe.—Ps. 41:3.
Endla Ndzavisiso
Xana U Ni Ntsumi Leyi Ku Sirhelelaka?
Bibele a yi dyondzisi leswaku munhu un’wana ni un’wana u ni ntsumi leyi n’wi sirhelelaka. I ntiyiso leswaku Yesu u tshame a ku: “Tivoneleni leswaku mi nga n’wi languteli ehansi un’wana wa lava lavatsongo [vadyondzisiwa va Kreste]; hikuva ndza mi byela leswaku tintsumi ta vona etilweni mikarhi hinkwayo ti vona xikandza xa Tatana la nge tilweni.” (Matewu 18:10) Hambiswiritano, ematshan’weni yo ringanyeta leswaku un’wana ni un’wana u ni ntsumi leyi n’wi sirhelelaka, Yesu a a vula leswaku tintsumi ta khathala hi vadyondzisiwa vakwe. Hikokwalaho, vagandzeri va ntiyiso a va tihoxi ekhombyeni kutani va tibyela leswaku tintsumi ta Xikwembu ti ta va sirhelela.
Xana leswi swi vula leswaku tintsumi a ti va pfuni vanhu? Doo! (Pisalema 91:11) Van’wana va tshemba hi ku helela leswaku Xikwembu xa va sirhelela ni ku va kongomisa hi ku tirhisa tintsumi. Kenneth la boxiweke eka xihloko xo sungula i un’wana wa vona. Hambileswi hi nga taka hi nga vuli leswaku swi tano, swi nga endleka a tiyisile. Timbhoni ta Yehovha ti tala ku vona vumbhoni bya mpfuno wa tintsumi loko ti ri karhi ti chumayela. Hambiswiritano, leswi tintsumi ti nga vonakiki a hi nge swi koti ku vona leswaku Xikwembu xi ti tirhisa ku fikela kwihi leswaku ti pfuna vanhu eka swiyimo swo hambanahambana. Nilokoswiritano, hi va hi nga endli xihoxo loko hi nkhensa Lowa Matimba Hinkwawo eka mpfuno wihi ni wihi lowu a hi nyikaka wona.—Vakolosa 3:15; Yakobo 1:17, 18.
OCTOBER 7-13
LESWI HI SWI DYONDZAKA EBIBELENI | PISALEMA 92-95
Ku Tirhela Yehovha I Ndlela Leyinene Yo Hanya Vutomi!
Vantshwa, Xana Mi Tivekela Tipakani To Tirhela Yehovha?
5 Xivangelonkulu xo tivekela tipakani to tirhela Yehovha, i ku kombisa Yehovha leswaku ha ri khensa rirhandzu leri a hi kombisaka rona ni leswi a hi endlelaka swona. Mupisalema u hlamusele a ku: “I swinene ku nkhensa Yehovha . . . Oho Yehovha, u ndzi tsakisile hikwalaho ka ntirho wa wena; Ndzi huwelela hi ku tsaka hikwalaho ka mintirho ya mavoko ya wena.” (Ps. 92:1, 4) Tanihi muntshwa, anakanya hi swilo hinkwaswo leswi Yehovha a ku nyikeke swona. Vutomi bya wena, ripfumelo ra wena, vandlha ni ntshembo lowu u nga na wona hi vumundzuku. Ku rhangisa tipakani to tirhela Yehovha i ndlela yo kombisa ku tlangela mikateko leyi Xikwembu xi hi nyikaka yona naswona sweswo swi hi tshineta ekusuhi na xona.
I Mani Loyi A Lawulaka Miehleketo Ya Wena?
