“Tlharihani Mi Va Ni Vuxiyaxiya”

1. Yesu u va byele yini vadyondzisiwa vakwe hi nkarhi wa makumu naswona u va lemukise yini?

EMASIKWINI ma nga ri mangani Yesu a nga si dlayiwa, vadyondzisiwa va mune va n’wi vutise va ku: “Xi ta va xihi xikombiso . . . xa ku fika ka makumu?” (Mat. 24:3) Swi nga endleka vadyondzisiwa volavo a va tivutisa leswaku a va ta swi tiva njhani loko muti wa Yerusalema ni tempele swi ri ekusuhi ni ku lovisiwa. Loko a va hlamula, Yesu a nga vulavulanga hi ku lovisiwa ka muti wa Yerusalema ni tempele ntsena kambe u tlhele a vulavula hi “ku fika ka makumu” ku nga nkarhi lowu hi hanyaka eka wona. Mayelana ni nkarhi wa makumu, Yesu u te: “Mayelana ni siku ra kona kumbe nkarhi a ku na munhu loyi a swi tivaka, hambi ku ri tintsumi etilweni kumbe N’wana, kambe swi tiviwa hi Tatana.” Kutani u lemukise vadyondzisiwa vakwe hinkwavo leswaku ‘va tshama va xalamukile’ ni ku ‘tshama va rindzile.’—Mar. 13:32-37.

2. Hikwalahokayini a swi ri swa nkoka leswaku Vakreste vo sungula va tshama va rindzile?

² Vakreste vo sungula va Vayuda a va fanele va tshama va rindzile hikuva a swi khumba vutomi bya vona. Yesu u byele valandzeri vakwe swilo leswi a swi ta va pfuna va vona loko nkarhi wa ku lovisiwa ka muti wa Yerusalema ni tempele wu fika. U te: “Loko mi vona muti wa Yerusalema wu rhendzeriwe hi masocha, swi tiveni leswaku nkarhi wa ku lovisiwa ka wona wu tshinele.” Hi nkarhi wolowo, a va fanele va yingisa xilemukiso xa Yesu kutani “va balekel[a] etintshaveni.” (Luka 21:20, 21) Lava yingiseke va ponile loko muti wa Yerusalema wu lovisiwa hi Varhoma.

3. Hi ta bula hi yini eka nhlokomhaka leyi?

³ Namuntlha hi hanya emikarhini ya makumu yo homboloka. Hikwalaho na hina hi fanele hi tlhariha naswona hi tshama hi rindzile. Eka nhlokomhaka leyi, hi ta bula hi ndlela leyi hi nga ringaniselaka hayona loko hi ri karhi hi languta swilo leswi endlekaka emisaveni hinkwayo, ndlela leyi hi nga tisirhelelaka hayona ni ndlela leyi hi nga wu tirhisaka hayona nkarhi lowu saleke.

RINGANISELA LOKO U RI KARHI U LANGUTA SWIENDLAKALO SWA MISAVA

4. Hikwalahokayini hi fanele hi swi tekela enhlokweni swiendlakalo swa misava leswi hetisisaka vuprofeta bya Bibele?

⁴ Hi na xivangelo lexi twalaka xo lava ku vona ndlela leyi swiendlakalo swa misava swi hetisisaka vuprofeta bya Bibele. Hi xikombiso, Yesu u hi byele hi swilo leswi a swi ta endleka leswi a swi ta hi pfuna hi tiva loko makumu ya misava ya Sathana ya ri kwala nyongeni. (Mat. 24:3-14) Muapostola Petro u hi khutaze leswaku hi byi tekela enhlokweni vuprofeta lebyi hetisekaka leswaku ripfumelo ra hina ri ta tshama ri tiyile. (2 Pet. 1:19-21) Buku yo hetelela ya Bibele yi sungula hi marito lama nge: “Leyi i nhlavutelo ya Yesu Kreste, leyi Xikwembu xi n’wi nyikeke yona, leswaku a komba malandza yakwe swilo leswi faneleke swi endleka ku nga ri khale.” (Nhlav. 1:1) Hikwalaho, swa hi tsakisa ku tiva leswi endlekaka emisaveni ni ndlela leyi swi nga ha hetisisaka vuprofeta bya Bibele hayona. Hi nga ha tsakela ku bula ni van’wana hi swiendlakalo leswi.   

