Swivuriso 16:3—“Titshege Hi YEHOVHA Eka Swilo Hinkwaswo Leswi U Swi Endlaka”

“Titshege hi Yehovha eka swilo hinkwaswo leswi u swi endlaka, kutani makungu ya wena ma ta humelela.”—Swivuriso 16:3, Bibele Ya Matsalwa Yo Kwetsima Ya Misava Leyintshwa.

“Loko u endla xilo kombela HOSI Xikwembu xi ku pfuna, kutani makungu ya wena ma ta katekisiwa.”—Swivuriso 16:3, Bibele Ya Mahungu Lamanene.

Leswi Swivuriso 16:3, Yi Vulaka Swona

Xivuriso lexi xi tiyisekisa lava gandzelaka Xikwembu xa ntiyiso leswaku makungu ya vona ma ta humelela loko va Xi tshemba hi ku lava ni ku landzela nkongomiso wa xona.

“Titshege hi Yehovha eka swilo hinkwaswo leswi u swi endlaka.” Loko vagandzeri va Yehovhaa va nga si endla swiboho, hi ku titsongahata va kombela nkongomiso wa yena. (Yakobo 1:5) Hikwalahokayini? Xin’wana hileswi vanhu va nga riki na matimba yo lawula swilo leswi humelelaka evuton’wini bya vona. (Eklesiasta 9:11; Yakobo 4:13-15) Ku engetela kwalaho, va nga kayivela vutlhari bya ku endla leswi va swi lavaka. Hikwalaho ka swivangelo sweswo, vo tala va titshega hi Xikwembu ni ku tlhela va xi tshemba eka makungu ya vona. Va endla tano hi ku khongelela leswaku a va kongomisa ni ku endla ku rhandza kakwe hilaha swi tsariweke hakona eRitweni rakwe ku nga Bibele.—Swivuriso 3:5, 6; 2 Timotiya 3:16, 17.

Xivulwa lexi nge, “titshenge hi HOSIb eka swilo hinkwaswo leswi u swi endlaka” xi vula leswaku “swi tshikele HOSI.” Mutsari un’wana, u hlamusela xivulwa lexi tanihi “munhu loyi a rhulaka ndzhwalo wakwe lowu n’wi tikaka a wu rhwexa munhu un’wana loyi a kotaka ku wu rhwala.” Lava titshegaka hi Xikwembu hi ku titsongahata va nga tiyiseka leswaku xi ta va pfuna ni ku va tiyisa.—Pisalema 37:5; 55:22.

Marito lama nge, “hinkwaswo leswi u swi endlaka” a ma vuli swona leswaku Xikwembu xi ta katekisa makungu hinkwawo lama u nga na wona. Leswaku hi kuma mikateko ya Yehovha, makungu ya hina ma fanele ma fambisana ni milawu yakwe ya mahanyelo ni ku rhandza kakwe. (Pisalema 127:1; 1 Yohane 5:14) Xikwembu a xi va katekisi lava nga xi yingisiki. Entiyisweni, xi “onha makungu ya lowo homboloka.” (Pisalema 146:9) Hi hala tlhelo, u seketela lava hi ku titsongahata va xiximaka ni ku yingisa milawu yakwe ya mahanyelo leyi humaka eBibeleni.—Pisalema 37:23.

“Kutani makungu ya wena ma ta humelela.” Vuhundzuluxeri byin’wana loko byi hundzuluxela marito lawa byi ri, “makungu ya wena ma ta hetiseka.” Eka Matsalwa ya Xiheveru kumbe leyi hi ntolovelo yi vitaniwaka Testamente Ya Khale, rito leri hundzuluxeriweke hi Xinghezi ri va “simekeke” ri vula ku veka masungulo, hi mikarhi yo tala ri kombetela eka ku tiya ka swilo leswi Xikwembu xi swi tumbuluxeke. (Swivuriso 3:19; Yeremiya 10:12) Hilaha ku fanaka, Xikwembu xi ta tiyisa makungu ya lava endlaka leswinene ematihlweni ya xona, xi va pfuna, xi va sirhelela, xi va tiyisa ni ku tlhela va va ni vutomi lebyi tsakisaka.—Pisalema 20:4; Swivuriso 12:3.

Mongo Wa Swivuriso 16:3

Xivuriso lexi xi tsariwe hi Hosi Solomoni, loyi a tsaleke tibuku to tala ta Swivuriso. U kote ku vulavula swivuriso swa magidi hikwalaho ka vutlhari lebyi humaka eka Xikwembu.—1 Tihosi 4:29, 32; 10:23, 24.

Eka ndzima 16, Solomoni u sungula hi ku dzunisa Xikwembu hikwalaho ka vutlhari bya xona ni ku kombisa ndlela leyi xi va vengaka hayona lava tikukumuxaka. (Swivuriso 16:1-5) Ndzima leyi yi pfuna muhlayi leswaku a gimeta hi ku twisisa ntiyiso lowu hi buku ya Swivuriso: Vanhu va nga tlhariha ni ku humelela ntsena loko va titsongahata ni ku va va pfumelela Xikwembu xi kongomisa magoza ya vona. (Swivuriso 16:3, 6-8, 18-23) Ntiyiso lowu wa xiviri wa phindhaphindhiwa eBibeleni.—Pisalema 1:1-3; Esaya 26:3; Yeremiya 17:7, 8; 1 Yohane 3:22.

Hlalela vhidiyo leyi yo koma leswaku u vona leswi buku ya Swivuriso yi swi tameleke.