8 Yehovha i mutswari lonene naswona u lava leswaku vana vakwe va va ni vutomi lebyinene. (Esa. 48:17, 18) Hikwalaho u hi nyika misinya ya milawu leyi kongomisaka ndlela leyi hi faneleke hi tikhoma ha yona ni ku khoma van’wana ha yona. Etimhakeni toleto u lava leswaku hi tekelela ndlela leyi a ehleketaka ha yona ni leswi nga swa nkoka eka yena. Swoleswo a swi hi siveli swo karhi, kambe swi hi pfuna leswaku hi antswisa ni ku ndlandlamuxa ndlela leyi hi ehleketaka ha yona. (Ps. 92:5; Swiv. 2:1-5; Esa. 55:9) Swi hi pfuna ni ku endla swiboho leswi nga ta hi endla leswaku hi tsaka hi tlhela hi va ni mahanyelo lamanene. (Ps. 1:2, 3) I ntiyiso, ku ehleketa ku fana na Yehovha i swinene naswona swa pfuna!
Yehovha Xikwembu Xa Wena U Ku Teka U Ri Wa Nkoka!
18 Loko hi ya hi dyuhala, hi nga tiyiseka leswaku ka ha ri na swo tala leswi hi nga swi endlaka entirhweni wa Yehovha. (Ps. 92:12-15) Yesu u hi dyondzise leswaku ku nga khathariseki vuswikoti ni matimba lawa hi nga na wona, Yehovha wa swi tlangela hinkwaswo leswi hi swi endlaka entirhweni wakwe. (Luka 21:2-4) Hikwalaho, endla leswi nga ematimbeni ya wena. U nga swi kota, hi xikombiso, vulavula hi Yehovha, khongelela vamakwerhu naswona khutaza van’wana leswaku va tshama va tshembekile. Yehovha u ku teka tanihi mutirhikuloni, ku nga ri hikwalaho ka leswi u kotaka ku swi fikelela kambe hikwalaho ka leswi u n’wi yingisaka hi ku tirhandzela.—1 Kor. 3: 5-9.
Endla Ndzavisiso
‘Mawaku Ku Enta Ka Vutlhari . . . Bya Xikwembu!’
18 Xiya ndlela leyi muapostola Pawulo a ku hlamuselaka ha kona ku hlawuleka ka vutlhari bya Yehovha: “Mawaku ku enta ka rifuwo, vutlhari ni vutivi bya Xikwembu! Vuavanyisi bya xona a byi lavisiseki ni tindlela ta xona a ti landzerisiseki!” (Varhoma 11:33) Hi ku sungula ndzimana hi rihlamari leri nge “mawaku!” Pawulo u kombisa leswaku u khumbekile swinene—emhakeni leyi, u kombisa leswaku u hlamarile swinene. Rito ra Xigriki leri a ri tirhiseke ku vula “ku enta” ri yelana swinene ni rito leri nge “mugodi.” Hikwalaho, marito yakwe ma endla hi swi vona kahle hi mahlo ya mianakanyo. Loko hi anakanyisisa hi vutlhari bya Yehovha, swi fana ni loko hi honolele khele ro enta, ku nga xivandla lexi enteke swinene hi ndlela leyi nga pimekiki. (Pisalema 92:5) Xana sweswo a swi endli leswaku hi tivona hi ri ntshuri ntsena?
OCTOBER 14-20
LESWI HI SWI DYONDZAKA EBIBELENI | PISALEMA 96-99
“Twarisani Mahungu Lamanene”!
I Yini Mahungu Lamanene?
VAKRESTE va fanele va chumayela ‘mahungu lamanene ya mfumo’ hi ku byela van’wana ha wona, va hlamusela leswaku Mfumo i hulumendhe ya misava ya nkarhi lowu taka leyi nga ta fuma misava hi vululami. Kambe xiga lexi nge “mahungu lamanene” xi tlhela xi tirhisiwa hi tindlela tin’wana eBibeleni. Hi xikombiso, ku na lexi nge “mahungu lamanene ya ku ponisiwa” (Pisalema 96:2); “mahungu lamanene ya Xikwembu” (Varhoma 15:16); ni lexi nge “mahungu lamanene malunghana na Yesu Kreste.”—Marka 1:1.
