Ku nga ri Khale—Hi Ta Tsakela Vutomi Bya Xiviri!
HI KU ya hi Bibele, Xikwembu a a xi kunguhate leswaku rixaka ra vanhu ri hanya hi laha ku nga heriki eparadeyisini ya misava hinkwayo. (Genesa 1:28; 2:8, 9) Entiyisweni, hi le kule ngopfu ni xikongomelo xo sungula xa Xikwembu. Ku humelele yini?
Mpatswa wo sungula wa vanhu a wu xi yingisanga Xikwembu, leswi wu tiseleke ku nga hetiseki ni rifu, wona swin’we ni vana va wona hinkwavo. (Genesa 2:16, 17; 3:6, 7, 17-19; Varhoma 6:23) Bibele ya hlamusela: “Xidyoho xi te emisaveni hi munhu un’we, naswona xidyoho xakwe xi te swin’we ni rifu. Hikwalaho, rifu ri hangalake erixakeni hinkwaro ra vanhu hikuva hinkwavo va dyohile.”—Varhoma 5:12, Today’s English Version.
Ku nga khathariseki xiyimo lexi, xikongomelo xa Xikwembu a xi hundzukanga. “Ku fana ni mpfula ni gamboko loko ŝi šika hi le tilweni, a ŝi tlheleri kona, ŝi nga si tšheleta misav̌a, ni ku mirisa, ni ku hlukisa le’ŝi milaka, ŝi nga si nyika mbewu e ka mubyari, ni ŝakudya e ka loyi a dyaka, ŝi tano ni rito ra mina, [ri ta] hetisa makungu ya mina.” (Esaya 55:10, 11) Xana Xikwembu xi tshembisa ku hi endlela yini?
MIKATEKO EHANSI KA MFUMO WA XIKWEMBU
Vutomi Lebyi Nga Heriki
“La’v̌o lulama v̌a ta fuma misav̌a, v̌a ta ṭhama ka yona hi masiku.”—Pisalema 37:29.
“Rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona.”—Nhlavutelo 21:4.
Nsirhelelo
“Ku sele nkarinyana, kutani lo’wo biha a nga ka a nga ha v̌i kona; u ta lav̌isisa šiv̌andla ša yena, kutani a ta v̌a a nga ha ri kona.”—Pisalema 37:10.
Ntirho Lowu Enerisaka
“Vanhu va ta aka tindlu ivi va tshama eka tona—a ti nge tirhisiwi hi un’wana munhu. Va ta byala tivhinya ivi va tiphina hi vhinyo—a yi nge nwiwi hi van’wana. Ku kotisa mirhi, vanhu va mina va ta hanya vutomi byo leha. Va ta tiphina hi laha ku heleleke hi swilo leswi va swi tirheleke.”—Esaya 65:21, 22, TEV.
Rihanyo
“A ku nga v̌i na munhu l’a akeke Yerusalem l’a nga ta ku: nḍa v̌abya! Tiko le’ri akeke kona ri riv̌aleriwile ŝidyoho ŝa rona.”—Esaya 33:24.
A Ku Nga He Vi Na Vugono
“Mahlo ya v̌o-fe-mahlo ma ta . . . hanyanya, ni tindlev̌e le’ti siv̌ekeke ti . . . ta pfuleka; ŝilema ŝi ta tlula kukota tinhlangu, kutani ririmi ra mbev̌ev̌e ri ta yimbelela hi ku ṭaka.”—Esaya 35:5, 6.
Ndzalo Ya Swakudya
“Ku ta v̌a ni nḍalo ya koro misav̌eni ni le tihlohlorini ta tinṭhav̌a.”—Psalm 72:16.
Ku Rhula
“Tanani, mi hlalela mitiro ya Yehova, leŝi a ŝi heriseke misav̌eni. O herise tinyimpi ku yisa e makuṅweni ya misav̌a.”—Pisalema 46:8, 9.
LESWI U FANELEKE KU SWI ENDLA
Xana u fanele ku endla yini leswaku u tiphina hi mikateko leyi Xikwembu xi yi tshembiseke? Bibele ya hlamula eka Yohane 17:3: “Kambe vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.” Ina, hi ku dyondza hi Xikwembu—vito ra xona, xikongomelo xa xona, ni milawu ya xona—hi nga vona ndlela. Ku tlula kwalaho, ku dyondza ha Yesu—vutomi byakwe emisaveni, gandzelo rakwe ra nkutsulo wa swidyoho swa hina, xikhundla xakwe tanihi Mufumi wa Mfumo wa Xikwembu—hi nga tiyiseka leswaku xikongomelo xa Xikwembu xi ta hetiseka.
Leswi Xikwembu xi nga pfumelela vubihi swi swi kombise erivaleni leswaku munhu, tanihi mufambi endhawini leyi a nga yi tiviki, a nge swi koti ku kongomisa minkondzo yakwe. (Yeremiya 10:23) I ntiyiso, hi tihulumendhe to tala—ku sukela eka ta mufumi un’we ku ya eka ta mfumo wa hinkwavo—munhu u ringetele gondzo rihi na rihi leri nga anakanyiwaka. Kambe, ku humelela ka yena a ku nyawulanga.
Hi fanele ku nkhensa swinene leswi Mfumo wa Xikwembu wu nga ta hlamula xikhongelo lexi endliwaka hi timiliyoni lexi nge: “Ku rhandza ka wena a ku endliwe misaveni, tanihi loko ku endliwa tilweni.” (Matewu 6:10) Mikateko ya Mfumo wa Xikwembu yi ta tsakeriwa emisaveni loko hi ku hatlisa wu siva tihulumendhe hinkwato ta vanhu. Bibele ya tshembisa: “E mikarini ya tihosi leti, Šikwembu ša matilo ši ta pfuša ku fuma lo’ku nga taka ku nga onhaki, ni siku riṅwe, kutani v̌uhosi bya kona byi nga ka byi nga hunḍeli ka tiko riṅwana; ku ta seletela ni ku herisa ku fuma kuloku hikwako, kambe kona ku ta v̌a kona hi laha ku nga riki na makumu.”—Daniyele 2:44.
Mawaku ndlela leyi nkarhi wolowo wu nga ta va wunene ha yona! Hakunene vutivi bya Bibele byi nga hi tata hi ntshembo. Ina, leyi i minkarhi yo nonon’hwa—naswona yi ya yi nyanya swinene. Kambe sweswo swi kombisa ntsena leswaku hi hanya emasikwini ya makumu ya mafambiselo lawa yo biha ya swilo. Ku nga ri khale minkarhi leyi yo homboloka yi ta siviwa hi minkarhi leyinene ehansi ka Mfumo wa Xikwembu!