Xana Hi Fanele Hi Tlangela Tiholideyi?

TIHOLIDEYI ta vukhongeri ni tin’wana leti tolovelekeke leti tlangeriwaka namuntlha ematikweni yo tala a ti humi eBibeleni. Kutani ke, xana hi wahi masungulo ya ku tlangeriwa ka tona? Loko u swi kota ku endla vulavisisi elayiburari u ta twa leswi tibuku ti swi vulaka hi tiholideyi leti dumeke laha u tshamaka kona. Xiya swikombiso swi nga ri swingani.

Easter. The Encyclopædia Britannica yi vula leswaku, “ku hava lexi kombisaka ta ku tlangeriwa ka nkhuvo wa Easter eka Testamente Leyintshwa.” Xana yi sungule njhani Easter? Yi sungule eka vugandzeri bya vuhedeni. Hambileswi ku vuriwaka leswaku hi holideyi leyi ku tlangeriwa nkhuvo wa xitsundzuxo xa ku pfuxiwa ka Yesu, swilo leswi endliwaka hi nkarhi wa Easter a hi swa Vukreste. Hi xikombiso, malunghana ni “mpfundla wa Easter” lowu tolovelekeke, The Catholic Encyclopedia yi ri: “Mpfundla i mfungho wa vuhedeni naswona minkarhi hinkwayo wu fanekisela ku veleka.”

Ku Tlangela Lembe Lerintshwa. Siku ni mikhuva leyi fambisanaka ni ku tlangela Lembe Lerintshwa swi ya hi matiko. Malunghana ni masungulo ya nkhuvo lowu, The World Book Encyclopedia yi ri: “Mufumi wa Rhoma Julius Caesar u veke January 1 tanihi Siku ra Lembe Lerintshwa hi 46 B.C. Varhoma va nyiketele siku leri eka Janus, xikwembu xa tigede, tinyangwa ni masungulo ya swilo. N’hweti ya January yi thyiwe yi suka eka Janus, loyi a a ri ni swikandza swimbirhi—xin’wana xi langute emahlweni xin’wana xi langute endzhaku.” Kutani ku tlangela Lembe Lerintshwa swi sungule eka mindhavuko ya vuhedeni.

Halloween. The Encyclopedia Americana yi ri: “Loko munhu a landzelela swilo leswi endliwaka hi nkarhi wa Halloween, swi famba swi kala swi ya fika eka ntlango wa Druid [huvo ya vaprista va khale va rixaka ra Vacelt] wa le minkarhini ya le mahlweni ka Vukreste. Rixaka ra Vacelt a ri ri ni minkhuvo ya swikwembu swimbirhi leswikulu—xikwembu xa dyambu ni xikwembu xa vafi . . . , lexi nkhuvo wa xona a wu endliwa hi November 1, ku nga ku sungula ka Lembe Lerintshwa ra Vacelt. Nkhuvo wa vafi wu nghenisiwe eka mikhuva ya Vukreste hakatsongo-tsongo.”

Tiholideyi Tin’wana. A swi koteki ku vulavula hi minkhuvo hinkwayo leyi endliwaka emisaveni hinkwayo. Hambiswiritano, tiholideyi leti tlakusaka vanhu kumbe minhlangano ya vanhu a ti amukeleki eka Yehovha. (Yeremiya 17:5-7; Mintirho 10:25, 26) Nakambe, tsundzuka leswaku masungulo ya minkhuvo ya vukhongeri hi wona ma kombisaka leswaku yi tsakisa Xikwembu kumbe a yi xi tsakisi. (Esaya 52:11; Nhlavutelo 18:4) Misinya ya milawu ya Bibele leyi boxiweke eka Ndzima 16 ya buku leyi yi ta ku pfuna u vona ndlela leyi Xikwembu xi swi langutaka ha yona ku tlangela tiholideyi leti nga riki ta vukhongeri.