Ri Kona Rungula Leri Tinyeleti Ti Ku Khomeleke Rona!

HI LAHA swi kombisiweke ha kona eka swihloko leswi hundzeke, ku nga khathariseki ku vangama loku tinyeleti ti ku humesaka, munhu a endleriwe ku ti languta hi ndlela leyi ti nga ha yona ntsena—tanihi swilo leswi nga hanyiki leswi vekiweke ematilweni hi Muvumbi hi xikongomelo xa yena n’wini. A ti nga endleriwanga ku gandzeriwa. Tanihi xiphemu xa ntumbuluko wa Yehovha lowo hlamarisa lowu landzelaka milawu ya yena, tinyeleti a ti fanele ku ‘vula ku kwetsima ka Xikwembu’ naswona hi nkarhi lowu fanaka ti tirha tanihi swivoningi eka munhu loko a ri karhi a hetisisa leswi Muvumbi a n’wi vumbeleke swona.—Pisalema 19:1; Deteronoma 4:19.

EBibeleni hi hlaya leswi: “Ku nga ṭhuki ku kumiwa munhu ni uṅwe ka wena l’a . . . hlahluv̌aka, ni mungoma, ni mulori, ni noyi, ni l’a v̌utisaka mimoya, ni l’a bvumbaka, ni l’a v̌utisaka v̌afi. Hikuv̌a uṅwana ni uṅwana l’a endlaka ŝilo leŝi, wa yila e ka Yehova.” (Deteronoma 18:10-12) Esaya u te: “A v̌a te [vatsundzuxi va wena] ŝeŝi v̌a ku ponisa, la’v̌a pimaka matilo, la’v̌a langutaka tinyeleti . . . V̌onani, v̌a hunḍukile byanyi.”—Esaya 47:13, 14.

Leswi Hi Nga Swi Dyondzaka ETinyeletini

Hambi swi ri tano, tinyeleti leti nga hanyiki ti nga hi byela swin’wana loko hi tsakela ku yingisa. Edwin Way Teale u tsarile: “Tinyeleti ti vulavula hi ndlela leyi munhu a nga nyawuriki ha yona, hi minkarhi ni mikarhi leyi nga pimekiki.” Ina, loko hi xiya leswaku tinyeleti leti hi ti vonaka hi mahlo ya hina ni vusiku lebyi nga riki na papa hi tona leti nga voniwa hi vakokwana-xinguwe va hina, malembe xidzana yo tala lama hundzeke, xana a swi hi tsongahati leswi? Xana a hi titwi hi xixima La Nge Henhla-henhla loyi a ti vumbeke “e ku sunguleni” naswona loyi endzhaku a endleke vanhu? Hosi Davhida wa Israyele hi ku dzunisa u tsarile: “Loko nḍi hlalela matilo, e ntiro wa tintiho ta wena, ni ṅhweti, ni tinyeleti leti u ti lungiseke; nḍi ku: munhu wa-ku-fa hi yini, leŝaku u ṅwi anakanya?” Matilo ya fanele ya hi endla hi titwa hi ri ehansi naswona ya hi endla hi tivutisa leswaku hi endla yini hi vutomi bya hina.—Genesa 1:1; Pisalema 8:3, 4.

Eka khamba rin’wana Davhida u khongerile: “Nḍi letele ku endla le’ŝi ranḍiwaka hi wena! Hikuv̌a u Šikwembu ša mina.” (Pisalema 143:10) Rhekhodo ya vutomi bya Davhida yi kombisa leswaku xikhongelo xa yena xi hlamuriwile. U dyondze ku endla ku rhandza ka Xikwembu hi laha ku kombisiweke ha kona eNawini wa xona. U tlhele a dyondza xikongomelo xa Muvumbi hi vanhu, naswona u tsale ha xona. “Ku sele nkarinyana, kutani lo’wo biha a nga ka a nga ha v̌i kona; . . . V̌a musa v̌a ta fuma misav̌a, v̌a ta tiṭakela e ku ruleni lo’kukulu ka v̌ona. . . . Fularela ŝo biha, u endla le’ŝinene, kutani u ta ṭhama hi laha ku nga heriki. . . . La’v̌o lulama v̌a ta fuma misav̌a, v̌a ta ṭhama ka yona hi masiku.” Ku tiva xikongomelo xexo swi tisa vutihlamuleri: “Fularela ŝo biha, u endla le’ŝinene.”—Pisalema 37:10, 11, 27-29.

Tinyeleti ti ni rungula leri fanaka eka vanhu hinkwavo. Handle ko tigandzela kumbe “ku titshega” hi tona, hi nga vona rirhandzu, vutlharhi ni matimba ya Muvumbi lama kombisiwaka eka tona. Dyondzo ya ntivo-tinyeleti, ku hambana ni vungoma bya tinyeleti, yi fanele yi hi endla hi dzunisa etimbilwini ta hina. Kambe ku tlula kwalaho, xana a swi hi vangeli leswaku hi navela ku dyondza leswi engetelekeke hi Xikwembu? U lunghiselele Rito rakwe, Bibele, leswaku ri tirhiseriwa sweswo. Loko u kume rungula leri etinyeletini, u ta swi kota ku tiva leswi Yehovha a swi lunghiseleleke vanhu naswona lexi nga xa nkoka swinene, u ta tiva ndlela leyi u nga tiphinaka ha yona hi mikateko leyi a nga va lunghiselela yona. Loko u ri na swivutiso hi Xikwembu ni xikongomelo xa vutomi, titwe u tshunxekile ku tihlanganisa ni Timbhoni ta Yehovha endhawini ya ka n’wina, kumbe u tsalela eka adirese ya le kusuhi leyi kombisiweke eka tlula 5.

[Xifaniso lexi nga eka tluka 8]

Tinyeleti ti nga hi dyondzisa ku titsongahata