Ku Va Ni Ku Rhula Hambiloko Ku Ri Ni Nyimpi Ni Madzolonga Ya Swa Tipolitiki
Gary loyi eku sunguleni a ri socha, u ri: “Loko ndzi nga si dyondza Bibele a ndzi nga swi twisisi leswaku hikwalahokayini ku ri ni vubihi, ku nga ri na vululami naswona ku ri ni madzolonga emisaveni. Kambe sweswi ndzi ni ku rhula ka mianakanyo. Ndza swi tiva leswaku Yehovha Xikwembu u ta endla misava yi va ndhawu leyi hlayisekeke.”
Va tele lava va titwaka ku fana na Gary. Xiya ndlela leyi Bibele yi pfuneke van’wana hayona.
BIBELE YI RI: “U lulamile, wena Yehovha, naswona u lunghekele ku rivalela.”—Pisalema 86:5.
NDLELA LEYI SWESWO SWI PFUNAKA HAYONA: “Ndzimana leyi yi ndzi tiyisekisa leswaku Yehovha u ni ntwelavusiwana. Ndza swi tiva leswaku u tiyimisele ku ndzi rivalela eka hinkwaswo leswi endlekeke loko ndza ha katseka enyimpini.”—Wilmar wa le Colombia.
BIBELE YI RI: “Ndzi tumbuluxa matilo lamantshwa ni misava leyintshwa; swilo swa khale swi ta rivariwa, naswona a swi nge he ti emiehleketweni.”—Esaya 65:17.
NDLELA LEYI SWESWO SWI PFUNAKA HAYONA: “Leswi ndzi langutaneke na swona enyimpini, swi ndzi vangele ntshikilelo naswona sweswi ndzi ni ntshikilelo wa mianakanyo. Kambe tsalwa leri, ri ndzi tsundzuxa leswaku ku nga ri khale Yehovha u ta endla ndzi rivala swilo hinkwaswo swo biha leswi ndzi endlekeleke. A ndzi nge he swi tsundzuki nikatsongo. Mayana nyiko yo xonga swonghasi!”—Zafirah wa le United States.
BIBELE YI RI: “Lowo lulama u ta hluka hi nkarhi wa ku fuma ka yona, ku ta va ni ku rhula kukondza n’weti wu nga ha vi kona.”—Pisalema 72:7.
NDLELA LEYI SWESWO SWI PFUNAKA HAYONA: “Ndzi ehleketa hi marito wolawo mikarhi hinkwayo. Ku nga ri khale, nyimpi ni swilo hinkwaswo leswi yi swi vangaka swi ta herisiwa naswona a hi nge he karhateki hi vuhlayiseki bya vanhu lava hi va rhandzaka.”—Oleksandra wa le Ukraine.
BIBELE YI RI: “Vanhu va n’wina lava nga fa va ta tlhela va hanya. . . . Pfukani, mi ba nkulungwana, n’wina lava tshamaka entshurini!”—Esaya 26:19.
NDLELA LEYI SWESWO SWI PFUNAKA HAYONA: “Vo tala endyangwini wa ka hina va dlayiwile hi nkarhi lowu rixaka rin’wana ri dlayeke rixaka ra Matutsi. Kambe ndzimana leyi ya ndzi tiyisekisa leswaku ndzi ta tlhela ndzi va vona. Ndzi swi langutele hi mahlongati ku va twa va tsakile loko va pfuxiwa eku feni!”—Marie wa le Rwanda.
BIBELE YI RI: “Ku sele nkarhinyana leswaku lavo homboloka va herisiwa . . . Kambe lavo rhula va ta tshama emisaveni, va ta tsaka swinene hikuva ku ta va ni ku rhula lokukulu.”—Pisalema 37:10, 11.
NDLELA LEYI SWESWO SWI PFUNAKA HAYONA: “Hambileswi nyimpi se yi heleke, vanhu a va kombisiwi vululami naswona ka ha ri na vanhu vo homboloka. Tindzimana leti ti ndzi tiyisile swinene. Yehovha u vona hinkwaswo naswona wa xi twisisa xiyimo xa mina. U tshembisa leswaku ku nga ri khale u ta herisa swilo hinkwaswo swo biha naswona a swi nge he tsundzukiwi.”—Daler wa le Tajikistan.
Vanhu lava ku buriweke ha vona eka magazini lowu, i van’wana va timiliyoni ta Timbhoni ta Yehovha lava kumeke ku rhula hi ku pfuniwa hi Bibele. Va dyondze ku hlula rivengo leri vangiweke hi rixaka, ndhawu ni ku hambana ka mindhavuko. (Vaefesa 4:31, 32) Timbhoni ta Yehovha a ti katseki eka madzolonga ni le ka swa tipolitiki.—Yohane 18:36.
Timbhoni ta Yehovha ti tlhela ti kuma nseketelo eka vamakwavo lava rhandzekaka emisaveni hinkwayo. (Yohane 13:35) Hi xikombiso, Oleksandra, loyi ku buriweke ha yena eku sunguleni u boheke ku baleka ni makwavo va ya etikweni rin’wana hikwalaho ka nyimpi. U ri: “Loko hi fika etikweni rero, hi kume leswaku Timbhoni ta kwalaho a ti rindzele ku hi amukela. Ndlela leyi va hi seketeleke hayona yi hi pfune ku tolovela ku hanya etikweni lerintshwa tanihi vahlapfa.”
Ha ku rhamba leswaku u va kona etinhlengeletanweni ta hina ta vandlha laha hi dyondzaka hi ku rhula ka le Bibeleni ni ndlela leyi hi nga hanyaka hakona. Nghena eka jw.org leswaku u kuma Holo ya Mfumo leyi nga ekusuhi na wena kumbe ku kombela dyondzo ya Bibele ya mahala ni wun’wana wa Timbhoni ta Yehovha laha mi nga ta tirhisa nkandziyiso wa Tiphine Hi Vutomi Hilaha Ku Nga Heriki