Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • g93 7/8 matl. 23-26
  • Ku Tirha Hi Matimba Laha Swi Nga Swinene Kona

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Ku Tirha Hi Matimba Laha Swi Nga Swinene Kona
  • Xalamuka!—1993
  • Swihloko
  • Tinhlokomhaka Tin'wana Leti Yelana Na Yona
  • Xana Hi Swona Swivangelo Swa Ku Va U Nghenisa Rihanyo Ra Wena eKhombyeni?
  • Langutelo Lerinene Ra Ku Tirha Hi Matimba
  • Laha Ku Tirha Hi Matimba Swi Vaka Nchumu Lowunene
  • Ndlela Yo Tsakela Ku Tirha Hi Matimba
    Xihondzo xo Rindza Xi Huwelela Mfumo Wa Yehovha—2015
  • Xana Ntirho Wo Nonon’hwa Wu Tisa Ntsako?
    Xihondzo xo Rindza Xi Huwelela Mfumo Wa Yehovha—1989
  • Tsakela Ntirho Wa Wena
    “Tihlayiseni eRirhandzwini Ra Xikwembu”
  • Ntirho Lowu Wu Nga Ku Tsakisaka
    Xihondzo xo Rindza Xi Huwelela Mfumo Wa Yehovha—1989
Vona Swo Tala
Xalamuka!—1993
g93 7/8 matl. 23-26

Ku Tirha Hi Matimba Laha Swi Nga Swinene Kona

LE TIKWENI ra Asia Dzonga-vuxa hinkwaro, vanhwanyana vo tala lavatsongo lava tirhaka etindlwini va tshika mintirho ya vona ya le kaya ivi va tshama va honokela tithelevhixini ta vona loko ntlangu wa swiphemu wa le ka TV lowu vitaniwaka Oshin, lowu endliweke le Japani, wu nghena. I xitori lexi vulavulaka hi ku suka evusiwaneni ku ya eku fuweni, xa wansati loyi a humelelaka endzhaku ko tiyisela malembe yo tala a xaniseka ni ku nonon’hweriwa. Vanhwanyana lava va rila va fanisa xiyimo xa vona ni xa Oshin, la nga nghwazi-kati. Ntlango lowu wu vonaka wu ri nchumu lowu ana a a va wu lava leswaku va ta kota ku tiyiselela ntirho wa siku leri landzelaka lowo tika.

I ntiyiso, loko vanhu va tirha ku vava siku rin’wana ni rin’wana, ku fikela laha va onhaka rihanyo ni vutomi bya vona, va fanele va ri ni swivangelo swo endla sweswo. Ha yini va endla tano? Tanihi vanhwanyana lava va nga malandza le Asia, ku lava ku antswisa xiyimo xa wena xa ku hanya hakunene i nsusumeto lowu tolovelekeke ni lowu nga ni matimba wa leswaku munhu a tirha hi matimba. Hambi swi ri tano, swi le rivaleni leswaku ku kuma swilo leswi vonakaka, a hi swona ntsena swi katsekaka.

Stephen D. Cohen wa tsala, mayelana ni mikhuva ya ku tirha ya Majapani: “Hambi leswi mali yi laviwaka, mali kambe a hi nchumu wo rhanga eka vona.” Kutani ke, i yini lexi susumetelaka Majapani leswaku ya tirha hi matimba hi ndlela leyi? “Ku humelela ka feme eku xaviseni ka swilo loko yi pimanisiwa ni leyi yi phikizanaka na yona, ku va endla va titwa va ri le henhla naswona va enerisekile swinene. Ku tirha hi matimba loku katsekeke eku endleni ka leswi, ku ni hakelo ya kona,” ku hlamusela Cohen. Vutshembeki eka feme ya vona byi hundzuka xivangelo xa leswaku vathoriwa va tirha hi matimba, naswona ntirho wu hundzuka nchumu wu ri woxe wa ku tikombisa leswaku i va nkoka ku fikela kwihi. Nakambe lexi nga fanelangiki ku rivariwa, i nsusumeto wo lava ku tiyimela hi wexe enkarhini lowu taka. Ku navela leswaku siku rin’wana u fikelela maninginingi, ka ha ri nsusumeto lowukulu wa ku tirha hi matimba.

Xana Hi Swona Swivangelo Swa Ku Va U Nghenisa Rihanyo Ra Wena eKhombyeni?