Hi ku komisa, mahungu lamanene ma katsa ntiyiso hinkwawo lowu Yesu a vulavuleke ha wona ni lowu vadyondzisiwa vakwe va tsaleke ha wona. Emahlweni ko va a tlhandlukela etilweni, Yesu u byele valandzeri vakwe a ku: “Hikokwalaho fambani mi ya endla vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima, mi va dyondzisa ku hlayisa swilo hinkwaswo leswi ndzi mi leriseke swona.” (Matewu 28:19, 20) Kutani ntirho wa Vakreste va ntiyiso a hi ku byela van’wana hi Mfumo ntsena; kambe va fanele va tlhela va tikarhatela ku endla vadyondzisiwa.
Ku Ta Humelela Yini Hi Siku Ra Vuavanyisi?
Hilaha swi kombisiweke hakona eka xifaniso lexi nga exineneni, vanhu vo tala va anakanya leswaku hi Siku ra Vuavanyisi vanhu va tibiliyoni va ta tisiwa emahlweni ka xiluvelo xa Xikwembu leswaku va ta avanyisiwa hi ku ya hi swiendlo swa vona swa khale—van’wana va ta nyikiwa hakelo ya ku ya hanya etilweni kasi van’wana va ya xanisiwa etiheleni. Hambiswiritano, Bibele yi vula leswaku xikongomelo xa Siku ra Vuavanyisi i ku ntshunxa vanhu eka vuhomboloki lebyi nga kona. (Pisalema 96:13) Xikwembu xi hlawule Yesu leswaku a va Muavanyisi loyi a nga ta vuyetela vululami eka vanhu.—Hlaya Esaya 11:1-5; Mintirho 17:31.
Ku Rhula Ku Ringana Gidi Ra Malembe—Ni Le Ndzhaku Ka Wona!
18 Vuxaka byolebyo byo rhula byi kavanyetekile loko Sathana a kucetele vanhu leswaku va xandzukela Yehovha. Kambe ku sukela hi 1914 Mfumo wa Mesiya a wu teka magoza lama faneleke leswaku wu kondletela ku rhula ni vun’we. (Efe. 1: 9, 10) Hi nkarhi wa Mfumo wa Gidi ra Malembe, swilo swo hlamarisa leswi sweswi swi nga “voniwiki” swi ta endleka. Kutani ku ta fika “makumu,” ku nga ku hela ka Mfumo wa Kreste wa Gidi ra Malembe. Endzhaku ku ta endleka yini? Hambileswi Yesu a nyikiweke “vulawuri hinkwabyo . . . etilweni ni le misaveni,” a nga titlakusi. A nga tiyimiselanga ku teka xikhundlha xa Yehovha. Hi ku titsongahata u ta “nyiketa mfumo eka Xikwembu tlhelo Tata wa yena.” U ta tirhisa xikhundlha xa yena xo hlawuleka ni vulawuri bya yena “leswaku ku vangamisiwa Xikwembu.”—Mat. 28:18; Filp. 2:9-11.
19 Hi nkarhi wolowo, hinkwavo lava nga ta va va hanya emisaveni ehansi ka Mfumo wa Xikwembu va ta va va hetisekile. Va ta landzela xikombiso xa Yesu naswona leswi va titsongahataka, va ta tsakela ku amukela mfanelo ya Yehovha yo va fuma. Loko va kombisa leswaku va lava Yehovha a va fuma, va ta wu hlula ndzingo wo hetelela. (Nhlav. 20:7-10) Endzhaku ka sweswo, vaxandzuki hinkwavo, ku nga khathariseki leswaku i tintsumi kumbe i vanhu, va ta loviseriwa makumu. Hakunene wolowo wu ta va nkarhi wo tsakisa! Un’wana ni un’wana endyangwini wa Yehovha, etilweni ni laha misaveni u ta n’wi dzunisa naswona Yehovha u ta va “swilo hinkwaswo eka vanhu hinkwavo.”—Hlaya Pisalema 99:1-3.
