Rifu—Ri Tshama Ri Ahlamise Nomu!

N’WAMATIMU wa le Britain la vuriwaka Arnold Toynbee u tsarile a ku: “Loko munhu a tswariwa swa tiveka leswaku a nga fa nkarhi wun’wana ni wun’wana.” U engeterile: “Naswona un’wana ni un’wana u ta hetelela a file.” Rifu ri hi vangela gome lerikulu loko ri dlaya xirho xa ndyangu lexi rhandzekaka kumbe munghana lonkulu!

Se ku hele magidi ya malembe vanhu va ri karhi va langutana ni rifu. Loko ku fa munhu loyi hi n’wi rhandzaka hi heleriwa hi mongo, hi titwa hi nga pfuni nchumu. Gome leri ri hlasela munhu un’wana ni un’wana. A ri hlawuli. “Gome ri hi hundzula vana—ri hlasela vanhu hinkwavo ku nga khathariseki leswaku va dyondze ku fikela kwihi. Ni vanhu lava tlhariheke swinene a va na tinhlamulo.” Marito wolawo ma tsariwe hi mutsari wa switsalwana wa lembe-xidzana ra vu-19. Hi hundzuka vana lavatsongo—a hi koti ku endla nchumu, a hi swi koti ku tlherisela xiyimo endzhaku. Ku va ni rifuwo kumbe matimba a swi ku endli u titwa u antswa. Lavo tlhariha ni lava nga ni vutivi a va na tona tinhlamulo. Lava tiyeke va rila ku fana ni lava tsaneke.

Hosi Davhida wa le Israyele wa khale u tshame a va ni gome ro tano loko ku fe n’wana wa yena Absalomu. Loko hosi leyi yi twa leswaku u file, yi ririle, yi bokoloka yi ku: “N’wananga Absalomu, n’wananga, n’wananga Absalomu! Oho, loko a ku fe mina, mina ematshan’weni ya wena Absalomu n’wananga, n’wananga!” (2 Samuwele 18:33) Hosi leyi ya matimba leyi hluleke valala lava nga ni matimba, a yi nga ta endla nchumu kambe yi lo navela onge loko ‘nala loyi wo hetelela, ku nga rifu,’ a a dlaye yona, ematshan’weni yo dlaya n’wana wa yona.—1 Vakorinto 15:26.

Xana rifu ri ta kala ri hela? Loko swi ri tano, hi wihi ntshembo lowu vafi va nga na wona? Xana hi ta tlhela hi va vona varhandziwa va hina? Xihloko lexi landzelaka xi ni tinhlamulo leti humaka eMatsalweni ta swivutiso leswi.