5. Hi fanele hi papalata yini kambe hi fanele hi endla yini? (Nakambe vona swifaniso.)

⁵ Loko hi bula ni van’wana hi vuprofeta bya Bibele, hi fanele hi papalata ku ehleketelela leswaku ku ta endleka yini. Hikwalahokayini? Hikuva a hi lavi ku vula leswi nga onhaka vun’we evandlheni. Hi xikombiso, hi nga ha twa vafumi va misava leyi va vulavula hi ndlela leyi va nga lunghisaka xiyimo xo karhi ni ku endla leswaku ku va ni ku rhula ni nsirhelelo. Ematshan’weni yo kumbetela leswaku leswi va swi vuleke swi hetisisa vuprofeta lebyi nga eka 1 Vatesalonika 5:3, hi fanele hi fambisana ni matwisiselo lama nga enkarhini. Loko mabulo ya hina ma fambisana ni leswi humesiweke hi nhlangano wa Yehovha, hi endla leswaku vandlha ri tshama ri ri ni vun’we eka “ndlela leyi [ri] ehleketaka ha yona.”—1 Kor. 1:10; 4:6.

6. Hi nga dyondza yini eka 2 Petro 3:11-13?

⁶ Hlaya 2 Petro 3:11-13. Muapostola Petro u hi pfuna leswaku hi va ni langutelo lerinene loko hi ri karhi hi kambisisa vuprofeta bya Bibele. U hi khutaza leswaku hi “anakanyisisa hi siku ra Yehovha.” Hikwalahokayini? A ho lava ku tiva “siku ra kona ni nkarhi” lowu Yehovha a nga ta tisa Armagedoni ntsena kambe hi lava ku tirhisa nkarhi lowu saleke leswaku hi ‘tikhoma hi ndlela yo kwetsima ni ku tinyiketela eka Xikwembu.’ (Mat. 24:36; Luka 12:40) Hi marito man’wana, hi lava ku tikhoma kahle mikarhi hinkwayo ni ku tiyiseka leswaku matshalatshala lama hi ma endlaka entirhweni wa Yehovha ma kombisa leswaku ha n’wi rhandza swinene. Leswaku hi endla tano, hi fanele hi tivonela.

SWI VULA YINI KU VA NI VUXIYAXIYA?

7. Hi swi kombisa njhani leswaku hi ni vuxiyaxiya? (Luka 21:34)

⁷ Yesu u byele vadyondzisiwa vakwe leswaku va tivonela ku nga ri eka swiendlakalo swa misava ntsena kambe ni le ka vona vini. Xilemukiso lexi tsariweke eka Luka 21:34 xi yi veka erivaleni mhaka leyi. (Yi hlaye.) Xiya marito ya Yesu lama nge: “Tivoneleni.” Loko munhu a tivonela hiloko a ri ni vuxiyaxiya eka makhombo lama nga onhaka vuxaka bya yena na Yehovha naswona u endla swo karhi leswaku a ma papalata. Hi ndlela yoleyo, u tshama a ri karhi a rhandziwa hi Xikwembu.—Swiv. 22:3; Yuda 20, 21.

8. I yini leswi muapostola Pawulo a swi tsundzuxeke Vakreste?

⁸ Muapostola Pawulo u tsundzuxe Vakreste leswaku va tivonela. Hi xikombiso u byele Vakreste va le Efesa a ku: “Tshamani mi ri karhi mi languta leswaku ndlela leyi mi fambaka ha yona a yi fani ni ya vanhu lava nga tlharihangiki kambe yi fana ni ya vanhu vo tlhariha.” (Efe. 5:15, 16) Vuxaka bya hina na Xikwembu byi tshama byi ri karhi byi hlaseriwa kutani Bibele yi hi tsundzuxa leswaku hi “[twisisa] leswi Yehovha a swi rhandzaka” leswaku hi kota ku tisirhelela eka mihlaselo ya Sathana.—Efe. 5:17.