Endla Ndzavisiso
it-2 E 994
Risimu
“Risimu lerintshwa” a ri humeleli eka Tipisalema ntsena kambe ri tlhela ri humelela eka buku leyi tsariweke hi Esaya ni le ka buku leyi tsariweke hi muapostola Yohane. (Ps 33:3; 40:3; 96:1; 98:1; 144:9; 149:1; Esa 42:10; Nhl 5:9; 14:3) Eka swiyimo swo hambanahambana loko ku kambisisiwa swiendlakalo swa xiga “risimu lerintshwa” ku kombisiwa leswaku a ri yimbeleriwa loko Yehovha a kombisa vuhosi byakwe evuakweni hinkwabyo. Hilaha swi vuriweke hakona hi ntsako eka Pisalema 96:10: “Yehovha i Hosi.” Ku kombisiwa ka vuhosi bya Yehovha ematilweni ni le misaveni i nhlokomhaka ya “risimu lerintshwa.”—Ps 96:11-13; 98:9; Esa 42:10, 13.
OCTOBER 21-27
LESWI HI SWI DYONDZAKA EBIBELENI | PISALEMA 100-102
Tlangela Rirhandzu Ra Yehovha Ro Tshembeka
Leswi Nga Ku Pfunaka U Lunghekela Ku Khuvuriwa
18 Ku rhandza Yehovha hi swona swa nkoka eka hinkwaswo. (Hlaya Swivuriso 3:3-6.) Loko u rhandza Xikwembu swinene u nga swi kota ku hlula mitlhontlho. Mikarhi yo tala Bibele yi vulavula hi rirhandzu lerikulu leri Yehovha a nga na rona eka malandza yakwe. Hikwalaho ka rirhandzu leri, a nge pfuki a fularhele malandza yakwe kumbe a tshika ku ma rhandza. (Ps. 100:5) U endliwe hi xifaniso xa Xikwembu. (Gen. 1:26) U nga ri kombisa njhani rirhandzu ro tano?
19 Sungula hi ku va la khensaka. (1 Tes. 5:18) Siku rin’wana ni rin’wana tivutise leswi, ‘Yehovha u ndzi endlele yini ku kombisa leswaku wa ndzi rhandza?’ Tiyiseka leswaku u khensa Yehovha loko u khongela naswona u swi boxa hi ku kongoma leswi a ku endleleke swona. Swilo leswi Yehovha a ku endleleke swona swi teke ku ri ndlela yakwe yo ku byela leswaku wa ku rhandza, ku nga leswi muapostola Pawulo na yena a swi xiyeke hi Yehovha. (Hlaya Vagalatiya 2:20.) Tivutise leswi, ‘Xana ndzi lava ku kombisa Yehovha leswaku ndza n’wi rhandza hilaha ku fanaka?’ Ku rhandza Yehovha swi ta ku pfuna u ya emahlweni u hlula mitlhontlho ni ku papalata miringo. Swi ta ku pfuna leswaku u ya emahlweni u gandzela Yehovha ni ku kombisa Tata wa wena wa le tilweni leswaku wa n’wi rhandza siku ni siku.
“Tlharihani Mi Va Ni Vuxiyaxiya!”
10 Makhombo man’wana lama hi faneleke hi ma papalata ma katsa ku tlanga hi rirhandzu, ku dakwa, makolo, mavulavulelo lama tlhavaka, ku hlalela vuhungasi lebyi nga ni madzolonga, swifaniso leswi pfuxaka ku navela timhaka ta masangu ni swin’wana swo fana ni sweswo. (Ps. 101:3) Nala wa hina Diyavulosi, u tshama a ri karhi a lava tindlela to onha vuxaka bya hina na Yehovha. (1 Pet. 5:8) Loko hi nga swi xiyi, Sathana a nga byala etimbilwini ta hina ni le miehleketweni mbewu ya mona, ku nga tshembeki, makwanga, rivengo, ku tikukumuxa ni ku va ni xikhomela. (Gal. 5:19-21) Loko swa ha sungula, swi nga vonaka onge leswi a swi na khombo. Kambe loko hi nga swi papalati hi ku hatlisa, swi ta mila ku fana ni ximilana xa chefu naswona swi nga vanga khombo.—Yak. 1:14, 15.
