“A Hi Lahlekeriwi Hi Nchumu!”

Vadyondzisi ni van’wana va hlamusele leswaku vana va Timbhoni ta Yehovha va lahlekeriwa leswi va nga pfumeleriwiki ku hlanganyela eku titsakiseni ka xikolo, ko tlangela Khisimusi, Easter na Halloween. Laha hansi ku landzela tinhlamuselo tin’wana, ta vana lava nga Timbhoni ta Yehovha, lava hi ku tirhisa mapapila va hlamuselaka leswaku ha yini va ala ku va ni xiphemu eku tlangeleni ka masiku yo wisa.

“HAMBI leswi vanghana va mina va le xikolweni ndzi va hlamuseleke leswaku ha yini ndzi nga tlangeli swilo leswi, kambe a va ha ehleketa leswaku ndza lahlekeriwa. Kambe a ndzi nga lahlekeriwi! Phela, minkarhi hinkwayo va boheka ku yima ku kondza ku fika Khisimusi kumbe siku rin’wana ro wisa leswaku va ta kuma tinyiko, kasi mina ndzi nyikiwe tinyiko naswona ndzi ye eswinkhubyanini swa ku titsakisa, lembe hinkwaro. Ndza swi tiva leswaku a ndzi rhandziwi hi ndyangu wa ka hina ntsena, ndzi rhandziwa hi vandlha na hi Yehovha, sweswo swi hlawuleke ngopfu eka mina ku tlula siku rihi na rihi ro wisa.”—Becky wa malembe ya 13.

“Ndza swi tiva leswaku masiku hinkwawo ya ku wisa ya ni masungulo layo biha. Yesu a nga velekiwanga hi Khisimusi. Ndyangu wa ka hina a wu boheki ku endla xo karhi leswaku wu siva masiku yo tano yo wisa. Ndyangu wa ka hina minkarhi hinkwayo wu tinyika nkarhi wa mina. Leswi i swa nkoka eka mina ku tlula nyiko yihi na yihi leyi ndzi nga nyikiwaka yona.”—Josh wa malembe ya 15.

“Khisimusi. A ndzi lahlekeriwi hikuva kahle-kahle, entiyisweni, a hi ya Vukreste. Swa antswa ku tiva leswaku vatswari va mina va ndzi nyike nyiko, ku ri ni ku tiva leswaku ndzi nyikiwe hi munhu wo karhi wa xihundla la vitaniwaka Santa. Easter. Mayelana na Easter swa tika hakunene hikuva vanhu va ta ku byela leswaku i siku ra ‘Yesu ni ra ku pfuka ka vafi’ kumbe ra ‘ku ya lava mandza’ ntsena. Kahle-kahle, mandza ma nghena kwihi emhakeni ya Yesu? Hambi rona vito leri nge Easter ri huma eka xikwembu-kati xa khale. Halloween. Leswi Halloween a nga swona, a swi ndzi tsakisi nikatsongo. Swipuku ni valoyi, I THYAKA RERO!”—Katie wa malembe ya 10.

“Tanihi muntshwa a ndzi si tshama ndzi twa ku vava hi leswi ndzi nga tlangeliki masiku ya ku wisa ya misava. Vatswari va mina a va si tshama va ndzi byela leswaku ‘a wu nge endli xo karhi hikuva u un’wana wa Timbhoni ta Yehovha,’ kambe ndzi tolovelane ni mavonelo ya Bibele na Yehovha hi masiku lawa ya ku wisa. Loko swi ta emhakeni ya tinyiko, ekaya, ku nyikana tinyiko swi endliwa lembe hinkwaro.”—Ryan wa malembe ya 17.

“Siku rin’wana ni rin’wana ra ku wisa ri tlangela swilo leswi nga mavunwa naswona ri kandziyisa mavunwa. Ndza swi tiva leswaku vana vo tala va tlangela masiku ya ku wisa leswaku va ta kuma malekere kumbe tinyiko. Nchumu wun’wana lowu ndzi nga na wona lowu tlulaka masiku yo wisa, i nhlengeletano leyi hlamarisaka ya Timbhoni ta Yehovha. Rito ra Yehovha Xikwembu ri hambanile ni siku ra ku wisa leri hetaka siku rin’we ntsena, kambe rona ri na marungula lama tsakisaka lama tshamaka hi laha ku nga heriki.”—Brooke wa malembe ya 14.

“Leswi endlaka leswaku ndzi nga ma naveli masiku yo wisa: 1. Bibele yi ri a ma lulamanga. 2. A ndzi na mhaka na wona. 3. Manana na tatana va ndzi nyika tinyiko.”—Brandi wa malembe ya 6.

