Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • w89 7/15 matl. 4-7
  • Ntirho Lowu Wu Nga Ku Tsakisaka

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Ntirho Lowu Wu Nga Ku Tsakisaka
  • Xihondzo xo Rindza Xi Huwelela Mfumo Wa Yehovha—1989
  • Swihloko
  • Tinhlokomhaka Tin'wana Leti Yelana Na Yona
  • Minsusumeto Leyi Tiyeke?
  • Munhu U Endleriwe Ku Tirha
  • ‘Vona Leswinene’ Eku Endleni Ka Ku Rhandza Ka Xikwembu
  • Ku Tirha Hi Matimba Laha Swi Nga Swinene Kona
    Xalamuka!—1993
  • Ndlela Yo Tsakela Ku Tirha Hi Matimba
    Xihondzo xo Rindza Xi Huwelela Mfumo Wa Yehovha—2015
  • Tsakela Ntirho Wa Wena
    “Tihlayiseni eRirhandzwini Ra Xikwembu”
  • Mi Chaveleleka Na N’wina Mi Chavelela Van’wana
    Xihondzo xo Rindza Xi Huwelela Mfumo Wa Yehovha—2013
Vona Swo Tala
Xihondzo xo Rindza Xi Huwelela Mfumo Wa Yehovha—1989
w89 7/15 matl. 4-7

Ntirho Lowu Wu Nga Ku Tsakisaka

“A NDZI wu rhandza hakunene ntirho wa mina tanihi mukandziyisi,” ku vula Antonio eGenoa, Italy. “A ndzi hakeriwa kahle naswona leswi swi ndzi endle ndzi tirha nkarhi lowu engetelekeke tiawara to tala. Hi malembe ma nga ri mangani ntsena, ku nga khathariseki malembe ya mina ya vuntshwa, ndzi ve mupfuni wa vathori va mina.” Antonio u tikomba a ti fikelerile tipakani leti susumetelaka vo tala ku tirha hi matimba: rifuwo, xikhundla ni ntirho lowu kokaka nyingiso lowu a wu tsakelaka.

Xana Antonio a a ‘wu vona ntikelo wa ku tirha ka yena hi matimba’? (Eklesiasta 3:13) Naswona xana ntirho wo tano a wu n’wi endla a tsaka hakunene ke? “Hikwalaho ka ntshikilelo lowu vangiwaka hi mahanyelo ya hina lama vavisaka mianakanyo,” u ya emahlweni, “hi sungule ku va ni swiphiqo tanihi ndyangu. Leswi swi hi khunguvanyisile.” Antonio ni nsati wakwe a va nga tsakanga ku nga khathariseki mintirho ya vona leyi anerisaka. Ku vuriwa yini hi wena? Xana ‘wa wu vona ntikelo wa ku tirha ka wena hi matimba’? Xana ntirho wa wena wu ku endla u tsaka hakunene ke?

Minsusumeto Leyi Tiyeke?

Xivangelo lexikulu xa ku tirha hi matimba i xa ku tihanyisa. Ematikweni man’wana, vanhu va fanele ku tirha tiawara to tala leswaku va hanya. Van’wana va tirha vusiku ni nhlekanhi leswaku vana va vona va ta va ni vutomi lebyi antswaka. Nakambe van’wana va boheka ku tirha leswaku va hlengeleta rifuwo.

Leonida ePhilippines a a ri na mintirho mimbirhi. A a tirha ebankini ni nhlekanhi naswona a a dyondzisa ekholichini tiawara tinharhu kumbe ta mune nimadyambu. Xana mali leyi engetelekeke a yi pfuna ke? “Minkarhi hinkwayo a ndzi languta wachi,” wa hlamusela. “A ndzi ri na gome. A ndzi wu endla ndzi ri hava ku aneriseka.”

E-e, ku tirhela mali ntsena a swi ku tisi ku aneriseka ni ntsako wa ntiyiso. “U nga tikarati ku hlengeleta rifuwo,” ku tsundzuxa Hosi ya vutlhari Solomoni, “rifuwo ri ta mila timpapa, ri haha e henhla kukotisa gama.” (Swivuriso 23:4, 5) Magama man’wana ku vikiwa leswaku ma haha hi rivilo leri fikaka eka 130 wa tikhilomitara hi awara. Leswi swi xi kombisa kahle xihatla lexi rifuwo leri kumiweke hi ku nonon’hwa ri nga hahisaka swona. Hambi loko munhu a hlengeleta rifuwo, loko a fa a nge fambi na nchumu.—Eklesiasta 5:15; Luka 12:13-21.