9. Xana hi nga ku twisisa hi ndlela yihi ku rhandza ka Yehovha?

⁹ Bibele a yi hi kombi khombo rin’wana ni rin’wana leri nga onhaka vuxaka bya hina na Yehovha. Mikarhi yin’wana hi fanele hi endla swiboho etimhakeni leti nga boxiwangiki hi ku kongoma eMatsalweni. Leswaku hi endla swiboho swa vutlhari, swi lava hi twisisa “leswi Yehovha a swi rhandzaka.” Hi nga endla tano hi ku dyondza Rito ra Xikwembu ni ku anakanyisisa ha rona nkarhi ni nkarhi. Loko hi ya hi twisisa ku rhandza ka Yehovha ni ku tikarhatela ku “anakanya ku fana na Kreste,” hi ta endla swilo ku ‘fana ni vanhu vo tlhariha’ hambiloko ku nga ri na nawu lowu kongomeke wa leswi hi faneleke hi swi endla. (1 Kor. 2:14-16) Swa olova ku vona makhombo man’wana kasi man’wana a swi olovi.

10. Hi wahi makhombo man’wana lama hi faneleke hi ma papalata?

¹⁰ Makhombo man’wana lama hi faneleke hi ma papalata ma katsa ku tlanga hi rirhandzu, ku dakwa, makolo, mavulavulelo lama tlhavaka, ku hlalela vuhungasi lebyi nga ni madzolonga, swifaniso leswi pfuxaka ku navela timhaka ta masangu ni swin’wana swo fana ni sweswo. (Ps. 101:3) Nala wa hina Diyavulosi, u tshama a ri karhi a lava tindlela to onha vuxaka bya hina na Yehovha. (1 Pet. 5:8) Loko hi nga swi xiyi, Sathana a nga byala etimbilwini ta hina ni le miehleketweni mbewu ya mona, ku nga tshembeki, makwanga, rivengo, ku tikukumuxa ni ku va ni xikhomela. (Gal. 5:19-21) Loko swa ha sungula, swi nga vonaka onge leswi a swi na khombo. Kambe loko hi nga swi papalati hi ku hatlisa, swi ta mila ku fana ni ximilana xa chefu naswona swi nga vanga khombo.—Yak. 1:14, 15.

11. Hi rihi khombo leri nga vonakiki hi ku olova leri hi faneleke hi ri papalata naswona hikwalahokayini?

¹¹ Khombo rin’wana leri nga vonakiki hi ku olova i vanghana vo biha. Xiya xikombiso lexi. U tirha ni munhu un’wana la nga riki Mbhoni entirhweni wo tihanyisa. U n’wi kombisa musa ni ku tlhela u n’wi pfuna hileswi u lavaka leswaku a xixima Timbhoni ta Yehovha. Nkarhi wun’wana u nga tlhela u pfumela leswaku mi dya swin’we hi nkarhi wo wisa. Swi nga si ya kwihi, nkarhi ni nkarhi se mi dya swin’we. Mikarhi yin’wana mabulo yakwe ya voyamela eka ku tikhoma ku biha leswi wena eku sunguleni u ringetaka ku swi honisa. Hi ku famba ka nkarhi, u tolovela bulo ro tano lerova a swa ha ku nyangatsi. Kutani siku rin’wana mutirhikuloni wa ku rhamba leswaku mi ya tima torha loko mi chayisa naswona wa pfumela. Eku heteleleni, u sungula ku ehleketa ku fana ni mutirhikuloni. Loko swi te tani, xana swi ta ku tekela nkarhi wo tanihi kwihi leswaku u sungula ku endla swilo ku fana na yena? I ntiyiso leswaku hi ni musa naswona hi xixima vanhu hinkwavo kambe hi fanele hi tsundzuka leswaku hi ta kuceteriwa ngopfu hi lava hi hlawulaka ku heta nkarhi wa hina na vona. (1 Kor. 15:33) Loko hi va ni vuxiyaxiya hilaha Yesu a hi khutazeke hakona, hi ta papalata ku endla xinghana ni lava nga hanyiki hi milawu ya Yehovha. (2 Kor. 6:15) Hi ta vona khombo kutani hi ri papalata.   