Xana leswi hi swona swivangelo swa ku nghenisa rihanyo ni vutomi bya wena ekhombyeni? Loyi a tirhaka hi matimba a tirhela rifuwo ra leswi vonakaka, Bibele yi ri ha yena, “mahlo ya yena a ma šuri rifuwo.” Munhu yoloye a nga hetelela a tivutisa: “Šana nḍi tikaratela mani, nḍi ṭona moya wa mina e ku kateka hikwalaho ka mani?” (Eklesiasta 4:8) Lava va tirhaka hi matimba leswaku va fuwa va vonaka va nga swi tivi leswaku va fanele va yima rini kumbe kwihi. Va tikuma va phasekile eka ndzhendzeleko wo nononh’wa wa ku tirha, va tirha va nga yimi. Bibele hi ku olova ya tsundzuxa: “U nga tikarati ku hlengeleta rifuwo.”—Swivuriso 23:4.

Ku vuriwa yini hi ku tshembeka efemeni? Hambi leswi swi nga vaka nchumu lowunene, vuyelo lebyi vangiwaka hi ku tirha hi ndlela leyi hundzeletiweke byi fanele ku xiyiwa. Mukongomisi-nkulu wa feme ya le Amerika u te: “Loko munhu a hlakarile, a ndzi n’wi lavi a tirha eka mina.” Nsati wa “la lweleke ku fuwa” u tsalele phepha-hungu endzhaku ka loko nuna wakwe a dlayiwe hi ku tirha ku tlurisa a nga si fika eka malembe ya 40: “Xana i marito wahi yo chavelela lawa tifeme ti fanelaka ku hi byela wona, xana hi lama nge, ‘Hi timbilu leti tshovekeke hi lahlekeriwe hi munhu wa nkoka’? Vadlawela-ntirho lavaya, loko va kala va fa, va langutiwa tanihi ‘swilo leswi a swi faneriwa hi ku lahliwa.’”

Hambi loko munhu a nga hlakatiwi hi ntirho kumbe a nga fi, ku humelela yini hi yena loko a fikelela nkarhi wo huma entirhweni? Motoyo Yamane, muhaxi wa Mujapani u ri: “Hambi loko va ti tirhela swinene tifeme ta vona, va va komba kahle leswaku feme a ya ha va lavi ni leswaku a va ha pfuni nchumu.” Eka feme leyi yi nga riki na mhaka na munhu, vathoriwa lava va tirhaka hi matimba vo fana ni swirho leswi nga riki swa nkoka efemeni ya vona leyikulu, leswi faneleke ku siviwa hi swin’wana loko swi hlakala. A swi hlamarisi leswi Majapani yo tala ma heleriwaka hi ntshembo eka tifeme ta wona! Va sungula ku xiya leswaku ku tinyiketela ka vona efemeni i ku bohelela xuma enengeni wa mpfuvu.

Xana ku nga vuriwa yihi hi ku lwela ku fuwa? Lava va fikeleleke xiphemu xa ku va ni swikhundlha va hatlisa va swi xiya leswaku a hi hinkwavo lava va nga ta fikelela swikhundlha sweswo. Kutani, ku humelela yihi? Leswi va nga ha riki na ntshembo wo tlakusiwa, va sungula ku nghena va huma emintirhweni. Kutani ku tshembeka eka feme a swi tikombanga swi ri nchumu lowunene!

Langutelo Lerinene Ra Ku Tirha Hi Matimba

Hambi leswi ku tirha hi matimba leswi vangiwaka hi ku rhandza mali, ku tshembeka efemeni, kumbe moya wa ku phikizana eku heteleleni swi hlundzukisaka naswona swi khomisaka tingana, Bibele a yi wu bakanyeli etlhelo nkoka wa ku tirha hi matimba. “Ni leŝaku loko munhu a dya, a nwa, a ṭakela ntiro hikwawo wa ku tikarata ka yena, na ŝona i ku nyika ka Šikwembu.” (Eklesiasta 3:13) Bibele yi khutaza ku tiphina hi mihandzu ya ku tirha ka wena hi matimba. Leswi swi hi nyika nhlamuselo ya leswi langutelo lerinene ra ku tirha hi matimba ri nga vaka swona.

Ndzawulo ya Rihanyo ni Vuhlayiseki le Japani sweswinyana ya ha ku tsundzuxa vatirhi ku “rivala ntirho loko va chayisile (naswona) va dya swakudya swo lalela ni mindyangu ya vona.” Varhangeri van’wana va mabindzu va vonaka va tlangela vutlharhi lebyi nga eka xitsundzuxo lexi. Hi xikombiso, muungameri wa feme ya ntivo-ntumbuluko u te: “Ndzi lava leswaku vathoriwa va hina hinkwavo va khathalela mindyangu ya vona kahle ku tlula swilo hinkwaswo. Ntirho wa vona efemeni ya hina ko va ntsena nchumu wa ku kota ku hlayisa mindyangu ya vona.”