Ku khomeka swinene hi ku tihanyisa minkarhi yin’wana ku tisa makhombo lamakulu. Ku nga yisa eku rhandzeni ka mali. Eka lembe xidzana ro sungula, a ku ri ni ntlawa wa vukhongeri lowu vuriwaka Vafarisi lava a va dumile hi ku rhandza ka vona mali. (Luka 16:14) Tanihi khale ka Mufarisi, muapostola Pawulo wa Mukriste a a byi tiva kahle vutomi bya vona. (Vafilipiya 3:5) “Kambe lava navelaka rifuwo,” ku tsundzuxa Pawulo, “va wela endzingweni, emintlhan’wini ya ku navela leswo tala leswi nga pfuniki nchumu, ku nga ku navela loku ku dlayisaka vanhu, ni ku va peta ekhombyeni ni le ku loveni. Hikuva ku rhandza ngopfu mali i rimitsu ra leswo biha hinkwaswo; hi yo mhaka ya ku navela ngopfu . . . timbilu ta vona ti ngheniwa hi mivilelo leyo tala.” (1 Timotiya 6:9, 10) Ina, ‘ku rhandza mali,’ ku tikarhatela yona, ku nga onha vutomi bya munhu. Xiendlo xo tano a xi wu tisi ntsako.

Eka van’wana, xikongomelo xa vona xo tirha hi matimba i ku endla bindzu lerikulu. Hambi swi ri tano, eku heteleleni va kongomana ni mintiyiso. “Valawuri lavantshwa,” ku vula magazini wa Fortune, “lava tinyiketeleke emalembeni ya vona ya va-20 ni ya le ku sunguleni ka va-30 ku fikelela vulawuri bya le xikarhi va hlamarisiwa hi ku xiya leswaku, ku nga khathariseki ku tirha hi matimba swinene, a hi hinkwavo lava nga ta fika emaninginingini, naswona a swi papalateki. Loko va karhatiwe hi ku tirha hi matimba, va boheka ku tivutisa leswaku swi vula yini. Ha yini hi tirha hi matimba swonghasi? Ku khathala mani?”

Vutomi bya wanuna un’wana wo tano, Mizumori, a byi rhendzeriwe hi ku lava ku fambisana ni misava. Hi ku hlongorisa ntirho-vutomi wa swikhundla swa vulawuri eka yin’wana ya tibanki letikulu eJapani, a nga ri na wona nkarhi wa ndyangu wa yena. Endzhaku ko tirha hi matimba hi malembe yo tlula 30, vutomi bya yena a byi onhakile, naswona entiyisweni a a nga tsakanga. “Ndzi swi vonile,” ku vula yena, “ku hlongorisa swikhundla exikarhi ka vanhu lava ringetaka ku hlawuleka tanihi lava fumeke ‘i v̌uhav̌a ni ku lanḍa mheho.’”—Eklesiasta 4:4.

Kambe ku vuriwa yini hi lava va fanaka na Antonio, lava va tsakelaka ntirho wa vona ke? A nyanyuriwe hi ntirho wa yena, Antonio u endle magandzelo hi vutomi bya ndyangu wa yena ealtarini ya ntirho. Van’wana va nyikela rihanyo ra vona hambi ku ri vutomi bya vona, hi laha swi kombisiweke ha kona hi rifu ra xitshuketa ra valawuri vo tala lava dumeke ni lava tirheke swinene va Majapani. Nongonoko wo khongotela lava feriweke va vona wu amukele tiqingho leti hlamarisaka ta 135 hi siku rin’we ntsena.

Van’wana va nyikela vutomi bya vona ku pfuna van’wana. Yesu u khutaze moya lowu. (Matewu 7:12; Yohane 15:13) Ku tihlayisa u khomekile entirhweni wa nkoka wa ku pfuna van’wana hakunene swa wu tisa ntsako.—Swivuriso 11:25.

Hambi swi tano, ku gingiriteka ko tano ka vukanganyisi a ku swi pfumali swihoxo. Hi xikombiso, hosi Ozias wa Yudiya u nghenele ntirho lowukulu wo pfuna tiko wa ku cela swihlovo emananga. Ozias u fanele a tsundzuke ku pfuneka ka vanhu va yena, tanihi leswi a a ‘lava Yehova’ hi nkarhi wolowo naswona hi laha ku faneleke u xi amukerile xileriso xa Xikwembu leswaku tihosi ti va leti nga hava vutianakanyi. (2 Tikronika 26:5, 10; Deuteronoma 17:14-20) Leswi swi engetele ku humelela ka yena enyimpini, kutani “ku twala ka yena ku fika kule.” Kambe loko a kume matimba, u ve la tikukumuxaka, leswi vangeke ku wa ka yena. (2 Tikronika 26:15-20; Swivuriso 16:18) Munhu la tinyiketeleke ku pfuna van’wana kambe la susumetiwaka hi ku titlakusa ni vutikukumuxi na yena a nga hetelela hi ku lova. Manuku ke, ha yini munhu a fanele a lava ku tirha hi matimba ke?

