Langutelo Ra Bibele
Xana Mimpimanyeto Ya Xikwembu A Yi Fikeleleki Hi Ku Olova?
“XIKWEMBU A XI PIMI VANHU HI SWISUNGUNU.”—XIVURISO XA KHALE XA LE SCOTLAND.
SWIKAMBELO swa le xikolweni, mimbulavurisano ya le mintirhweni, ni minhlahluvo ya ta mirhi ko va swin’wana swa swilo swa nkoka leswi hundzulaka vutomi bya munhu lebyi a pimiwaka hi swona. Kambe loko ku tiwa eku hanyeni siku na siku hi mimpimanyeto ya Xikwembu, vanhu vo tala va vona onge va nge swi koti ku yi fikelela. Xana hi yona ndlela leyi u anakanyaka ha yona? Xana u nga yi fikelela mimpimanyeto ya Xikwembu?
Leswaku u hlamula, a hi rhange hi languta mimpimanyeto ya Xikwembu leyi xi yi vekeleke vagandzeri va xona. Bibele yi yi veka erivaleni ndlela leyi hi faneleke ku famba ha yona evuton’wini. (Pisalema 119:105) Mutsari wa Bibele Hosi Solomoni wa vutlharhi u hete hi leswaku “fanelo hikwayo ya munhu” i ku “tšhav̌a Šikwembu, u hlayisa milawu ya šona.” (Eklesiasta 12:13) Muprofeta Mikiya u te: “Leŝi Yehova a ŝi lav̌aka e ka wena; hi leŝaku u endla le’ŝi lulameke, u ranḍa tintŝalo, ni ku famba hi ku tiṭongahata e mahlweni ka Šikwembu ša wena.”—Mikiya 6:8.
Yesu Kreste, N’wana wa Xikwembu hi xoxe, u vule leswaku ku hava swileriso leswi tlulaka ku “rhandza Hosi Xikwembu xa wena hi mbilu ya wena hinkwayo, ni moya wa wena hinkwawo, ni ku anakanya ka wena hinkwako, ni matimba ya wena hinkwawo” ni ku “rhandza munhu-kuloni, kukota loko u tirhandza.” (Marka 12:30, 31) Ku engetela kwalaho, hi komba leswaku hi rhandza Xikwembu hi ku yingisa swileriso swa xona hinkwaswo.—1 Yohane 5:3.
Hi ku kongoma swi vekiwa hi ndlela leyi, vanhu va fanele ku rhandza ni ku xixima Xikwembu, va yingisa swileriso swa xona, naswona va hanya ha swona, va va ni tintswalo eka van’wana, naswona va papalata ku tikukumuxa. Xana mimpimanyeto yo tano a yi fikeleleki?
Xikwembu Xa Twisisa
Xikwembu xi langutela vanhu hi laha ku faneleke leswaku va fikelela mimpimanyeto ya xona. Kambe, entiyisweni, xana u kona munhu loyi a fambisanaka hi laha ku heleleke ni mimpimanyeto leyi minkarhi hinkwayo? Entiyisweni a nga kona, hikuva hinkwerhu hi kume ndzhaka eka kokwa wa hina Adamu. (Varhoma 5:12) Xisweswo, hi ni mboyamelo wo dyoha. Kambe leswi a swi hi endli hi nga fanelekeli ku tirhela Xikwembu hi ndlela leyi xi yi amukelaka.
Ku kombisa leswi, anakanya hi swiphiqo swo dyondza ku chayela movha. Ku laveka vuxiya-xiya ni nkarhi leswaku u chayela kahle leswaku u kota ku humelela exikambelweni xo chayela. Kavula, hi boheka ku tirhela ku chayela kahle hambi loko se hi wu kumile mpfumelelo wo chayela. Loko hi ya hi kuma ntokoto, hi lota vutshila bya hina. Kambe vachayeri lava hetisekeke a va kona!
Lexi tsakisaka, Xikwembu xa twisisa loko hi tsandzeka. A xi omanga nhloko, a xi lavi leswi hi nga swi kotiki, naswona a xi tshameli ku xopa-xopa swihoxo. Xi twisisa laha hi tsandzekaka kona ni laha hi tsaneke kona. Hosi Davhida, la dyoheke swinene, u pfumerile: “A nga hi endlelanga hi mpimo wa ku dyoha ka hina,” ivi a engeta, “a nga hi rihisanga hi mpimo wa milanḍu ya hina.” Hikwalaho ka yini? “Hikuv̌a hi laha matilo ma tlakukeke henhla ka misav̌a, hi ŝeŝo nsov̌o wa [Xikwembu] wu kurile henhla ka la’va [xi] tšhav̌aka.” Hambi leswi Yehovha a tivaka leswaku ha dyoha, u tiyimisele ku veka swidyoho swa hina ekule “hi laha v̌uša byi hambaneke ni v̌upeladyambu.”—Pisalema 103:10-14.
U Nga Heli Matimba
Mugandzeri wa Xikwembu la tshembekeke wa hlamusela, “Loko ndzi ri ni gome, minkarhi yin’wana ndzi heta hi leswaku ndzi nga ka ndzi nga ha swi koti ku hanya hi mimpimanyeto ya Xikwembu. Kambe loko ndzi swi langutisisa kahle, ndza swi vona leswaku ndzi nga swi kota ku hanya hi ndlela leyi Xikwembu xi lavaka ndzi hanya ha yona. Kambe a swi olovi hi ndlela yoleyo!” U nga heli matimba loko u titwa hi ndlela leyi. A hi wena wo sungula, naswona a wu nge vi wo hetelela ku titwa hi ndlela leyi.
Muapostola wa Mukreste Pawulo, u swi pfumele erivaleni a ku: “Loko ndzi navela ku endla leswo lulama, leswo biha na swona swi kona eka mina. Mina hi xiviri xa mina ndzi tsakela Nawu wa Xikwembu; kambe eswirhweni swa mina ndzi kuma nawu wun’wana, lowu lwaka ni nawu lowu wu fambisaka mianakanyo ya mina; wu ndzi endla mubohiwa enawini wa ku dyoha . . . Yo! mina munhu wa khombo leronghasi!” Kambe a nga hetanga hi leswaku leswi Xikwembu xi swi languteleke a swi tika swinene, hikuva u engeterile: “I mani la nga ta ndzi ntshunxa emirini lowu wu ndzi yisaka eku feni xana? A ku nkhensiwe Xikwembu ha Yesu Kriste, Hosi ya hina! Ku hetisela emhakeni leyi, ndzi nga ku: Mina hi ndzexe, hambi ndzi tirhela Nawu wa Xikwembu hi mianakanyo ya mina, hi ntumbuluko wa mina wa laha misaveni ndzi tirhela nawu wa ku dyoha.” (Varhoma 7:21-25) Xisweswo u titwe a ha swi kota ku tsakisa Xikwembu hambi loko a ha ri mudyohi.
Yehovha, Mutumbuluxi wa hina wa rirhandzu, u hi rivalela swihoxo ni ku tsana ka hina hi risima ra gandzelo ra nkutsulo ra N’wana wakwe la rhandzekaka, Yesu. Muapostola Yohane u tsarile, “Loko un’wana a tshuka a dyoha, hi ni muyimeri eka Tatana, a nga Yesu Kriste la lulameke. Hi yena mhamba ya [mufunengeti wa] swidyoho swa hina.” (1 Yohane 2:1, 2) Xihinga lexi vangiwaka hi xidyoho ni lexi hi sivelaka ku fikelela mimpimanyeto ya Xikwembu leswaku hi va ni vuxaka na xona xa susiwa kumbe xi tshoviwa hi matimba ya gandzelo ra Kreste. Xisweswo ku vuyeteriwa vuxaka ni Xikwembu.
Loko hi ku titsongahata hi amukela lunghiselelo leri swi ta hi endla hi rivaleriwa, hikuva Xikwembu xi tshama ni “la tsongahatiweke ni la titsongahataka.” (Esaya 57:15, NW) Hi nga tshembela eka xona leswaku xi pfuxeta mimoya ya hina. Xi hi tshembise ku ‘pfuxa la tsongahatiweke.’ A hi fanelanga ku tshama hi ri ni gome loko hi tsandzeka ku yingisa Xikwembu hi laha ku hetisekeke. Ku ri na sweswo, hi nga tiyiseka leswaku Xikwembu xi nga ka xi nga honisi matshalatshala lawa hi ma endlaka ya ku hanya hi mimpimanyeto ya xona.—Pisalema 113:7; Vaheveru 6:10-12.
Hambi loko swi tika, u ta swi xiya leswaku wa tsaka loko u endla leswi tsakisaka Xikwembu. Ku tinyiketela eka Xikwembu swi endla vutomi byi byarheka eka wena ni le ka lava u nga na vona. Nakambe anakanya hi vumundzuku. Ku lwela ku hanya hi mimpimanyeto ya Xikwembu sweswi swi hi tisela ku langutela vutomi lebyi nga heriki ehansi ka swiyimo swa le paradeyisini.—Esaya 48:17; Varhoma 6:23; 1 Timotiya 4:8.
Vakhandziyi va tintshava lava nga ni ntokoto va swi xiya leswaku loko se va fike enhlohlorhini, va ha lo fika exikarhi. Va ha fanele ku ngirimela va hlayisekile. Hi ku fanana, lava va chavaka Xikwembu va fanele va fikelela mimpimanyeto ya Xikwembu naswona va hambeta va hanya ha yona.—Luka 21:19; Yakobo 1:4.
Chaveleleka hi ku tiva leswaku mimpimanyeto ya Xikwembu a yi tiki ngopfu lerova yi nga fikeleleki. Loko nkarhi wun’wana u tsandzeka ku fambisana na yona hi laha ku heleleke, kombela ndzivalelo wa xona. Tshembela enseketelweni wa xona wa rirhandzu. (Pisalema 86:5) Hikwalaho, leswi Yehovha ni N’wana wakwe va nga Vapfuni va wena, u nga yi fikelela mimpimanyeto ya Xikwembu xi tlhela xi ku amukela.—Swivuriso 12:2.