Ntshembo Lowu Tiyeke
EMALEMBENI ya kwalomu ka 2 000 lama hundzeke, Yesu, loyi hakanyingi a vuriwaka nghwazi leyi tshameke yi hanya, u avanyiseriwe rifu swi nga fanelanga. Loko a ha lenga emhandzini ya nxaniso, muendli wa leswo biha loyi a a lenga etlhelo kakwe u monyile a ku: “Hi wena Kreste, a hi swona ke? Ti ponise swin’we na hina.”
Loko a vule sweswo, muendli un’wana wa leswo biha loyi na yena a a avanyiseriwe rifu, u tshinye wanuna yoloye a ku: “Xana Xikwembu a wu xi chavi nikatsongo, leswi u kumeke vuavanyisi lebyi fanaka? Naswona hina byi hi lulamerile hakunene, hikuva hi kuma hi ku helela leswi swi hi lulameleke hikwalaho ka swilo leswi hi swi endleke; kambe munhu loyi a nga endlanga nchumu lexi humeke endleleni.” Hiloko a hundzukela eka Yesu, a kombela: “U ndzi tsundzuka loko u nghena emfun’weni wa wena.”
Yesu u hlamule a ku: “Ndzi tiyisile namuntlha ndzi ri eka wena, U ta va na mina eParadeyisini.”—Luka 23:39-43.
Yesu a a ri ni ntshembo lowunene lowu vekiweke emahlweni ka yena. Muapostola Pawulo u tsale vuyelo lebyi ntshembo lowu wu veke na byona eka Yesu, a ku: “Hikwalaho ka ntsako lowu a wu vekiwe emahlweni ka yena u tiyisele mhandzi ya nxaniso, a tsan’wa tingana.”—Vaheveru 12:2.
Xin’wana lexi a xi katseka eka “ntsako” lowu vekiweke emahlweni ka Yesu a ku ri ku tlhela a hanya ni Tata wakwe etilweni kutani a hetelela a va Hosi ya Mfumo wa Xikwembu. Tlhandla-kambirhi, a a ta tlhela a tsakela ku va amukela etilweni valandzeri vakwe lava n’wi seketeleke ni lava tshembekeke leswaku va va tihosi na yena ehenhla ka misava. (Yohane 14:2, 3; Vafilipiya 2:7-11; Nhlavutelo 20:5, 6) Kutani, xana Yesu a a vula yini loko a tshembisa munhu la endleke leswo biha loyi a hundzukeke leswaku u ta va na yena eParadeyisini?
Hi Wihi Ntshembo Wa Muendli Wa Leswo Biha?
Munhu yoloye a nga fanelekanga ku fuma na Yesu etilweni. A nga kona exikarhi ka lava Yesu a vuleke leswi ha vona: “Hi n’wina mi khomeleleke swin’we na mina emiringweni ya mina; kutani ndzi endla ntwanano swin’we na n’wina, hilaha Tata wa mina a endleke hakona ntwanano wa mfumo swin’we na mina.” (Luka 22:28, 29) Kambe, Yesu u tshembise leswaku muendli wa leswo biha u ta va na yena eParadeyisini. Xana xitshembiso xexo xi ta hetiseka njhani?
Yehovha Xikwembu u veke wanuna ni wansati wo sungula, Adamu na Evha eParadeyisini, ku nga ntanga wo saseka lowu vuriwaka Edeni. (Genesa 2:8, 15) Edeni a yi ri emisaveni, naswona Xikwembu a xi ri ni xikongomelo xa leswaku misava hinkwayo yi va paradeyisi. Hambiswiritano, Adamu na Evha a va xi yingisanga Xikwembu kutani va humesiwile ekaya ra vona ro saseka. (Genesa 3:23, 24) Kambe Yesu u paluxe leswaku Paradeyisi yoleyo yi ta vuyisiwa nileswaku yi ta hlanganisa misava hinkwayo.
