Langutelo Ra Bibele

Xana Hi Fanele Hi Hakela Swihlambanyo Swa Hina?

MPATSWA wun’wana lowu tekaneke, lowu tsakeke, wu ni xiphiqo lexi twisaka ku vava. Emalembeni lama nga hundza, loko va ri na xiphiqo xa ndyangu lexi nonon’hwaka, va hlambanye ku humesa n’we-xa-khume xa muholo wa vona eka Xikwembu loko xi ta va humesa eka swiphiqo swa vona. Sweswi, leswi se va nga ni malembe yo tala naswona va langutaneke ni swiphiqo swa timali leswi a va nga swi rindzelanga, va tivutisa, “Xana swa hi boha leswaku hi hetisisa xihlambanyo lexi?”

Xiyimo xa vona xo nonon’hwa xi kandziyisa ndzayo ya vutlharhi ya wanuna wo tlhariha ehenhleni ko hatlisela ku vulavula: “Le’ši lulameke i ku ka u nga hlambanyi, ku ri ni ku hlambanya loko u nga hetisi ku hlambanya ka wena. U nga ṭhuki u ṭhiketa nomu wa wena wu yisa nyama ya wena e šidyohweni, u nga ṭhuki u v̌ula e mahlweni ka nṭumi . . . leŝaku u hošile ntsena.”—Eklesiasta 5:5, 6.

Ku Hava Tinhlamuselo To Pfala-pfala

Hambi leswi swihlambanyo leswi nga riki swa nkoka ni switshembiso swa mavunwa swi tolovelekeke eka vanhu va namuntlha lava nga riki na nawu, a hi nge languteli leswaku Xikwembu xi pfumelela marito yo pfala-pfala; naswona vanhu va mabindzu va swi tiva kahle sweswo. Xihloko lexi nge “Vutshembeki Bya Bindzu: Xana I Mavunwa?” eka phepha-hungu ra bindzu leri nge Industry Week xi ri: “A ha ha va tshembi vanhu leswaku va nga vula ntiyiso, ku endla leswi lulameke ematshan’wini ya leswi pfunaka, ku namarhela mintirho ya vona.” Hambi loko vunwa lebyi humelelaka, byo tanihi ku vula leswaku “mali yo hakela ndzi yi rhumerile,” byi nga ha xisaka vahakerisi lava nga vanhu, tintsumi tona a ti xisiwi.

Leswi a swi vuli swona leswaku Xikwembu xi tirhisa tintsumi leswaku ti endlisa swihlambanyo hi ndlela leyi mulombisi la nga ni nsele a nga ha tirhisaka vadlayi leswaku va londza mali leyi lombisiwaka hi ntswalo eka vambuyangwana. Ematshan’wini yo endla sweswo, Xikwembu hi rirhandzu xi endla tintsumi ti va “mimoya leyi tirhelaka [leyi akaka], leyi rhumiweke ku pfuna vanhu lava fanelaka ku kuma ku ponisiwa.” (Vaheveru 1:14) Hi ndlela yoleyo, tintsumi ti endla xiphemu xa nkoka eku hlamuleni ka swikhongelo swa hina.

Hambi swi ri tano, loko hi hambeta hi endla switshembiso swa hava eswikhongelweni swa hina, xana hi nga langutela mikateko ya Xikwembu? Wanuna wo tlhariha u ri: “Šikwembu a ši ta karihela yini rito ra wena, a ši ta onhela yini [hi mpimonyana wo karhi] e ntiro wa mav̌oko ya wena-ke?”—Eklesiasta 5:6b.

Xisweswo, a hi fanelanga hi susumetiwa hi ku chava ntsumi leyi rihiselaka leswaku hi hakela swihlambanyo swa hina, hi nga vuli marito yo pfala-pfala. Ematshan’wini ya sweswo, hi fanele hi xixima vunghana lebyinene ni Xikwembu ni ku lava ku amukeriwa hi Xikwembu hi vutshembeki entirhweni wa hina. Hi laha mpatswa lowu boxiweke laha henhla wu swi vuleke ha kona: “Hi lava ku va ni ripfalo leri tengeke emahlweni ka Xikwembu naswona hi lava ku endla ku rhandza ka xona.”

Hlayisa Ripfalo Lerinene

Leswaku hi va ni ripfalo lerinene malunghana ni ku hakela xihlambanyo, hi fanele hi tshembeka. Hi xikombiso: A hi nge munhu un’wana u ku kolota mali leyikulu, kambe hikwalaho ka swihinga swin’wana u tikuma a nga swi koti ku ku hakela. I yini lexi a xi ta ku tsakisa—xana a wu ta tsaka loko a nga ha xi hakeli xikweleti hinkwaxo kumbe loko a hlela ku ku hakela swimalana, hakatsongo-tsongo hi laha a kotaka ha kona?

Hi miehleketo leyi fanaka, a hi nge xihlambanyo lexi u hatlaka u xi endla xa leswaku u ta tirhisa nkarhi wa wena hinkwawo kumbe nhundzu yin’wana emintirhweni leyi faneleke ya Vukreste a wu koti ku xi hetisisa. Xana a wu fanelanga u titwa u bohekile ku lwela ku xi hetisisa loko swiyimo swi pfumela? Pawulo u tsarile: ‘Loko u swi tsakela, swi amukeleka ngopfu’ hambi loko u ri ni swo tala kumbe leswitsongo. (2 Vakorinto 8:12) Kambe ku vuriwa yini hi swihlambanyo leswi u swi endleke u nga si va ni vutivi lebyi kongomeke bya ntiyiso wa Bibele?