“A ndzi titwi ndzi lahlekeriwile. A swi ndzi yi. Tinyiko ndza tikuma, mintlango ha tlanga, hi tlhela hi va ni swinkhubyana swa ku titsakisa. Ndzi kuma swilo swo tala hambi loko ndzi nga ma tlangelanga masiku ya ku wisa. Ndzi lava ku tshama ndzi ri Mbhoni eka xin’wana ni xin’wana lexi ndzi xi endlaka naswona ku hava lexi nga ta ndzi tlherisela endzhaku.”—Brianne wa melembe ya 9.

“Ndzi ya eka ntangha nharhu, naswona a ndzi nyumi ku pfumela leswaku ndzi un’wana wa Timbhoni ta Yehovha. Siku rin’wana mufana un’wana u ndzi byele leswaku ndzi fanele ndzi nga tsakanga hikuva a ndzi tikumanga tinyiko ta Khisimusi, kambe ndzi n’wi byele leswaku ndzi kuma tinyiko lembe hinkwaro. Kutani u ndzi byele leswaku ndzi katekile. Ndzi ehleketa leswaku a ku fanelanga ku va ni Mbhoni ya Yehovha leyi vilelaka hi leswi yi nga Mbhoni ya Yehovha.”—Jeff malembe ya 10.

“Mina na sesi hi endla siku ra ku tlangela ku tekana ka vatswari va hina ri va holideyi ya hina ya ndyangu. A ndzi kuma ntsako lowukulu loko ndzi hlela tinyiko, makhadi ni swilo swin’wana ivi ndzi pfuna vatswari va mina ku hlela swilo leswi va nga ta hlamarisana ha swona, ku tlula ntsako lowu ndzi tshameke ndzi wu kuma loko ndzi amukela tinyiko leti humaka eka van’wana. Ku nyika swi tlula ku amukela.”—Rachel wa malembe ya 16.

“Loko ndza ha ri ntsongo, masiku man’wana ya ku wisa a ndzi ma navela. Kambe endzhaku ndzi swi xiyile leswaku masiku yo wisa ma nga vanga makwanga, swicele ni ku tekela ntsako. Loko ku ri ni minkarhi yo karhi ya ku nyikana tinyiko, a wu hlamali loko u nyikiwa nyiko. Swa antswa loko ndzo kuma tinyiko to hlawuleka nkarhi wun’wana ni wun’wana wa lembe. Ku tlangela holideyi kumbe ku ka u nga yi tlangeli i xiphemu xitsongo xa xiboho lexikulu lexi u faneleke u xi endla: xa leswaku xana u fanele u tinyikela kumbe u nga tinyiketeli ku tirhela Yehovha. Loko ndzi ehleketa hi swona hi mukhuva wolowo, swi le rivaleni leswaku ndzi fanele ndzi hlawula ku endla yini.”—Ben wa malembe ya 13.

“Minkarhi yin’wana loko ndza ha ri ntsongo a ndzi twa onge ndzi kayivela swo karhi, kambe endzhakunyana ndzi sungule ku hleka loko ndzi ehleketa leswaku mandza, Yesu, na mpfundlha wa Easter, swi hlanganise ku yini. Loko ndzi kurile ivi vatswari va mina va ndzi hlamusela ndlela leyi mimfungho leyi yi nga sungula ha yona, ndzi twe swi ndzi hlambisa timbilu. Swa ndzi vavisa loko ndzi ehleketa ndlela leyi Yehovha na Yesu va faneleke va titwisa xiswona hi ku hlanganisiwa ni tidyondzo to tano ta vuhedeni.”—Alexa wa malembe ya 18.

“Hi minkarhi ya Khisimusi loko u ri exikolweni, swa tika swinene, naswona swi nga ku endla u titwa u ri na xivundza. Kutani ndzi sungule ku vona leswaku ku tlangela Khisimusi a swi nge swi tlhantlhi swiphiqo swa wena, a swi nge wu endli ndyangu wa wena wu va ni vun’we, naswona a swi nge ku endli u tsaka. I ku hanya hi mimpimanyeto ya Bibele ntsena leswi swi nga ku endlaka u tsaka.”—Joe wa malembe ya 15.

