Langutelo Ra Bibele

Mpfuno Wo Langutana Ni Gome Ra Wena

“GOME RI HI TLHERISELA EVUHLANGINI HINKWERHU—RI HERISA KU KANETANA HINKWAKO KA TINTLHARHI. TINTLHARHI TI HUNDZUKA SWIHUNGUKI.”—RALPH WALDO EMERSON, MUPHATI NI MUTSARI WA SWITSALWANA WA MUAMERIKA WA LEMBE XIDZANA RA VU-19.

NDZHOMBO wa rifu a wo vava ntsena kambe wu tsema vanhu vo tala nhlana lava siyiweke hi mufi—nuna, nsati, tatana, manana, jaha, nhwana kumbe munghana. Tintlharhi ti nga ha vutisa swivutiso kambe ti nga kumi tinhlamulo leti chavelelaka, naswona va matimba va nga ha rila hikwalaho ka ku tshikileriwa hi gome kambe va nga chaveleriwi hi munhu. Vahlayi va Bibele va nga ha tsundzuka xirilo xa Davhida xa ku dlayiwa ka Abixalomu la nga tshembekiki: “Ṅwana nga Abšalom! Ṅwana nga, ṅwana nga Abšalom! ingi ku file mina maṭhaṅweni ya wena! Abšalom, ṅwana nga, ṅwana nga!” (2 Samuwele 18:33) Lexi a xi nga ri xirilo xa hosi xo rila vuxengi; a ku ri xirilo xa tatana a rilela n’wana wakwe la feke. Kumbexana na wena u tshama u va ni mintlhaveko leyi fanaka loko u feriwile.

Hi nkarhi wa gome lerikulu, swivutiso leswi vangaka ku karhateka swi nga ha ta emianakanyweni. ‘Ha yini swi humelerile? Xana Xikwembu a xi swi tiva leswaku swi ta humelela? Loko swi ri tano, ha yini xi nga swi sivelanga?’ Hambi loko munhu a ma tiva kahle matsalwa ya Bibele naswona a swi tiva leswaku vafi va ta pfuxiwa, swivutiso leswi tlhontlhaka swi nga ha lava ku anakanyisisa loku enteke hi nchavelelo.

Tinhlamulo leti hoxeke a ti ku tisi ku eneriseka ka ntiyiso, ko va nchavelelo wa mavunwa ntsena. Ku byeriwa leswaku ‘Xikwembu a xi lava murhandziwa wa wena’ swi tala ku endla leswaku vanhu va fularhela Xikwembu hi ku karhateka. Ntiyiso lowu nga eBibeleni, wu hlamula swivutiso malunghana ni gome naswona wu ku tshineta ekusuhi na Yehovha Xikwembu, ematshan’wini yo ku endla leswaku u n’wi fularhela. Ha tiyisekisiwa eka 2 Vakorinto 1:3, 4 leswaku i Tatana wa tintswalo letikulu ni Xikwembu xa ku chavelela hinkwako.

Vutivi Bya Xikwembu Ni Matimba Ya Xona Swa Ringaniseriwa

Yehovha wa Matimba Hinkwawo, u tiva hinkwaswo leswi humelelaka eka ntumbuluko wa yena hinkwawo. Pisalema 11:4 ya hi tiyisekisa loko yi ku: “Yehova o ni šiluv̌elo ša yena e matilweni; mahlo ya yena ma languta, tinkohe ta yena ti ringa v̌ana v̌a v̌anhu.” Eka Vaheveru 4:13 muapostola Pawulo u tsarile: “Emahlweni ka Xikwembu, ku hava ni xivumbiwa ni xin’we lexi tumbeleke.” Xikwembu a xo tiva ntsena kambe xi tlhela xi khathalela! Yesu u te: “Xana swindzingiri swimbirhi a swi xaviwi hi sente yin’we ntsena ke? Kasi a ku nga wi ni xin’we xa swona ehansi, Tata wa n’wina a nga swi tivi. . . . Mi tlula swindzingiri leswo tala hi nkoka.”—Matewu 10:29, 31.

Xana Xikwembu xi nga swi kota ku sivela rifu ra murhandziwa ni gome leri vangiwaka hi rona loko nkarhi wa kona wu nga si fika? Ina, xi nga swi kota. “Xikwembu xi kota hinkwaswo,” ku vule Yesu. (Marka 10:27) Khale swinene, Yehovha u yingise xikhongelo xa Ezekiya loyi a ri ekusuhi ni ku fa, kutani a n’wi horisa, naswona u engetele malembe ya yena yo hanya. (Esaya 38:2-5) Ku hava ku kanakana hi matimba ya Yehovha yo endla hinkwaswo leswi a swi rhandzaka, kambe hi fanele ku twisisa leswi engetelekeke malunghana ni ku rhandza ka yena. Hinkwerhu hi hlaye hi timhaka ta vanhu lava vavisekeke swinene kumbe ku vabya, kambe va hanyile. Xana Yehovha u nghenelerile emhakeni ya vona?

Vanhu van’wana va ni matimba lama nga tolovelekangiki yo hlakarhela ni ku navela swinene ku hanya. Leswi swi nga ha kombisa ku hlakarhela ka vona loku vonakaka ku ri singita. Kumbexana matshungulelo man’wana lamantshwa ma nga ha va ma tikombe ma humelela. Xisweswo, a hi fanelanga hi heta hi ku vula leswaku Yehovha wa khumbeka.—Vafilipiya 4:13.