Xana U Ta Swi Yingisa Switsundzuxo Swa Yehovha Leswi Nga eRivaleni?
7 Hi fanele hi endla yini leswaku hi papalata vadyondzisi va mavunwa? A hi fanelanga hi vulavula na vona kumbe hi va rhamba emakaya ya hina. Nakambe a hi fanelanga hi hlaya tibuku ta vona, hi va hlalela eka thelevhixini, hi hlaya leswi va swi tsaleke eka Internet kumbe hi tsala mavonelo ya hina malunghana ni leswi va swi tsaleke eka Internet. Ha yini hi tiyimisele ku va papalata? Xo sungula, hileswi hi rhandzaka “Xikwembu xa ntiyiso.” Hikwalaho, a hi swi lavi ku yingisa tidyondzo ta mavunwa leti lwisanaka ni ntiyiso lowu kumekaka eRitweni ra Xikwembu. (Ps. 31:5; Yoh 17:17) Nakambe hi rhandza nhlengeletano leyi Yehovha a yi tirhisaka ku hi dyondzisa ntiyiso lowu hlamarisaka. I nhlengeletano ya Yehovha leyi hi dyondziseke vito leri nge Yehovha ni leswi ri vulaka swona, xikongomelo xakwe hi misava, leswi endlekaka eka hina loko hi fa swin’we ni ntshembo wa ku pfuxiwa ka vafi. Xana wa ha yi tsundzuka ndlela leyi a wu tsake ha yona loko u dyondza swilo leswi ro sungula swin’we ni tidyondzo tin’wana ta le Bibeleni? Hikwalaho u nga pfumeleli mavunwa ya vadyondzisi va mavunwa ma ku endla u xandzukela nhlengeletano leyi ku dyondziseke tidyondzo teto.—Yoh 6:66-69.
8 Ku nga khathariseki leswi vadyondzisi va mavunwa va swi vulaka, a hi nge va landzeli! A hi na xona xivangelo xo yingisa vanhu lava fanaka ni swihlovo leswi nga riki na mati. Vanhu lava va va yingisaka va ta hela matimba. Hi tiyimiserile ku tshama hi tshembekile eka Yehovha ni le ka nhlengeletano yakwe. Nhlengeletano leyi a yi si tshama yi hi khomisa tingana naswona minkarhi hinkwayo yi hi nyika mati yo tala lama tengeke ya ntiyiso lowu humaka eRitweni ra Xikwembu.—Esa. 55:1-3; Mat. 24:45-47.
Endla Ndzavisiso
it-2 E 596
Gumba
Loko Gumba ri xurhile, ri tala ku hahela ekule ri ya tshama roxe lerova mi nga ri twela vusiwana loko mi ri vona, ri ova nhloko ri yi pfala hi timpapa ta rona ri nga tshukatshuki lerova loko u ri ekule u nga ehleketa leswaku i ribye ro basa. Nyenyana leyi ya heta tiawara yi tshamise sweswo, yi va yi lo dzoo! yi nga endli nchumu ku fana ni mupisalema loyi a vulaka ku a a lo punavuna hi gome loko a tsala a ku: “Ndzi fana ni gumba ra le mananga.” (Ps 102:6) Laha “mananga” a ku vuriwi masavasi kambe ku vuriwa ndhawu leyi nga le kule ni vanhu kumbe ndhawu leyi nga tala mati. Hi mikarhi ya tinguva tin’wana, magumba ma va ma ha tshama etindhawini leti nga tala mati ta le n’walungwini wa Nkova wa Yordani. Ku ni tinxaka tinharhu ta magumba eIsrayele. Leri tolovelekeke ngopfu i gumba ro basa ra le vuxeni (Pelecanus onocrotalus); gumba ra le Dalmatia (Pelecanus crispus) ni gumba ra nhlana wa pinki (Pelecanus rufescens) a ma tali ku vonaka.