Munhu U Endleriwe Ku Tirha

Hi nga dyondza swo tala hi ntirho eka wanuna la hetisiseke leswinene ngopfu ku tlula munhu un’wana ni un’wana la tshameke a hanya emisaveni. I Yesu Kriste. (Matewu 20:28; Yohane 21:25) Loko a fa emhandzini ya nxaniso, u huwelerile a ku, “Swi hetisekile.” (Yohane 19:30) Vutomi bya yena bya malembe ya 331/2 a byi anerisa.

Vutomi bya Yesu byi pfuna ku hlamula xivutiso lexi nge, “Hi wihi ntirho lowu wu nga ku tsakisaka?” A ku ri ku hetisisa ku rhandza ka Tata wa yena wa le matilweni loku n’wi tiseleke ntsako lowu nga pimekiki. Hi ku fanana, ku endla ku rhandza ka Muvumbi wa hina ku nga hi endla hi titwa hi hetisise swo karhi naswona ku hi endla hi tsaka. Ha yini? Hikuva U tiva ndlela leyi hi vumbiweke ha yona ni swilaveko swa hina ku tlula ndlela leyi hi swi tivaka ha yona.

Loko Xikwembu xi vumbe munhu wo sungula, Adamu, Xi n’wi nyike ntirho wa mavoko ni wa mianakanyo leswaku a wu endla. (Genesa 2:15, 19) ‘Ku fuma’ swivumbiwa swin’wana hinkwaswo swa le misaveni, Adamu na yena a a ri ni ntirho wa vulanguteri leswaku a wu endla. (Genesa 1:28) Ntsendze loko Adamu a landzelele lunghiselelo leri, ntirho wa yena wu tshame wu ri na xikongomelo naswona wu ri wa nkoka. Xiavelo xin’wana ni xin’wana xa xintirhwana a xi vula lunghelo rin’wana ro tsakisa La-nge-henhla-henhla.

Hambi swi ri tano, leswi a swi tshamanga swi ri tano eka Adamu. U anakanye ku tshika lunghiselelo ra Xikwembu. Adamu a a nga ha swi tsakeli ku endla ku rhandza ka Xikwembu kambe u lave ku endla leswi a a swi rhandza. U dyohele Muvumbi. Hikwalaho ka xiboho xa yena, Adamu, nsati wakwe ni vana va yena hinkwavo va “nyiketiwile eka swa hava.” (Varhoma 5:12; 8:20) Ematshan’wini yo tisa ntsako, ntirho wu ve lowu phirhwaka. Ku avanyisa ka Xikwembu ehenhla ka Adamu ku katse marito lama: “Misav̌a yi ruketeriwa hikwalaho ka wena. U ta dya ŝa yona hi ku v̌av̌iseka hi masiku hikwawo ya ku hanya ka wena; yi ta ku mirisela mitwa ni mahlohlwe, o dya byanyi bya nhov̌a. O ta dya v̌uŝa hi nyuku wa mombo wa wena, u ko u tlhelela misav̌eni.” (Genesa 3:17-19) Ntirho, lowu a wu ta va ni ntikelo hi ku va ni xikongomelo xin’we ntsena xo tsakisa Muvumbi wa munhu, sweswi a wu vula ntirho wo nonon’hwa ntsena leswaku munhu a ta kuma swakudya.

I makumu wahi lawa hi nga ma bohaka eka mintiyiso leyi ke? Hi lawa: Ku tirha hi matimba ku tisa ku aneriseka ni ntsako wa nkarhi hinkwawo ntsena loko hi tata vutomi bya hina hi ku endla ku rhandza ka Xikwembu.

‘Vona Leswinene’ Eku Endleni Ka Ku Rhandza Ka Xikwembu

Ku endla ku rhandza ka Xikwembu a ku fana ni swakudya eka Yesu Kriste—xilo xo xi tsakela ni ku tiyisa vutomi bya yena bya moya. (Yohane 4:34) Xana ku tiphina ko tano hi ntirho ku nga va ka wena hi ndlela yihi?