Hakunene, vuxaka lebyinene bya ndyangu i pakani ya nkoka swinene ya ku yi tirhela hi matimba. Loko vuxaka lebyinene bya ndyangu byi onhiwa kumbe rihanyo ra wena ri onhaka hikwalaho ka ntirho wa wena, a wu ku tsakeli ku tirha ka wena hi matimba.

Hambi swi ri tano, eka Majapani, laha ku va la tlakukeke swi laviwaka ngopfu, van’wana va ve ni langutelo leri: “U nga xwi, u nga hlweri, naswona u nga tirhi.” Va tiendla onge va chivirika hi ku tshama entirhweni ku kondza ku hundza nkarhi kambe va yimela ntsena leswaku mukongomisi a ya ekaya. Kenji, munavetisi wa feme leyi khavisaka etindlwini le Hiroshima, a ri na langutelo rolero. A a khekheleza entirhweni, a heta nkarhi evhengeleni ra swakudya kumbe endhawini ya michini yo tlangisa tibolo.

Xana langutelo ro tano ri tisa ntsako? “V̌oko ra lolo ri ta tirela v̌aṅwana,” ku vula xivuriso xa Bibele. Namuntlha, a swi nge endleki leswaku munhu a tirhela van’wana hi xiviri hikwalaho ka leswi a lolohaka. Ku nga khathariseki sweswo, ntirho wu nga hundzuka nchumu lowu nyangatsaka, hi ndlela yo karhi swi va onge i ku tirhela van’wana. Hi tlhelo rin’wana, xona xivuriso lexi xi boxa mpfuno wa ku va la gingiritekaka: “V̌oko ra l’a tiraka ri ta fuma.” (Swivuriso 12:24) Hambi loko u nga heteleli u fume tiko kumbe feme, kambe u ta xiximiwa hi ndyangu wa wena naswona u ta tilawula hi wexe. Ku engetela kwalaho u nga tshembiwa hi muthori wa wena, naswona u va ni ripfalo lerinene.

Kenji u kume leswi swi ri tano. U kunguhate ku dyondza Bibele, naswona vutomi bya yena byi cince swinene. U ri: “Hi ku tirhisa mimpimanyeto ya vutshembeki entirhweni, ndzi sungule ku tirha hi ku hiseka hambi mukongomisi u kona kumbe a nga kona. Sweswo swi n’wi endle a ndzi tshemba.”

Laha Ku Tirha Hi Matimba Swi Vaka Nchumu Lowunene

Ntiyiso hi lowu, leswaku ntirho wu va nchumu lowunene, wu fanele wu pfuna ni van’wana. Mutsari wa swa mabindzu u vule leswaku ‘ntirho lowu enerisaka, i ntirho lowu endlaka swilo swi olova, lowu chavelelaka kumbe lowu tsakisaka vutomi bya vanhu vo tala.’ Ntirho wo tano wu enerisa mutirhi hi laha ku enteke. Swi hi laha Yesu Kreste a vuleke ha kona: “Ku nyika i nkateko lowu tlulaka ku nyikiwa.”—Mintirho 20:35.

Hambi leswi ku tirhela van’wana swi bumabumeriwaka, ka ha ri ni xin’wana lexi nga ku endlaka u eneriseka entirhweni ni le vuton’wini. Endzhaku ka loko Hosi Solomoni a tiphine hi vulovolovo ni rifuwo hinkwaro leri a ri kumeke evuton’wini, u hetelele a te: “Tšhav̌a Šikwembu, u hlayisa milawu ya šona, hikuv̌a hi yona fanelo hikwayo ya munhu.”—Eklesiasta 12:13.

Swi le rivaleni, hi fanele hi xiya ku rhandza ka Xikwembu eka xin’wana ni xin’wana lexi hi xi endlaka. Xana hi fambisana ni ku rhandza ka xona kumbe hi hambana na xona? Xana hi lwela ku xi tsakisa kumbe ku titsakisa hina vini? Loko hi honisa ku endla ku rhandza ka Xikwembu, ho tifanela ni lava hlongorisaka swilo leswi vonakaka kumbe varhandzi va ntsako naswona eku heteleleni hi ta dlayiwa hi xivundza, hi nga ri na xikongomelo naswona hi pfumala ntshembo.

Kutani tsundzuka leswaku ku tirhela Yehovha Xikwembu—ku endla ntirho lowu tsakisaka Mutumbuluxi wa hina—a swi nge hi vavisi. Yehovha hi yexe i mutirhi la gingiritekaka, naswona u hi rhamba leswaku hi hlanganyela na yena hi va “vatirhi-kulo[bye].” (1 Vakorinto 3:9; Yohane 5:17) Kambe xana ku tirha hi matimba hi ndlela yoleyo swi tisa ntsako wa xiviri?