Loko muapostola Petro a vutisa Yesu leswaku yena ni vaapostola-kulobye va ta kuma yini loko va n’wi landzela, Yesu u tshembisile: “Eku tumbuluxeni hi vuntshwa, loko N’wana wa munhu a tshama ehansi exiluvelweni xakwe lexi vangamaka, na n’wina lava mi ndzi landzeleke mi ta tshama eswiluvelweni swa 12.” (Matewu 19:27, 28) Xa nkoka, eka rungula ra Luka leri tameleke bulo leri, ematshan’weni ya ku vula a ku “eku tumbuluxeni hi vuntshwa,” Yesu u tshahiwa a ku “emafambiselweni lama taka ya swilo.”—Luka 18:28-30.
Hikwalaho, loko Yesu Kreste a tshama etilweni exiluvelweni xakwe lexi vangamaka, swin’we ni lava va nga ta fuma na yena, u ta simeka fambiselo lerintshwa ro lulama ra swilo. (2 Timotiya 2:11, 12; Nhlavutelo 5:10; 14:1, 3) Hi ku tirhisa mfumo wa le tilweni wa Kreste, xikongomelo xo sungula xa Xikwembu xa leswaku misava hinkwayo yi va paradeyisi xi ta hetiseka!
Loko Mfumo lowu wu fuma, Yesu u ta hetisisa xitshembiso xakwe lexi a xi endleke eka xigevenga lexi feleke etlhelo kakwe. U ta xi pfuxa, naswona munhu yoloye u ta va mufumiwa wa Yesu wa laha misaveni. Kutani mudyohi loyi u ta nyikiwa lunghelo ro hlangavetana ni swilaveko swa Xikwembu ni ku hanya hilaha ku nga heriki ehansi ka ku fuma ka Mfumo laha misaveni. Kunene, hi fanele hi tsakela ntshembo lowu sekeriweke eBibeleni wa ku hanya hilaha ku nga heriki eParadeyisini laha misaveni!
Vutomi Byi Nga Va Ni Xikongomelo
Ehleketa hi xikongomelo lexi ntshembo wolowo lowukulu wu nga vaka na xona evuton’wini bya hina. Wu nga pfuna ku sirhelela mianakanyo ya hina eka mimbuyelo yo biha leyi vangiwaka hi ku ehleketa swilo leswi hoxeke. Muapostola Pawulo u fanise ntshembo wolowo ni xitlhangu xa moya. U vule leswaku hi fanele hi vehela “ntshembo wa ku ponisiwa” wu “va xihuku xa hina.”—1 Vatesalonika 5:8; Pisalema 37:29; Nhlavutelo 21:3, 4.
Ntshembo wolowo wu ponisa vutomi. EParadeyisini leyi taka, xivundza xi ta siviwa hi mihloti ya ntsako loko vanhu lava a hi va rhandza va tlheriseriwa evuton’wini hi “Xikwembu lexi pfuxaka lava feke.” (2 Vakorinto 1:9) Kutani ku tshoveka mbilu loku vangiwaka hi ku tsana, hi switlhavi ni hi vugono ku ta rivariwa, hikuva “la khutaka u ta tlula kukota mhunti.” “Nyama” ya munhu ‘yi ta va yintshwa ku tlula evuntshweni,’ naswona u ta ‘vuyela emasikwini ya matimba yakwe ya vuntshwa.’—Esaya 35:6; Yobo 33:25.
Hi nkarhi wolowo, loko ku ri “hava munhu la tshamaka kona la nga ta ku: ‘Ndza vabya,’” gome leri vangiwaka hi vuvabyi lebyi tshamaka byi ri kona a ri nge he fiki emianakanyweni. (Esaya 33:24) Ntshikilelo lowu hambetaka, wu ta hundzuriwa wu va “ku tsaka hilaha ku nga riki na makumu.” (Esaya 35:10) Ku heleriwa hi ntshembo loku vangiwaka hi vuvabyi lebyi nga tshungulekiki ku ta herisiwa swin’we ni rifu, ku nga nala wa khale wa munhu.—1 Vakorinto 15:26.
[Swifaniso leswi nga eka tluka 18]
Tshama u ri karhi u anakanya hi ntshembo lowunene wa Xikwembu wa misava leyintshwa