“Ematshan’wini ya ku va ni Khisimusi kumbe siku rin’wana ra ku wisa, hi na Siku Lerikulu Ra Swilo Swa Ku Tlangisa. Hi nyikiwa mali leswaku hi yi tirhisa eka xin’wana ni xin’wana lexi hi xi lavaka. Lembe rin’wana ndzi tshame ndzi vulavula hi vukhongeri bya mina emahlweni ka ntlawa lowu a ndzi dyondza na wona exikolweni. Ematshan’wini yo landzela tindlela ta misava, ndzi pfule ndlela ya mina yo ya etidyondzweni, yo ya evutirhelini bya nsimu, ivi ndzi endla xikhongelo xi va xiphemu xa vutomi bya mina. Ndzi ta khuvuriwa eka nhlengeletano leyi nga ta landzela.”—George wa malembe ya 11.

“Ndza swi rhandza ku amukela tinyiko, naswona ndza tikuma lembe hinkwaro. A ndzi swi naveli ngopfu swinkhubyana. Ndza n’wi tsakisa Yehovha loko ndzi lwela ntiyiso. Swa hlekisa ku vona vanghana va mina van’wana va le tlilasini lava nga riki Vakreste, lava nga va Mahindu, Vayuda ni van’wana, va tlangela Khisimusi, va amukela tinyiko kambe va nga swi tivi leswaku siku rero ro wisa ri vula yini.”—Julia wa malembe ya 12.

“Loko ndzi nga hlanganyeli eka masiku ya ku wisa ya le xikolweni a ndzi nga tisoli. Vana va endla swilo swo tala leswi nga tolovelekangiki, ku fana ni ku ambala swiambalo swa Halloween. A ndzi swi naveli nikatsongo. Ndza va byela leswaku vatswari va mina va ndzi xavela njhani swiambalo lembe hinkwaro. Vona va ndzi byela hi kereke ya vona, ni ndlela leyi yi va phirhwaka ha yona, mina ndzi va byela hi minhlangano leyi hi vaka na yona ephakeni, minkarhi yin’wana va va ni mavondzo. Kambe mina a ndzi na mavondzo eka vona. Hi ku komisa, ndzi nga vula leswaku vana ni vanghana lava xiximaka ripfumelo ra wena ntsena, naswona u nga pfumeleli xichudeni hambi a ri thicara a ku sindzisa ku endla leswi lwisanaka ni ku rhandza ka Yehovha.”—Justin wa malembe ya 12.

“Xana ndzi titwa ndzi lahlekeriwile? E-e, hikuva hi ni swinkhubyana swin’wana, naswona loko vanhu va tlangela Khisimusi, vana va ehleketa hi Santa Claus ntsena, hi Easter vana va ehleketa hi mpfundlha wa Easter, kambe ndza swi tiva leswaku swi huma eka vukhongeri bya vuhedeni. Ndzi rhandza vutirheli bya nsimu hikuva byi ndzi pfuna leswaku ndzi tshama entiyisweni.”—Sharon wa malembe ya 8.

“Ndzi nga vula hi ku kongoma leswaku a ndzi si tshama ndzi titwa ndzi nga enerisekanga hi leswi ndzi nga un’wana wa Timbhoni ta Yehovha. Mina ni ndyangu wa ka hina hi titsakisa hi swilo swo tala. Loko ku ri ni swinkhubyana exikolweni manana wa ndzi teka hi ya dya swakudya swa lanci kun’wana. Vatswari va mina va ndzi tisela switshongo exikolweni handle ka xivangelo xo hlawuleka naswona vana hinkwavo va swi tiva leswaku na hina ha titsakisa. Ndzi endla vatswari va va vanghana va mina naswona loko vana va ndzi vutisa leswaku ha yini ndzi nga tlangeli masiku ya ku wisa, ndzi va byela leswaku ndza titsakisa siku rin’wana ni rin’wana. Loko leswi swi endliwa, xana yi kona Mbhoni leyi nga titwaka yi ri na xivundza?”—Megan wa malembe ya 13.

“Halloween. Vana va ambala onge i vadiyavulosi, vatlangi va le ka tibuku ta tikhomiki—kahle-kahle va swi endlela yini? Vana va tsendzeleka hi switarata va nghena eka yindlu yin’wana ni yin’wana va kuma minkwama yi tele hi malekere. Kumbe va hoxa mandza ehenhla ka tindlu, va tsondzela mirhi hi maphepha lama tirhisiwaka eka swihambukelo, leswi nyenyetsaka ku tlula mpimo hi leswi vatswari vo tala va swi seketelaka.”—Zachary wa malembe ya 10.

“A ndzi boheki ku yimela siku ro karhi leswaku ndzi ta kuma tinyiko. Tatana na manana va ndzi xavela swilo swo tala swo tlangisa, minkarhi hinkwayo. Halloween i vugandzeri bya mimoya leyi feke. A yi fanelanga. Xikwembu xin’we lexi hi faneleke ku xi gandzela i Yehovha.”—Nicholas wa malembe ya 6.