Swivutiso Swa Vahlayi

◼ I yini leswi vuriwaka eka 2 Samuel 18:8, leyi nge: “Šihlahla ši heta v̌anhu siku leri e ku tlurisa tlhari”?

Abšalom jaha lerinene ra Hosi Davhida ri lwisane ni vuhosi ivi ri sindzisa tata wa rona ku baleka eYerusalema. Endzhaku, emananga ya Efraim (kumbexana evuxeni bya Nambu wa Yordani) nyimpi yi humelerile exikarhi ka mavuthu ya Abšalom ni lamaya ya tshembekaka eka Davhida, Hosi leyi totiweke ya Yehova. Mhaka leyi nga eka 2 Samuel 18:6, 7 yi vika leswaku eka nyimpi leyi karihaka vavanuna va Davhida va dlele vaxandzuki va 20 000. Hi ku komisa, ndzimana leyi tlhandlamaka ya tlhandlekela: “Ku lwa ku eneta tiko hikwaro, kambe šihlahla ši heta v̌anhu siku leri e ku tlurisa tlhari.”

Van’wana va ringanyete leswaku leswi swi kombetela eka masocha lama xandzukeke lama bvanyangetiweke hi swivandzana swa nhova leswi tshamaka emintsandzeni. (1 Samuel 17:36; 2 Tihosi 2:24) Kambe ku dyiwa ko tano ka xiviri hi swihari a ku fanelanga ku vuriwa, ku ri loku tlulaka lokuya ka “tlhari” leri heteke lava dlayiweke enyimpini hi xiviri. Kahle-kahle, nyimpi ‘yi hangalakile ehenhla ka tiko hinkwaro leri a ri swi vona.’ Kutani nhlamuselo leyi fanaka hi leswaku vavanuna lava dlayiweke va Abšalom, lava a va baleka hi ku chava emakhwatini lama nga ni maribye, kumbexana va wele emakheleni ni milambu leyi fihlekeke, ivi va tlimbiwa hi swihlahla leswo tlhuma. Lexi tsakisaka, mhaka yi ya emahlweni yi hlamusela leswaku Abšalom hi byakwe u ve la hlaseriwaka hi xihlahla. Entiyisweni hikwalaho ka misisi yakwe leyo tala, nhloko yakwe yi phasiwile hi murhi lowukulu, yi n’wi siya a paluxeke hi laha ku nga hava mpfuno eka nhlaselo lowu dlayaka wa Yoab ni vavanuna vakwe. Ntsumbu wa Abšalom wu ‘lahleriwe exihlahleni ekheleni lerikulu, naswona nhulu leyikulu ya maribye yi thoperiwe ehenhla kakwe.’—2 Samuel 18:9-17.