Gumba ri hlawula ku tshama endhawini leyi tlhumeke, laha ri nga ta ka ringa kavanyetiwi hi munhu. Kwalaho ri tshikela ri tlhela ri tlhotlhorhela kona endzhaku ko khoma tinhlampfi. Hikwalaho ka leswi ri rhandzaka ku tshama roxe etindhawini leti nga le kule ni vanhu, nyenyana leyi yi tirhisiwa eBibeleni tanihi mfungho wo onhetela. Ku kombisa leswaku tiko ra Edomu a ri ta onheteriwa, Esaya u profete ka ha ri emahlweni leswaku gumba a ri ta teka vulawuri etikweni rero. (Esa 34:11) Sofaniya u profete leswaku magumba a ma ta tshama exikarhi ka tiphuphu ta Ninivha ku kombisa leswaku a wu ta mbundzumuxiwa hi ku helela naswona a ku nga ha ta tshama vanhu.—Sf 2: 13, 14.
OCTOBER 28–NOVEMBER 3
LESWI HI SWI DYONDZAKA EBIBELENI | PISALEMA 103-104
Wa Tsundzuka “Leswaku Hi Ntshuri”
Tekelela Yehovha—Hi Ku Va La Anakanyelaka
5 Leswi Yehovha a titsongahataka naswona a nga ni ntwelavusiwana swi endla leswaku a anakanyela. Hi xikombiso, Yehovha u kombise leswaku wa titsongahata loko a lava ku lovisa vanhu vo homboloka va le Sodoma. Hi ku tirhisa tintsumi, Yehovha u lerise Lota wanuna wo lulama leswaku a balekela etintshaveni. Lota a a chava ku ya kwale. Kutani u kombelele yena ni ndyangu wakwe leswaku va balekela eSowara, ku nga muti lowutsongo lowu na wona a wu fanele wu lovisiwa. Yehovha a a ta va a sindzise Lota leswaku a yingisa swiletelo Swakwe hilaha swi nga hakona. Hambiswiritano, Yehovha a nga n’wi alelanga Lota hambileswi ku endla tano a swi vula leswaku A A fanele A ponisa muti wa Sowara. (Gen. 19:18-22) Endzhaku ka malembe yo tala, Yehovha u twele vanhu va le Ninivha vusiwana. U rhume muprofeta Yonasi ku ya byela vanhu vo homboloka va le Ninivha leswaku vona ni muti wa vona a va ta lovisiwa. Kambe loko Vaninivha va hundzuka, Yehovha u va twele vusiwana naswona a nga wu lovisanga muti.—Yon. 3:1, 10; 4:10, 11.
Titshege Hi Yehovha Ku Fana Na Samsoni
16 Hambileswi Samsoni a kumeke vuyelo byo vava hikwalaho ka xihoxo xakwe, a nga tshikanga ku endla ku rhandza ka Yehovha. Hambiloko ho endla xihoxo ivi swi lava leswaku hi tshinyiwa kumbe hi lahlekeriwa hi vutihlamuleri lebyi a hi ri na byona evandlheni, a hi fanelanga hi tshika ku tirhela Yehovha. Tsundzuka leswaku Yehovha a nga hi lahleli mavoko. (Ps. 103:8-10) Hambiloko hi endle swihoxo, Yehovha a nga tlhela a hi tirhisa ku fana na Samsoni.
17 Xiya ntokoto wa makwerhu Michael la ha riki muntshwa. A a ri na swo tala swo swi endla entirhweni wa Yehovha, a a ri nandza wa vutirheli tlhelo phayona ra nkarhi hinkwawo. Kambe lexi twisaka ku vava, u endle xihoxo lexi endleke a nga ha vi nandza naswona a nga ha vi phayona. U ri: “Loko leswi swi nga si endleka, swilo a swi ndzi fambela kahle entirhweni wa Yehovha. Kutani hi ku copeta ka tihlo sweswo swi kume ndzhuti. A ndzi swi tiva leswaku Yehovha a nge ndzi lahli kambe a ndzi tivutisa loko vuxaka bya mina na yena byi ta tlhela byi fana ni le ku sunguleni kumbe loko ndzi ta swi kota ku tlhela ndzi va ni vutihlamuleri evandlheni.”