Swihlambanyo Leswi Hoxeke Kumbe Leswi Nga Riki Swa Matsalwa

Loko hi twa leswaku xihlambanyo xi thyakile kumbe a hi xinene, hi fanele hi xi cukumeta tanihi kala ro hisa! (2 Vakorinto 6:16-18) Swikombiso swa swihlambanyo leswi thyakeke hi leswi:

◻ Swihlambanyo leswi endleriwaka swikwembu kumbe swikwembu-kati swa mavunwa, tanihi “nkosikazi ya matilo” ya le Babilona.—Yeremiya 44:23, 25.

◻ Swihlambanyo leswi nga landziki nawu, ku kota xihlambanyo xa vavanuna va 40 xa leswaku va nga dyi swakudya ku kondza va dlaya muapostola Pawulo.—Mintirho 23:13, 14.

◻ Swihlambanyo swa vagwinehi leswi landzaka “tidyondzo ta mademona, ni . . . ku xiseteriwa hi vahembi . . . va arisa ku tekana, va lerisa leswaku ku tshikiwa swakudya leswi Xikwembu xi swi vumbeke leswaku swi amukeriwa hi ku nkhensa hi lava va pfumelaka ni ku tiva ntiyiso.”—1 Timotiya 4:1-3.

Kutani swi le rivaleni leswaku hi nga ha boheka ku vula leswaku swihlambanyo swa khale i swa hava. Kambe eka swihlambanyo leswi nga swa matsalwa, ha yini u lava tindlela to swi balekela? Xana vutivi bya hina lebyi kongomeke bya sweswi a byi fanelanga byi hi endla hi xixima swinene swihlambanyo swa khale?

Anakanya Hi Swihlambanyo Swa Wena Swa Khale Ni Swa Nkarhi Lowu Taka

Swi tlhela swi vula leswaku hi fanele hi ehleketisisa hi nga si engetela swihlambanyo swihi na swihi swa nkarhi lowu taka evugandzerini bya hina. Swihlambanyo a swi fanelanga swi tirhiseriwa ku susumetela munhu ku endla nchumu wo karhi kumbe a nga wu endli, tanihi ku engetela nkarhi lowu hetiwaka evugandzerini bya Vukreste kumbe ku tshika ku dya ku tlula mpimo. Hambi swi ri tano, Yesu a nga swi kanetanga hinkwaswo swihlambanyo, hi xikombiso, tanihi loko ku laveka leswaku yena a xi endla ehubyeni. Kambe u fanele a veke swipimelo malunghana ni swihlambanyo swo biha, hikuva u tsundzuxile: “Ku vuriwile eka lava khale, va te: ‘U nga tshuki u hundzuka eku hlambanyeni ka wena, kambe u ta endla leswi u nga hlambanya swona emahlweni ka [Yehovha].’ Kambe mina ndzi ri ka n’wina: Mi nga tshuki mi hlambanya ni kutsongo.” (Matewu 5:33, 34) Hikwalaho ka yini a teke xiyimo lexi? Xana swihlambanyo sweswi a swa ha faneleki ku tlula enkarhini wa khale?

Swihlambanyo swa lavo tshembeka va minkarhi ya khale hakanyingi a swi ya hi xiyimo. Exikhongelweni lexikulu a va tshembisa Yehovha va ku, ‘Loko u ndzi pfuna ekhombyeni leri, ndzi ta ku endlela leswo tani ni leswo tani.’ Kambe Yesu u te: “Xin’wana ni xin’wana lexi mi nga ta xi kombela eka Tatana hi vito ra mina, ú ta mi nyika xona.” Ematshan’weni yo bumabumela swihlambanyo leswi yaka hi xiyimo eka lavo tshembeka va nkarhi wakwe, Yesu u va tiyisekisile: “Ku fikela sweswi, a mi si kombela nchumu hi vito ra mina; kombelani, mi ta nyikiwa.”—Yohane 16:23, 24.

Ku tshembela loku evitweni kumbe exikhundlheni xa Yesu, ku fanele ku chavelela un’wana ni un’wana loyi a ha tivonaka nandzu hikwalaho ka leswi—hambi loko a ringeta—a nga swi kotiki ku hetisisa leswi a swi tshembiseke Xikwembu ‘hi nomu wakwe, handle ko swi anakanya.’ (Levhitika 5:4-6) Kutani handle ko tekela ehansi swihlambanyo swa hina swa khale, sweswi hi nga khongela evitweni ra Yesu, hi tlhela hi kombela Xikwembu leswaku xi tirhisa gandzelo ra nkutsulo ra Yesu eka swidyoho swa hina, naswona hi nga kombela ku rivaleriwa hi vito ra Yesu. Xisweswo hi nga amukela “ku pfumela loku hetisekeke; timbilu ta hina leti xuviweke, a ti base ti hambana ni ripfalo lero biha.”—Vaheveru 10:21, 22.

[Laha Xifaniso Xi Humaka Kona eka tluka 16]

Priests taking vows at Montmartre