WU TIRHISE KAHLE NKARHI WA WENA

12. I yini leswi vadyondzisiwa va Yesu a va fanele va swi endla loko va ha rindzele leswaku makumu ma fika?

¹² Vadyondzisiwa va Yesu a va nga fanelanga va khondla mavoko loko va ha rindzele leswaku makumu ma fika. Yesu u va nyike ntirho. U va lerise leswaku va chumayela mahungu lamanene “eYerusalema, etikweni hinkwaro ra Yudiya ni le Samariya ni ku ya fika emakumu ka misava.” (Mit. 1:6-8) Ntirho wolowo a wu ri wukulu! Hi ku va va tinyiketele eka ntirho wolowo, va tirhise nkarhi wa vona kahle.

13. Hikwalahokayini hi fanele hi wu tirhisa kahle nkarhi wa hina? (Vakolosa 4:5)

¹³ HIaya Vakolosa 4:5. Leswaku hi va ni vuxiyaxiya, swi lava hi kambisisa ndlela leyi hi wu tirhisaka hayona nkarhi wa hina. “Swiendlakalo leswi nga languteriwangiki” swi nga hi wela hinkwerhu. (Ekl. 9:11) Hi nga ha fa swi nga languteriwanga.

14-15. Hi nga wu tirhisa njhani kahle nkarhi wa hina? (Vaheveru 6:11, 12) (Nakambe vona xifaniso.)

¹⁴ Hi nga wu tirhisa kahle nkarhi wa hina hi ku endla ku rhandza ka Yehovha ni ku tiyisa vuxaka bya hina na yena. (Yoh. 14:21) Hi fanele hi ‘tiya, hi nga tsekatsekisiwi, hi tshama hi ri na swo tala swo swi endla entirhweni wa Hosi.’ (1 Kor. 15:58) Hambiloko ho fa kumbe makumu ya misava leyi yo homboloka ma fika, a hi nge tisoli.—Mat. 24:13; Rhom. 14:8.

¹⁵ Namuntlha, Yesu u ya emahlweni a kongomisa vadyondzisiwa vakwe loko va chumayela hi Mfumo wa Xikwembu emisaveni hinkwayo. U endle leswi a swi tshembiseke. Hi ku tirhisa nhlangano wa Yehovha, Yesu u hi letela ndlela leyi hi faneleke hi chumayela hayona ni ku hi nyika switirhisiwa leswi hi swi lavaka leswaku hi chumayela mahungu lamanene. (Mat. 28:18-20) Loko hi gingiriteka entirhweni wa hina wo chumayela ni wo dyondzisa, hi va hi endla leswi Yesu a swi languteleke eka hina ni ku va ni vuxiyaxiya loko ha ha rindzele Yehovha leswaku a herisa misava leyi. Hi ku tirhisa xitsundzuxo lexi kumekaka eka Vaheveru 6:11, 12, hi khomelela swi tiya eka ntshembo wa hina “ku ya fika emakumu.”—Yi hlaye.

16. Hi tiyimisele ku endla yini?

¹⁶ Yehovha u veke siku ni nkarhi lowu a nga ta herisa misava ya Sathana ha wona. Loko siku rero ri fika, u ta hetisisa vuprofeta hinkwabyo lebyi a byi tsaleke eRitweni rakwe. Loko swa ha ri tano, mikarhi yin’wana swi nga ha vonaka onge makumu ya misava leyi ma hlwela ku fika. Hambiswiritano, siku ra Yehovha ‘a ri nge hlweli!’ (Hab. 2:3) Hikwalaho onge hi nga tiyimisela ku “tshama [hi] rindzele Yehovha,” hi “rindzela Xikwembu [xa hina] lexi . . . ponisaka.”—Mik. 7:7.