18 Lexi tsakisaka, Michael a nga lan’wanga. U ri: “Ndzi rhangise ku lulamisa vuxaka bya mina na Yehovha hi ku va ndzi khongela eka yena nkarhi ni nkarhi, ndzi dyondza ni ku anakanyisisa.” Hi ku famba ka nkarhi Michael u tlhele a faneleka ku tirhisiwa evandlheni. Sweswi i nkulu tlhelo phayona ra nkarhi hinkwawo. U ri: “Ndlela leyi ndzi seketeriweke ni ku khutaziwa hayona, ngopfungopfu hi vakulu swi ndzi pfunile ku xiya leswaku Yehovha wa ha ndzi rhandza. Sweswi ndzi kota ku tlhela ndzi tirha evandlheni ndzi nga biwi hi ripfalo. Leswi ndzi endlekeleke swi ndzi dyondzise leswaku Yehovha u rivalela un’wana ni un’wana la hundzukeke hi mbilu hinkwayo.” Na hina hi nga tiyiseka leswaku Yehovha u ta hi tirhisa ni ku tlhela a hi katekisa hambiloko hi endla swihoxo, ntsena loko hi endla leswi hi nga swi kotaka leswaku hi cinca mahanyelo ya hina ni ku ya emahlweni hi titshega hi yena.—Ps. 86:5; Swiv. 28:13.
U Nga Swi Fikelela Leswi U Lavaka Ku Swi Antswisa Eka Ndlela Leyi U Gandzelaka Yehovha Hayona
2 Loko ku ri ni leswi u kunguhateke ku swi fikelela kambe u nga si swi fikelela, tiyiseka leswaku a wu mutsandzeki. Hambiloko u kunguhate ku fikelela nchumu lowutsongo, mikarhi yo tala swi lava nkarhi ni ku tirha hi matimba. Leswi u lavaka ku fikelela leswi u swi kunguhateke, swi kombisa leswaku u teka vuxaka bya wena na Yehovha byi ri bya risima naswona u lava ku n’wi nyika swa xiyimo xa le henhla. A hi ya hava matshalatshala ya wena eka Yehovha. I ntiyiso leswaku a nga langutelanga leswaku u n’wi nyika leswi u nga kotiki ku swi endla. (Ps. 103:14; Mik. 6:8) Kutani kunguhata leswi u nga kotaka ku swi fikelela hi ku ya hi xiyimo xa wena. Loko u endle tano, u nga endla yini leswaku u swi fikelela? A hi buleni hi swiringanyeto swin’wana.
Endla Ndzavisiso
Matimba Yo Tumbuluxa—Ya “Muendli Wa Tilo Ni Misava”
18 Xana hi dyondza yini eku tirhiseni ka Yehovha matimba ya yena yo tumbuluxa? Hi hlamarisiwa hi mixakaxaka ya leswi a swi tumbuluxeke. Mupisalema un’wana u te: “Mitirho ya wena yi tele swinene Yehovha Xikwembu xanga! . . . Misava yi tele hi swilo leswi u swi endleke.” (Pisalema 104:24) Hakunene swi tano! Lava dyondzeleke ntivovutomi va kume leswaku ku ni swilo leswi hanyaka emisaveni swo tlula miliyoni; kambe mavonelo ya vona ma hambana hi ku ya hi ku ku engeteleke timiliyoni tingani. Munhu loyi a kotaka ku endla swo karhi a nga ha helela hi vuswikoti byo endla swilo swintshwa. Hilaha ku hambaneke, Yehovha u ni matimba yo tisungulela swilo ni ku tumbuluxa swilo swintshwa swo hambanahambana, kunene swi le rivaleni leswaku a nga heleriwi.