U fanele ku twisisa “leswi [Yehova a] rhandzaka swona” eka wena. (Vaefesa 5:17) Ku rhandza ka xona hi vanhu i ku kondletela “ku ntshunxeka loko kwetsima loku nga ka vana va Xikwembu.” (Varhoma 8:21; 2 Petro 3:9) Sweswi ntirho wa misava hinkwayo wa ku hlengeleta wo hetisisa leswi wa endleka. Na wena u nga va ni xiphemu entirhweni lowu wu anerisaka. Ntirho wo tano wu ta ku endla u tsaka hakunene.

Antonio, la boxiweke eku sunguleni, endzhakunyana u kume ku aneriseka ni ntsako. Loko yena ni nsati wakwe va rhangise ntirho wa vona wo tihanyisa ‘wa hava’ evuton’wini bya vona naswona va katseke swinene eka wona, vutomi bya vona bya moya a byi ri ekhombyeni. Wolowo a ku ri nkarhi lowu va sunguleke ku va ni swiphiqo swa le kaya. Hi ku xiya xiyimo, nsati wakwe u kunguhate ku tshika ntirho wa yena naswona a sungula ‘ku tinyiketela hi matimba’ eku endleni ka ntirho wo chumayela hi Mfumo wa Xikwembu nkarhi hinkwawo.—Luka 13:24.

“Hi ku hatlisa hi xiye ku cinca lokukulu,” ku vula Antonio. “A ku nga ri na ku holova ka nkarhi na nkarhi. Ku rhula ku vuyile endyangwini wa hina.” Nsati wa yena u tshovele ntsako wo pfuna van’wana ku kuma vutivi leswi vulaka “vutomi lebyi nga heriki.” (Yohane 17:3) Ntsako wa yena wu susumete Antonio ku anakanyisisa hi leswi a swi ri swa nkoka hakunene. Ku navela ka yena ku tirhela Xikwembu hi mbilu hinkwayo ku hlurile. U ale ku tlakusiwa entirhweni ivi a tshika ntirho wa yena wa ku tihanyisa. Hambi loko ku cinca ku vule ku amukela ntirho wa le hansi swinene, Antonio ni nsati wa yena va tsaka swinene ku heta nkarhi wa vona wo tala evutirhelini bya Vukriste, va endla ku rhandza ka Xikwembu.

Kavula, a hi hinkwavo lava nga exiyin’weni xo endla ku cinca ko tano lokukulu. Mizumori, mutirhi wa le bankini wa Mujapani la boxiweke eku sunguleni, u tsakela vutirheli bya yena tanihi nkulu ebandlheni ra Vukriste naswona wa ha wundla ndyangu wa yena hi ntirho wa yena wa ku tihanyisa, laha a nga ni xikhundla xa vulanguteri. Hambi swi tano, vutomi bya yena a bya ha tatiwanga hi ntirho wa ku tihanyisa kambe byi langutane ni ku endla ku rhandza ka Xikwembu. Ntirho wa ku tihanyisa i xilo xo n’wi tiyisa naswona wu n’wi pfuna ku hetisisa xikongomelo xexo. Sweswi ntirho wa ku tihanyisa na wona wa tsakisa.

Loko u hlakulela langutelo leri hi ntirho wa wena, handle ko kanakana u ta tinyiketela “ku nga ri ntsena loko va mi langutile, onge hi loko mi lava ku tsakisa vanhu, kambe hi timbilu letinene, mi ri karhi mi chava [Yehova].” (Vakolosa 3:22) Ku tshembeka ko tano ku nga vonaka ku nga ta ya kule eka vandla leri ri phikizanaka, kambe, hi laha Mizumori a vulaka ha kona, hi ku tirhisa misinya ya milawu yo tano, u ta tshembiwa ni ku tlangeriwa. Hambi loko a tshike ku tirhela ku tlakusiwa, ku n’wi landzelerile.—Swivuriso 22:29.

Ina, ku rhendzela vutomi bya wena hi ku endla ku rhandza ka Xikwembu i xilotlelo xo kuma ntsako eku tirheni hi matimba. Hi yona mhaka leyi Hosi Solomoni a endleke makumu lawa: “A ku na v̌unene e ka v̌ona loko ku nga ri ku tiṭakela ni ku ti endlela v̌unene e ku hanyeni ka v̌ona. Ni leŝaku loko munhu a dya, a nwa, a ṭakela ntiro hikwawo wa ku tikarata ka yena na ŝona i ku nyika ka Šikwembu.”—Eklesiasta 3:12, 13.

[Xifaniso lexi nga eka tluka 7]

Ku tata vutomi bya ndyangu wa wena hi dyondzo ya Bibele ni ku endla ku rhandza ka Xikwembu i xilotlelo xo tiphina hi mihandzu ya ku tirha hi matimba

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela