Ku Kambisisa Vuxongi Bya Khale Swinene Bya Vuvatli

Hi Muyimeri Wa Xalamuka! eNew Zealand

MIRHI leyi ngopfu-ngopfu yi kulaka endhawini yo karhi, yi sungula ku pfumaleka hi xihatla. Makhwati ma ya ma hunguteka hi mpimo lowu chavisaka etindhawini to tala ta misava. Ku pfumaleka ka mphakelo wa timhandzi ku vange ku tlakuka lokukulu ka nxavo wa timhandzi, leti ti nga wun’wana wa minchumu ya xisekelo emisaveni ni leyi khale a yi kumeka hi xitalo.

Lexi twisaka ku vava, laha New Zealand, ku ni masimu ya muphayini wa radiata lowu sunguriweke ku byariwa hi va-1930, kambe mirhi ya tiko leri, yo fana na rimu, kauri, beech ni kahikatea ya hunguteka.

Ku Rhandziwa Ngopfu Ka Ntsandza Lowu Tiyeke

Se ku hundze magidi-gidi ya malembe, munhu a ri karhi a endla swilo swo hambana-hambana leswi pfunaka, hi ku vatla. Muhlovo, xivumbeko xa vuvatli swin’we ni ku nun’hwela ka mixaka-xaka ya mirhi swi tsakise vanhu. Swivatliwa leswi nga ni mimpfuno yo hambana-hambana swi tisele vanhu ku eneriseka hi malembe yo tala, minkarhi yin’wana, hi magidi ya malembe.

Ku sukela khale, fanichara leyi endliweke hi ntsandza wo tiya a a yi tirhisiwa emakaya. Vavanuna ni vavasati va tirhise switirho swa khale, va kombise vutshila hi ku vatla swilo swo fana ni matafula, minkambana, swintsandzana, mimphongolo, tikhabodo ni switshamo.

Thekinoloji ya manguva-lawa yi engetele rivilo leri swilo swo tano swi endliwaka ha rona namuntlha. Switirho swa matimba, swo tanihi tisaha, michini yo borha, timbatlo ni michini yo hutha, hambiloko swi ri ni pongonyana, a swi dyi nkarhi loko ku vatliwa mhandzi leswaku yi va mhandzi ya fanichara leti tiyeke. Matiko yo tala ma tinyungubyisa hi ku va ni tindhawu ta vuvatli leti humesaka fanichara yo tala hi nxavo wa le hansi.

Kambe fanichara yo tano hakanyingi a yi tiyanga hikuva yi va yi endliwe hi (1) swilo leswi langutekaka onge i ntsandza, (pulanga ro lala, bodo leyi endliweke hi phepha) ematshan’weni ya ntsandza wunene, kumbe (2) maendlelo ya ku hlanganisa hi xihatla, lama tirhisaka michini yo hlanganisa kumbe tiharhana kumbe swipikiri.

Ku Tlhelela Nakambe Eka Mbatlo

Hikwalaho ko lava ku fikelela leswi thekinoloji ya manguva lawa yi tsandzekaka ku swi endla, van’wana va sungule ku tirhisa xitirho xa khale xo vatla ha xona—mbatlo. Wu hlamuseriwa tanihi “xitirho xo tsema lexi govekeke, lexi nga ni mbhinyi naswona ngopfu-ngopfu xi tirhiseriwa ku vatla mhandzi.” Le New Zealand, Vamaori va tirhise mbatlo lowu endliweke hi ribye ra rihlaza (jade) leswaku va kovotla mabyatso ni ku vatla timhandzi leti nga ta kovotliwa. Hambiswiritano, mimbatlo yo tala leyi nga kona namuntlha, yi endliwe hi nsimbi.

Hi malembe xidzana lama hundzeke, vavatli va tirhise mbatlo ku endla marimba ni ku endla swikepe. Va sasekise mapulanga va ma manye hi milenge ya vona, va tirhisa tlhelo leri govekeke ra mbatlo ku kovotla mhandzi.

Xitirho-kulobye—Mukwana Wo Vatla

Ku antswisa ku languteka ka nchumu lowu vatliwaka, ku tirhisiwa mukwana wo vatla lowu nga xitirho-kulobye lexikulu xa mbatlo. Wona wu tirhiseriwa ku sasela makumu ni vuandlalo bya mhandzi. Mbatlo swin’we ni mukwana wo vatla, haswimbirhi swi fanele ku tshama swi lotiwile.

Loko wo kala u kuma switirho leswi, magoza lama nga ta landzela i ku ya lava mhandzi leyi faneleke, kutani u yi hundzula nchumu wihi ni wihi wa fanichara leyi u yi lavaka. Hi ku ya hi vavatli, endlelo leri ra xikhale, ro tirhisa mhandzi yinene ku endla fanichara, ri xiyiwa ri ri rinene ngopfu loko ri pimanisiwa ni tindlela ta manguva-lawa to endla fanichara.

Mapulanga lama sahiweke, loko ma omile naswona ma nga gombonyokanga, ma nga vatliwa ma va fanichara yo tiya yi tlhela yi saseka. Mapulanga yo tano ma nga endliwa hi swilo swo hambana-hambana: fanichara leyi cukumetiweke (tiwadirobo, tinhloko ta mibedo, matafula) mabokisi ya khale ya mpahla, timhandzi leti kumekaka eka miako leyi hirimuxiweke ni timhandzi ta khale to biyela.

Mhandzi Leyi Pfuxetiweke—Yi Tlhela Yi Tirhisiwa

Mhandzi ya khale leyi nga dyiwangiki hi muhlwa naswona yi nga bolangiki, loyi a nga ni vutshila a nga yi hatimisa yi tlhela yi saseka.

Swivati, timbhovo ta swipikiri ni swikhutu swi nga endla mhandzi leyi pfuxeriwaka ku endla fanichara yi languteka hi ndlela leyi nga tolovelekangiki. Loko yi tshikiwa yi ri ni xivumbeko xa yona xa ntumbuluko kumbe yi pendiwa mihlovo ni ku pholichiwa, xivatliwa xa wena xi ta va lexi tsakisaka ni lexi enerisaka, xi languteka xi ri lexi endliweke kahle ni lexi nga ta tshama nkarhi wo leha.

Tanihi mutirhi wa le ntangeni loyi a fukulaka misava, muvumbi loyi a pfuvaka vumba, ni muswuli la swulaka ntambu, muvatli la vatlaka mhandzi hi ku tirhisa mbatlo kumbe mukwana wo vatla na yena u kuma ntirho wolowo wu ri lowu vuyerisaka. Ina, i ntirho wo nonon’hwa. Naswona wu teka nkarhi wo leha ku ri ni maendlelo ya manguva-lawa lama hatlisaka. Hambiswiritano, mianakanyo ya leswaku ku tikarhata ka wena ku ta ku tisela ntsako ni leswaku fanichara ya wena leyi vatliweke yi ta tirhisiwa malembe ni malembe hi lava nga ti yi amukela, swi hoxa xandla eka ntsako lowu kumiwaka hi ku endla ntirho lowu wa vuvatli lowu ku nga khale wu ri kona.

Swiringanyeto Malunghana Ni Vutshila Byo Vatla

A hi timhandzi hinkwato leti u nga tirhisaka mbatlo eka tona. Tinsinga ta timhandzi to tsindziyela leti kumekaka eka tindhawu to hisa hakanyingi ta nonon’hwa loko ti vatliwa hi mbatlo. Hi ntolovelo, timhandzi to olova, ta vatleka loko u tirhisa mbatlo. Swikhutu a swi vi xiphiqo. Loko u tirhisa mukwana wo goveka (chizele yo goveka), u nga swi xokola swi huma, xisweswo ku va ni xivumbeko xo hlawuleka emhandzini leyi u yi lunghiselelaka.

Muhlovo wun’wana wa kahle, wu kumeka eka mapulanga lama sahiweke embilwini ya nsinya. Fanichara leyi endliweke hi mapulanga lawa a hi kanyingi ma lavaka ku pendiwa ma cinciwa muhlovo. Hambiswiritano, loko u navela ku endla xivatliwa xi va ni muhlovo wo karhi, ku ni mihlovo yo hambana-hambana ya pende leyi nga endlaka muhlovo lowu u wu lavaka.

Ku endla leswi a hi nchumu lowu dyaka mali yo tala. Vanhu van’wana va tirhise girisi ku tota pulanga ro kwalala kumbe ro vonikela, kutani va kume leswaku nchumu lowu va wu vatleke wa tsakisa.

Leswaku u endla xivatliwa xa wena xi saseka, u nga ha tota mixaka yo hambana-hambana ya polyurethanes kumbe ya lacquers eka fanichara ya wena. Leswaku u endla xivatliwa xa wena xi languteka xi ri xa ntumbuluko, u nga ha xi tota mafurha yo pholicha lama endliweke hi leswi landzelaka: swiphemu swa ntlhanu swa vhiniga, swiphemu swa mune swa tarpantini, swiphemu swimbirhi swa mafurha ya linseed, xiphemu xin’we xa xipiriti. Chela mhula eka mpfangano lowu, kutani u wu tshika wu tswongiwa hi mhandzi masiku yo hlayanyana.

Vutshila Lebyi Enerisaka

Fanichara leyi tiyeke leyi vatliweke hi wena n’wini, minkarhi hinkwayo yi ta ku tsakisa loko yi tshame endhawini leyi u yi rhandzaka emutini wa wena, hambiloko muti wa wena wu nga nyawuli. Emisaveni hinkwayo, etindlwini letikulu ni le swiyindlwanini, munhu a nga kuma swikombiso swo tala leswi tsakisaka, swa swivatliwa swo saseka leswi endliweke hi vatshila va ku vatla, swin’wana swa swona swi nga ha va swi ri ni magidi ya malembe swi ri kona. Entiyisweni lebyi i vumbhoni bya vutshila, ku gingiriteka ni ku lehisa mbilu loku vanhu vo tano va nga na kona. Va kume ku eneriseka ni ntsako hi ku endla swilo leswi loko swo hlayisiwa hi rirhandzu, swi tisaka ntikelo ni vuxongi. Swi tlhela swi engetela vuxongi eka miako leyi swi nga eka yona.

Eka nguva leyi, leyi tirhisaka swinene tipulasitiki ni swikotiri, nsinya, lowu ku nga nyiko yo huma eka Muvumbi wa hina, wa ha endla swilo swo tala leswi pfunaka. Ntirho lowukulu wa nsinya, lowu nga nyiko leyi humaka eka Xikwembu i ku humesa mhandzi leyi loko muvatli a yi languta yi n’wi endlaka a ehleketa ku yi endla yi va fanichara yo saseka.

[Swifaniso leswi nga eka tluka 23]

“Rimu”

“Tawa”

“Oak”

Muphayini wa “radiata” lowu nga ni xikhutu

Pulanga ra muphayini leri vanichiweke

Pulanga ra muphayini leri totiweke girisi

Pulanga ra muphayini ra ntima

[Swifaniso leswi nga eka tluka 24]

Ku tirhisa mbatlo

na mukwana wo vatla

[Xifaniso lexi nga eka tluka 25]

Khabodo leyi endliweke hi mavoko

[Xifaniso lexi nga eka tluka 25]

Vuhirhi bya tikhona