Rito Ra Xikwembu Ri Hlamusela Mhaka Leyi Vanhu Va Faka Ha Yona

Eka Varhoma 5:12, muapostola Pawulo u hlamusela hi ku twisiseka leswaku kokwa wa hina Adamu u xandzukele Muvumbi wa yena, kutani a gweveriwa rifu hi laha ku faneleke. Tanihi leswi hi nga vana va yena, hi vadyohi naswona hi nga fa nkarhi wihi na wihi. A hi na wona matimba yo hanya hi laha ku nga heriki. Solomoni, hosi ya khale ya vutlharhi, u swi veke erivaleni leswaku nkarhi ni khombo swi nga wela unwana ni un’wana, nkarhi wihi na wihi, ku nga ha va hi khombo leri dlayaka kumbe vuvabyi bya xitshuketa lebyi yisaka eku feni. Kumbexana un’wana a nga tswariwa a ri ni vuvabyi lebyi nga endlaka leswaku vutomi byakwe byi koma. Solomoni u tlhela a hlamusela leswaku nkarhi ni nguva ya swilo hinkwaswo i swa Xikwembu. Xikwembu xi vekile nkarhi wo horisa vanhu hinkwavo lava pfumelaka, hi nkarhi wa ku fuma ka Kreste Yesu, ku nga ri munhu un’we kumbe va nga ri vangani.—Eklesiasta 3:1; 9:11; 1 Vakorinto 15:25, 26.

Tsundzuka mhaka leyi ya nkoka: Vakreste a va ntshunxekanga eka makhombo lama hlaselaka rixaka ra vanhu naswona va tokota maxangu lama tolovelekeke evanhwini. “Miringo leyi mi nga na yona ya fana ni leyi yi nga ni vanhu van’wana.”—1 Vakorinto 10:13, The Jerusalem Bible.

Ndlela Yo Ya Eku Hlakarheleni

Rifu i nkarhi wa mihloti kun’we ni ku khongela hi mbilu hinkwayo eka Yehovha, Muyingisi wa xikhongelo. Sweswi, tshinelela Xikwembu ku tlula rini na rini. Sweswi, ku tlula rini na rini, phofula leswi nga embilwini ya wena hi ku khongelela ku kuma vutlharhi, leswaku u kuma ni matimba yo tiyisela. Bibele yi hi khutaza ku endla tano. Petro u ri: “Rhulani ku karhateka hinkwako ka n’wina eka xona, hikuva xi tikarhatela n’wina.” (1 Petro 5:7) Vona ndlela leyi marito ya Xikwembu eka Esaya 57:15 ma chavelelaka ha yona: “Ku v̌uriwa ŝeŝo hi L’a-nge-henhla-henhla, loyi šiluv̌elo ša yena [xi nga] ša masiku, ni loyi v̌ito ra yena ri kwetsimaka: nḍi ṭhama šiv̌andleni le’ši tlakukeke, ne ku kwetsimeni; kambe nḍi ni munhu l’a [nga ni gome, NW] ni l’a tiṭsongahataka.” Munhu la nga ni gome u namarhela Tatana; va va ni vuxaka lebyikulu ku tlula eku sunguleni. “Tshinelani kusuhi ni Xikwembu kutani xi ta tshinela kusuhi na n’wina,” ku tsala Yakobo. (Yakobo 4:8) Yakobo wa hi tiyisekisa leswaku Xikwembu xi tiyimisele ku hi nyika vutlharhi lebyi lavekaka ni matimba leswaku hi kota ku hlakarhela.

Ku engetela kwalaho, u ta kuma leswaku u va munhu la nga ni ntwela-vusiwana ni ntsetselelo lowukulu malunghana ni miringo ni maxangu ya van’wana. U ta yi tiva ku antswa ndlela leyi vanhu van’wana va titwaka ha yona ni ndlela yo nyikela marito ya nchavelelo ni ya ntshembo. U nga swi kota ku pfuna munhu la nga ni gome emahlomulweni yakwe. Ina, u ta va ni ntwela-vusiwana swinene eka van’wana lava nga emahlomulweni.—Vafilipiya 2:1.

Ku lahlekeriwa hi munhu la rhandzekaka swi nga hlomula mbilu ni ku vavisa hi nkarhinyana, kumbexana hi nkarhi wo leha. Kambe, eku heteleleni, swi nga endla leswaku u va ni langutelo lerinene hi ntshembo lowu taka, ntshembo wo tirhela Xikwembu u nga karhatiwi hi nchumu. Hi nga tlhela hi tiya eka vumunhu bya hina bya Vukreste.—1 Petro 1:6, 7.

Kutani ku nga khathariseki ku tikeriwa hi gome, u nga heli matimba! Vana ni pakani yo ya emahlweni u tirhela Xikwembu hi ku tshembeka, leswaku xi dzunisiwa ni ku xiximiwa, kutani u ta poniseriwa makumu.

[Laha Xifaniso Xi Humaka Kona eka tluka 29]

The Day Before Parting by Jozef Israels: Gift of Alice N. Lincoln, Courtesy, Museum of Fine Arts, Boston