Mukongomisi wa feme ya ku gandlisa u tshama a endzela fektri ya ku gandlisa ya Watch Tower le Japani leswaku a ya vona fambiselo ra yona. Nyingiso wa yena a wu kokiwanga hi michini ntsena. U vone majaha ya tiphina hi ntirho wa vona, naswona a a hlamarile ku twa leswaku hinkwavo i vatirhi va ku tirhandzela ni leswaku van’wana va ntsandza-vahlayi va endle swikombelo swo ta va ta va joyina. Ha yini a hlamarile? U hlamuserile: “Efemeni ya hina, loko hi thola khume ra vanhu, hi fanele hi tsaka swinene loko mune wa vona va ha tirha na hina endzhaku ka lembe rin’we. N’wina vanhu va Watchtower mi ni rifuwo hi majaha lawa!”

I yini lexi endlaka majaha lawa ya tsaka hi ndlela leyi naswona ya tirha hi matimba hi ndlela leyi? Leswi va nga vatirhi vo tirhandzela, swi le rivaleni leswaku a va tirheli mali. Kutani ke i yini lexi va susumetaka? I ku tinyiketela ka vona ni ku kombisa ku tlangela Yehovha, Mutumbuluxi wa vona, ni ku rhandza vaakelani. Langutelo ra vona ri komba leswaku a vo tirhela “ku tsakisa vanhu, kambe, leswi [va] nga mahlonga ya Kreste, [va endla] ku rhandza ka Xikwembu hi mbilu hinkwayo.”—Vaefesa 6:6.

Leswi hinkwaswo i xikombiso xa leswi nga ta ta. Lava va tirhaka hi matimba sweswi entirhweni wa Yehovha va nga languta emahlweni eka nkarhi lowu a nga ta vuyetela Paradeyisi naswona misava hinkwayo yi ta tala hi mintirho leyinene. Esaya, muprofeta wa Xikwembu wa khale, u vhumbhe mayelana ni vutomi enkarhini wolowo a ku: “V̌a ta aka tindlu, v̌a ta ṭhama ka tona; v̌a ta byala tivinya, v̌a dya mihanḍu ya tona. V̌a nga ka va ha aki tindlu, leŝaku uṅwana a ta ṭhama kona, v̌a nga ka v̌a nga ha byari leŝaku uṅwana a ta dya. . . . Kutani v̌ahlawuriwa v̌a mina v̌a ta ṭakela ntiro wa mav̌oko ya v̌ona.”—Esaya 65:21, 22.

Mawaku ndlela leyi ntirho wu nga ta va nkateko ha yona enkarhini wolowo! Hi ku dyondza leswi ku rhandza ka Xikwembu ku nga swona eka wena ni ku tirha hi ku twanana na kona, onge u nga va exikarhi ka lava va katekisiweke hi Yehovha naswona minkarhi hinkwayo ‘u tsakela ntirho hinkwawo wa ku tikarhata ka wena.’—Eklesiasta 3:13.

[Bokisi leri nga eka tluka 24]

Langutelo Lerinene Ra Ntirho Ri Ponisa Vukati

Eka Yasuo, la tshamaka le Hokkaido, eJapani, ntirho a ko va nchumu wa nkarhi hinkwawo ku ta fikela malembenyana lama ha ku hundzaka. A a ri ni xikhundlha, naswona a lwela ngopfu ku antswisa rivilo ro xavisa nhundzu. Masiku hinkwawo a tirha ku fikela hi awara ya 11 ni vusiku naswona a nga teki masiku yo wisa. Kutani, wa tsundzuka: “Ndzi xiye leswaku ku nga khathariseki leswaku a ndzi tirha hi matimba hi ndlela yihi, ntirho wa mina a wu nga ndzi tiseli ntsako.” Rihanyo ra Yasuo ri sungule ku tsana. Loko a vulavule ni nsati wa yena, u swi xiyile leswaku a ku ri na xin’wana xa nkoka ku tlula ntirho wa yena—ku nga ndyangu wa yena. U hundzule hanyelo ra yena naswona a hlanganyela ni nsati wa yena eku dyondzeni ka Bibele. Sweswi i nhloko leyi rhandziwaka ni leyi xiximiwaka ya ndyangu lowu tsakeke.

[Xifaniso lexi nga eka tluka 24]

Ntirho wa wena a wu fanelanga wu xungeta vuxaka bya ndyangu

[Xifaniso lexi nga eka tluka 25]

Hi ku hatlisa hinkwerhu hi ta tiphina hi ku tirhela ku endla misava yi va paradeyisi

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela