Ku Pfula Ndlela Yo Tlhelela eParadeyisini

“[Yesu] a ku ka xona: ‘Kunene ndzi ri ka wena namuntlha, U ta va na mina eParadeyisini.’”—LUKA 23:43, “NW.”

1, 2. (a) Xana “paradeyisi” ri vula yini naswona ntanga wa Edeni wu fanele wu fane na yini ke? (b) Rito ra Xiheveru leri nge “ntanga” ri hundzuluxeriwa njhani eka Matsalwa ya Xigriki ya Vukriste?

NDYANGU wa vanhu wu sungule eParadeyisini. Malunghana ni ku vumbiwa ka munhu, ebukwini yo sungula ya Matsalwa yo Kwetsima ha hlaya: “Kutani Yehova Šikwembu a v̌umba munhu hi nṭhuri wa misav̌a, a huhutela e tinhompfini ta yena e ku hefemula ka v̌utomi, ka v̌a loko munhu a endliwe šiv̌umbiwa le’ši hanyaka. Kutani Yehova Šikwembu a endla ntanga e tikweni ra Eden, hi tlhelo ra v̌uša, kutani a v̌eka kona e munhu loyi a nga ṅwi v̌umba.” (Genesa 2:7, 8) Vito “Eden” ri vula “Ntsako,” kutani ntanga wa Edeni a wu ri phaka yo saseka ya ntsako, leyi nga ni swivumbeko swo tala swo hambana-hambana swo saseka.

² Rito “paradeyisi” ri tekiwe eka ririmi ra Xigriki, naswona hi ririmi rero ri vula ntanga lowu fanaka ni phaka. Rito ra Xigriki leri tirhisiweke ku hundzuluxela riviti ra Xiheveru gan, leri vulaka “ntanga,” i pa·raʹdei·sos. Matsalwa lama sukelaka eka Matewu ku ya eka Nhlavutelo ma tsariwe hi ririmi ra Xigriki naswona rito leri ra Xigriki ri tirhisiwile ku rhekhoda marito ya Hosi Yesu Kriste loko a tokota xigwevo xa rifu emhandzini ya nxaniso eGolgota hi Nisan 14 ya lembe ra 33 C.E.

Xitshembiso Xa Yesu Xa Paradeyisi Eka Mudyohi

3. (a) Mudyohi la nga ni ntwela-vusiwana u kombele yini eka Yesu? (b) Xikombelo xa mudyohi xi kombise yini malunghana ni ripfumelo ra xona ehenhleni ka Yesu ke?

³ Hi nkarhi wolowo, vadyohi vambirhi a va beleriwile ematlhelo ka Yesu. Un’wana wa vona u tshikile ku rhukana Yesu hi mukhuva lowu nsulavoya ya vumbirhi leyi beleriweke eka tlhelo lerin’wana ra Yesu yi hambeteke yi endla ha wona. Mudyohi wa ntwela-vusiwana u hundzulukile ivi a ku: “Yesu, ndzi anakanye, loko u nghena eMfun’weni wa wena,” xisweswo a kombisa ripfumelo leswaku Yesu, hambi loko a hayekiwile etlhelo ka yena, a a rindzele mfumo enkarhini lowu taka. (Luka 23:42; Marka 15:32) Vona ndlela leyi sweswo swi faneleke swi khumbe mbilu ya Hosi Yesu ha yona! Xigevenga xexo lexi nga ni vunghana a xi kholwa leswaku Yesu Kriste a a ri hava nandzu ni leswaku a a nga faneriwanga hi xigwevo xo vavisa xo tanihi ku beleriwa erivaleni hi ndlela leyi nyumisaka. (Luka 23:41) U swi kombise hi xikombelo xa yena leswaku a a tshemba ku Yesu u ta pfuxiwa eku feni naswona u ta ta emfun’weni. Mudyohi nakambe u kombise ripfumelo leswaku yena hi yexe a nga kuma ku pfuxiwa ni leswaku Yesu u ta va Yena la nga ta n’wi vitana eku feni ivi a n’wi nyika vutomi lebyi pfuxetiweke emisaveni.

4. Xana Yesu u xi hlamurise ku yini xikombelo xa mudyohi, leswi kombisaka yini?

⁴ Loko Yesu a te eka yena: “Kunene ndzi ri ka wena namuntlha, U ta va na mina eParadeyisini,” u kombetele eku pfuxiweni ka mudyohi yoloye la nga ni ntwela-vusiwana. Wolowo wu fanele wu ve nchavelelo wa xiviri eka xigevenga lexi kombiseke ripfumelo. Leswaku ku pfuxiwa ka munhu yoloye ku humelela, Yesu a a fanele ku pfuxiwa ku sungula. Kutani ke, hi ku tirhisa matimba ya yena ya ku pfuxa vafi lawa a ma nyikiweke hi Xikwembu, Yesu a a ta vitana mudyohi loyi eku feni hi siku ra ku pfuxa misava ya vanhu eku feni.—Luka 23:43; Yohane 5:28, 29; 1 Vakorinto 15:20, 23; Vaheveru 9:15.

5, 6. (a) Xana Mulawuri Pontiyo Pilato a a tsale yini ehenhla ka Yesu la beleriweke? (b) Xana Yesu u fanele a vulavule ni mudyohi hi ririmi rihi?

⁵ Yesu u xi nyike hi ririmi rihi xitshembiso xexo ke? A ku tirhisiwa to hlayanyana hi nkarhi wolowo. Leswi swi kombisiwa hi marito lawa Mulawuri Pontiyo Pilato a endleke leswaku ma tsariwa ehenhla ka nhloko ya Yesu Kriste la beleriweke, a n’wi kombisa leswaku vahundzi va ndlela hinkwavo va hlaya. Mhaka leyi nga eka Yohane 19:19, 20 yi ri: “Pilato a tsala ni papila ra xitiviso, a ri nameka ehenhla ka [mhandzi ya nxaniso]. Leswi a swi tsariwile hi leswi: ‘Yesu wa Nazareta, hosi ya Vayuda.’ Vayuda lavo tala va hlaya xitiviso xexo, hikuva ndhawu leyi Yesu a nga vambiwela ka yona, a yi ri kusuhi ni muti; na swona, papila a ri tsariwile hi Xiheveru, ni Xilatini, ni Xigriki.”

⁶ Hi ku tswariwa ka yena eBetlehema hi mana wakwe wa wanhwana, Mariya, Yesu u tswariwe a ri Muyuda, kumbe Muheveru. Hikwalaho ke, eku chumayeleni ka yena malembe manharhu ni hafu etikweni leri a tswariweke eka rona, entiyisweni u chumayele hi ririmi ra nkarhi wolowo ra Xiyuda kumbe Xiheveru. Hikwalaho ke, loko a vula marito lama tiyisaka eka mudyohi la nga ni ntwela-vusiwana, swi nga ha endleka a vulavule Xiheveru. Kutani ke, u fanele a tirhise rito gan ra Xiheveru loko a vula Paradeyisi—rito leri kumekaka eka Genesa 2:8. Kwalaho, ku hundzuluxela ka Septuagint ya Xigriki ka Matsalwa layo Kwetsima ku tirhisa rito pa·raʹdei·sos loko ku hundzuluxela rito ro sungula leri nge gan.

7. Yesu u kwetsimisiwe njhani loko a pfuxiwile?

⁷ Yesu u pfuxiwe eku feni hi siku ra vunharhu endzhaku ka ku beleriwa kakwe, kumbe hi Nisan 16 ra khalendara ya Xiheveru. Makume-mune wa masiku endzhakunyana u tlhelele etilweni, kaya ra yena ra xiviri, sweswi a a ri eka xiyimo lexi tlakukeke swinene. (Mintirho 5:30, 31; Vafilipiya 2:9) Sweswi a a ambexiwe ku nga fi, mfanelo leyi a yi avelanaka ni Tata wakwe wa le tilweni. Yehova Xikwembu a a ri yena ntsena La nga ni ku nga fi ku kondza ku fika ku pfuxiwa ka Yesu eku feni hi Sonto yoleyo, Nisan 16.—Varhoma 6:9; 1 Timotiya 6:15, 16.

Nkutsulo Wu Pfula Ndlela

8. A xi ri xihi xikongomelo xo sungula xa Yehova malunghana ni misava naswona i yini lexi kombisaka leswaku u khomelela eka xikongomelo xexo?

⁸ Hinkwawo lawa a ku ri magoza exikongomelweni xa Xikwembu xo endla misava hinkwayo yi ambexiwa hi ku saseka ka Paradeyisi, ina, yi va Paradeyisi ya misava hinkwayo. (Genesa 1:28; Esaya 55:10, 11) Eka 1 Vakorinto 15:45, muapostola Pawulo u vulavula ha Yesu tanihi “Adamu lowo hetelela.” Leswi swi kombisa leswaku Xikwembu xi khomelele eka xikongomelo xa xona xo sungula malunghana ni misava ni leswaku un’wana u ta hetisisa xikongomelo lexi Adamu wo sungula a tsandzekeke ku xi hetisisa.

9. Yesu u lunghiselele yini ku pfula ndlela yo tlhelela eParadeyisini?

⁹ Hi ku ya hi Pawulo, Yesu u nyikele “nkutsulo lowu yelanaka.” (1 Timotiya 2:6, NW) Yesu Kriste hi yexe u te: “Hi mukhuva lowu, N’wana-wa-Munhu a nga telanga ku tirheriwa, kambe ku tirhela van’wana ni ku nyiketa vutomi bya yena ku kutsula lavo tala.” Leswi swi endle swi koteka eka lava kombisaka ripfumelo eka Yesu Kriste leswaku va kuma vutomi lebyi nga heriki.—Matewu 20:28; Yohane 3:16.

10. (a) Xikwembu a xi tiyimisele yini malunghana ni nhlayo leyi hikiweke ya vanhu lava katekeke ke? (b) Xana ku hlawuriwa ka “ntlhambinyana” ku sungule rini naswona hi mani?

¹⁰ Loko Yesu a tlhandlukele etilweni endzhaku ka ku pfuxiwa kakwe eku feni, a a ta swi kota ku nyikela ntikelo wa gandzelo rakwe ra nkutsulo eka Xikwembu hikwalaho ka ndyangu wa vanhu. Hambi swi ri tano, a ku ri xikongomelo xa Tata wakwe wa le tilweni, Yehova Xikwembu, ku humesa ‘vanhu va vito ra yena’ exikarhi ka matiko ya misava. (Mintirho 15:14) Hi ku ya hi Nhlavutelo 7:4 na 14:1-4, lava va ta vumba nhlayo ya vanhu va 144 000 ntsena, “ntlhambinyana,” lava vitaneriweke Mfumo wa Xikwembu wa le tilweni. (Luka 12:32) Ku hlawuriwa ka lava va rhandziwaka swinene hi Yehova Xikwembu ku sungule hi ku hlawuriwa ka vaapostola va Yesu Kriste va 12. (Matewu 10:2-4; Mintirho 1:23-26) Eka swirho swa xisekelo swa bandlha rakwe Yesu u te: “A hi n’wina mi ndzi hlawuleke; hi mina ndzi mi hlawuleke.” (Yohane 15:16) Lava a va ta rhangela ntirho wa ku twarisa ku ta ka Paradeyisi ya misava hinkwayo ehansi ka ku fuma ka Mfumo.

Ku Fika Ka Mfumo

11. Mfumo wa Vumesiya a wu fanele wu simekiwa rini?

¹¹ Hi vito ra Hosi Yesu Kriste, hina namuntlha hi hambeta hi yisa xikhongelo eka Yehova leswaku Mfumo wa Yena wu ta. (Matewu 6:9, 10; Yohane 14:13, 14) Mfumo wa Vumesiya a wu fanele ku simekiwa eku heleni ka “minkarhi [leyi vekiweke] ya vamatiko.” (Luka 21:24) Minkarhi ya Vamatiko yi hetiseke hi lembe ra 1914.a

12. Ku humelele yini hi 1914 hi ku pfumelelana ni vuprofeta bya Yesu bya swilo leswi xiyekaka leswi nga ta kombisa vukona bya yena lebyi nga vonakiki?

¹² Lembe rero ri funghiwe hi nyimpi yo sungula ya misava evurungurwini bya vanhu. Leswi a swi fambisana ni vuprofeta bya Yesu hi swilo leswi xiyekaka leswi a swi ta kombisa vukona bya yena lebyi nga vonakiki ematimbeni ya Mfumo ehenhla ka misava. Vadyondzisiwa vakwe va n’wi vutise xivutiso lexi: “Hi byele, xana swilo leswi swi ta humelela rini, ni xikombiso xa vukona bya wena ni xa ku hela ka mafambiselo ya swilo xi ta va xihi ke?” Loko a hlamula Yesu u te: “Tiko rin’wana ri ta pfukela tiko rin’wanyana, mfumo wun’wana wu ta lwa ni mfumo wun’wanyana; ku ta va ni tindlala, ni ku tsekatseka ka misava ematlhelweni layo tala. Swilo leswi hinkwaswo i ku sungula ka mahlomulo. Kutani Evangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.”—Matewu 24:3, 7, 8, 14, NW; Marka 13:10.

13. (a) Ku chumayeriwa ka Mfumo wa Xikwembu i mahungu lamanene hi ndlela yihi? (b) Xana swikhongelo swa Mfumo wa Xikwembu a swi ri karhi swi nyikeriwa hi nkarhi wo tani hi kwihi, naswona xana timbhoni ta xona emisaveni a ti karhalanga ku nyikela swikhongelo leswi ke?

¹³ Mahungu lawa lamanene ya Mfumo wa Yehova sweswi ma karhi ma chumayeriwa ematikweni yo tlula 200 naswona matshalatshala ya ku ma ndlandlamuxela eka tinsimu tin’wana ma karhi ma endliwa. I mahungu, hayi ya hulumendhe ya misava leyi nga ta ta, kambe ya mfumo lowu sweswi wu lawulaka, lowu ana se wu fumaka. Mfumo wolowo wu simekiwe hi 1914. Wu sungule goza ro hlamula xikhongelo lexi Yesu a xi vuleke malembe lama tlulaka 1 900 lama hundzeke. Xikhongelo xexo a xi yisiwa eka Musunguri wa Mfumo wolowo lowu ku sukela khale loyi a nga ta va Hosi ya hulumendhe yoleyo a dyondziseke vadyondzisiwa vakwe ku wu khongelela. Hikwalaho Musunguri wa Mfumo wolowo a a ri karhi a yingisa xikombelo xa wona hi nkarhi wo leha. A a tsaka ku twa xikhongelo xi tisiwa eka yena hi timbhoni takwe emisaveni hi nkarhi wolowo hinkwawo, hikuva swi kombise leswaku a va khomelele eka ripfumelo ra vona eku teni ka Mfumo wolowo. A va karhalanga ku nyikela xikhongelo eka ‘Tata wa le matilweni,’ onge hi loko xi ri xilo lexi heleriweke hi nkoka eka vona.—Matewu 6:9, 10.

14. Ha yini Timbhoni ta Yehova ti phikelela ku chumayela mahungu lamanene ya Mfumo wa Xikwembu?

¹⁴ Hambi loko Timbhoni ta Yehova ti pfumela naswona ti twarisa leswaku Mfumo wu simekiwile ematilweni hi 1914, ta phikelela eku chumayeleni ka mahungu lawa lamanene ya Mfumo. Va endla tano hi mhaka ya leswi Mfumo wolowo lowu simekiweke wu nga si tekaka vulawuri lebyi heleleke bya misava kambe wu pfumelele mimfumo ya misava leyi ku hambeta yi tirhisa matimba ya yona ni vulawuri ehenhla ka swivongo ni tinxaka ta vanhu. (Varhoma 13:1) Hikwalaho wu fanele wu ta hi laha ku teleke, hi leswaku, hi mpimo lowu wu nga hulumendhe leyi nga yoxe leyi lawulaka ehenhla ka misava hinkwayo.—Daniel 2:44.

15. I yini lexi a xi ri karhi xi humelela ku sukela hi Pentekosta ya 33 C.E. lexi a xi ri eka mpimo lowu antswaka swinene ku tlula loko tihosi ta Israyele ti totiwa ke?

¹⁵ Hambi loko a hlawuriwe tanihi Hosi ya Mfumo wolowo, Yesu a nga fumi a ri yexe. Yehova Xikwembu u hlawule valandzeri va 144 000 va N’wana wa yena wa vuhosi ku va vafumi-kulobye eMfun’weni wa Vumesiya wa Xikwembu. (Daniel 7:27) Tanihi leswi tihosi ta khale ta Israyele a ti totiwa hi mafura yo tola yo kwetsima hi muprista lonkulu, xisweswo ku sukela hi siku ra Pentekosta 33 C.E., Yehova u endle leswaku vadyandzhaka-kulobye va 144 000 va Yesu Kriste va totiwa hi moya wa Yena lowo kwetsima, a va tswalela evuton’wini bya moya ematilweni va ri ni “Mufumi wa vafumi ni Hosi ya tihosi.”—Nhlavutelo 19:16; ringanisa 1 Tihosi 1:39.

Paradeyisi Yi Ta Kondleteriwa Hi “Adamu Lowo Hetelela”

16. A ri ri rihi langutelo ra Mfumo loko Yesu a beleriwa, kambe hikwalaho ka yini a a nga ri mutwarisi wa mahungu lama hoxeke ke?

¹⁶ Eku beleriweni ka Yesu hi 33 C.E., a swi languteka swi nga koteki leswaku a nga kala a va ni mfumo. Kambe eku chumayeleni ka yena hi Mfumo wa Xikwembu, a a nga ri mutwarisi wa mahungu lama nga ni xihoxo. Hi siku ra vunharhu endzhaku ka ku beleriwa ka yena, Musunguri wa Mfumo u tiyisekile leswaku vadyondzisiwa va Yesu a va nga ta khongelela hulumendhe leyi nga kotekiki. Yehova u pfuxe Loyi a a ta N’wi yimela eka Mfumo lowu khongeleriwaka ivi a n’wi ambexa hi ku pfumala ku fa.

17, 18. (a) Hi wihi nkoka wa ku vitaniwa ka Yesu “Adamu lowo hetelela”? (b) Xana swiendlakalo swa misava ku sukela hi 1914 swi kombisa yini?

¹⁷ Yesu a a swi tiva leswaku Muvumbi wa Paradeyisi yo sungula emisaveni a a ta veka ndzhwalo wo pfuxeta Paradeyisi ni ku langutela ku tatiwa ka ntanga wa misava hinkwayo ehenhla ka yena. Eka 1 Vakorinto 15:45, 47, ha hlaya: “Hikokwalaho va nga tsala, va ku: ‘Munhu lowo rhanga Adamu, u endliwile xivumbiwa lexi hanyaka.’ Kambe Adamu lowo hetelela ú endliwile moya lowu hanyisaka. Munhu lowo rhanga ú humile emisaveni, ú endliwile hi ntshuri wa misava; munhu lowa vumbirhi ú huma etilweni.” Adamu wa vumbirhi u xike hi le tilweni kutani hi yena loyi Yehova a n’wi tirhisaka ku simeka Paradeyisi laha emisaveni. A ku ri ehenhla ka xisekelo lexi laha Hosi Yesu a vuleke eka mudyohi wa ntwela-vusiwana a ku: “U ta va na mina eku sasekeni eParadeyisini.” (Luka 23:43) Eka bulo leri nakambe swi le rivaleni leswaku Paradeyisi yi ta simekiwa ehenhla ka misava ehansi ka Mfumo wa matilo emavokweni ya Yesu Kriste la kwetsimisiweke, “Adamu lowo hetelela.”

¹⁸ Swiendlakalo swa misava ku sukela hi 1914 swi pfumelelana ni vuprofeta lebyi vuriweke hi Yesu Kriste kutani xisweswo swi tiyisekisa leswaku Yesu a a ri karhi a fuma ku sukela hi nkarhi wolowo. Ku tlula makume-nkombo ya malembe sweswi, vanhu va rixaka ra lembe xidzana leri ra vu-20 lava a va hanya ku sukela hi 1914 va tokote ku hetiseka ka swiendlakalo leswi longoloxiweke eka vuprofeta bya Yesu lebyi kumekaka eka Matewu ndzima 24. Hikwalaho, nkarhi lowu wu tshinelela makumu ya wona, loko ku pfuxetiwa ka Paradeyisi ehenhla ka misava na kona ku tshinela.—Matewu 24:32-35; ringanisa Psalma 90:10.

Nguva Ya Misava Leyintshwa Leyi Nyanyulaka Yi Le Kusuhi

19, 20. (a) Endzhaku ka Armagedoni, Yehova u ta nghenisa lava n’wi rhandzaka eka yini? (b) I yini leswi nga ta fanela ku endliwa endzhakunyana ka Armagedoni?

¹⁹ A ku nge vi mafambiselo ya swilo lama phirhaka, lama karharisaka lawa Yehova a nga ta nghenisa lava n’wi rhandzaka eka wona endzhaku ka ku lwela vulawuri bya yena bya vuako hinkwabyo eka ku kanakana hinkwako etimbaleni ta nyimpi ta Armagedoni. Nguva leyi taka ya ndyangu wa vanhu ehansi ka ku fuma loku tengeke ka Hosi ya Vumesiya, Yesu, N’wana wa Xikwembu yi ta va leyi nyanyulaka swinene. Oho, swilo swo tala leswi nga ta fanela ku endliwa leswi nga ta va mpfuno! Ku onhaka hinkwako loku nga ta va ku sele ehenhla ka misava hikwalaho ka nkwetlembetano wa misava hinkwayo exikarhi ka mavuthu ya le tilweni ya Yehova ni masocha lama hlanganeke ya vubihi ku ta susiwa. A ku na vuthala lebyi nga ta siyiwa.

²⁰ Kambe ku vuriwa yini hi switirho hinkwaswo swa nyimpi leswi matiko ma nga ta swi siya? Hi ku ya hi xikombiso xo fanekisela xa mpimo wa nkarhi lowu nga ta tirhisiwa ku herisa swiphemu swa swona leswi herisekaka, swi ta va swi tele swinene. (Ezekiel 39:8-10) Vaponi va Armagedoni va nga ha swi kota ku tirhisa swihi na swihi leswi saleke eka nyimpi ya matiko eka mintirho leyi pfunaka.—Esaya 2:2-4.

21. Ku fana ni ntokoto wa vaponi va Ndhambi, i xiyimo xihi lexi nga ta langutana ni vaponi va Armagedoni, kambe ku ri na ku hambana kwihi lokukulu?

²¹ Lava fanekiselaka Nowa ni ndyangu wa yena lava katekisiweke va manguva lawa tanihi vaponi va singita va Ndhambi ya misava hinkwayo va ta langutana ni xiyimo xa misava lexi fanaka ni lexi ndyangu wa Nowa wu xi kumeke. Hambi swi ri tano, Sathana Diyavulosi ni mavandla yakwe ya mademona a va nga ha ma hlaseli matilo lama nga vonakiki lama rhendzeleke misava kambe va ta va va siveriwile ku teka goza hi malembe xidzana ya khume. (Nhlavutelo 20:1-3) Vaponi va Armagedoni va ta va ni ntirho lowu tsakisaka wo aka misava leyi hundzeke eka “siku lerikulu [ra Xikwembu xa Matimba Hinkwawo,]” va langutana ni vuyelo byihi na byihi lebyi leswi swi nga ta va swi byi siyile ehenhla ka pulanete leyi.—Nhlavutelo 16:14.

22. Xana vaponi va Armagedoni va ta endlisa ku yini eka mphikamakaneta yo ndlandlamuxa Paradeyisi emisaveni hinkwayo?

²² Leswi va nga vantsongo swinene hi nhlayo, vaponi lava va nyimpi ya Armagedoni entiyisweni va nga languteriwa ku hlamala swinene loko va averiwa ntirho lowukulu wo ndlandlamuxa Paradeyisi emisaveni hinkwayo. Kambe hi tlhelo rin’wana, hi ku tsaka swinene, va ta wu sungula hi ku gingiriteka swinene na hi ku yingisa. Va swi xiya kahle leswaku misava leyi i vunavelo bya milenge ya Xikwembu byo fanekisela naswona hi ku tiyimisela va lava xirhendzevutana lexi xa misava xi tisiwa eka xiyimo xa ku tenga ni ku saseka xi faneriwa hi leswaku milenge ya xona yi tshama ehenhla ka yona.

23. I nseketelo wihi lowu vaponi va Armagedoni va nga ta va na wona tanihi xitiyisekiso xa leswaku ntirho wa vona wo pfuxeta Paradeyisi wu ta humelela ke?

²³ Swa tsakisa ni ku khutaza ku tiva leswaku a va nge siyiwi va ri voxe naswona va nga pfuniwi endzhaku ko sungula ntirho lowu wa ntsako eku hetisiseni xiavelo xa Xikwembu malunghana ni misava. (Ringanisa Esaya 65:17, 21-24.) Va ta va ni nseketelo lowu teleke, lowu nga hikiwangiki wa Loyi a endleke xitshembiso xa Paradeyisi leyi pfuxetiweke ni loyi hi siku ra ku tlhandlukela ka yena etilweni a nga te: “Ndzi nyikiwile vuhosi hinkwabyo etilweni ne misaveni.” (Matewu 28:18) Wa ha ri ni matimba wolawo ni sweswi naswona wa swi kota ku hetisisa xitshembiso xa yena lexi xiyekaka eka mudyohi la nga ni ntwela-vusiwana, hi laha hi nga ta vona ha kona eka xihloko lexi landzelaka.

[Nhlamuselo ya le hansi]

Swivutiso Swa Mpfuxeto

◻ Xana xitshembiso xa Yesu eGolgota xi tiyisekisa yini eka vanhu ni le ka xigevenga xin’wana?

◻ I yini xo sungula eku pfuleni ka ndlela yo tlhelela eParadeyisini?

◻ I yini lexi Adamu wo sungula a tsandzekeke ku xi endla, kambe i yini lexi “Adamu lowo hetelela” a nga ta xi hetisisa?

◻ Endzhaku ka Armagedoni, Yehova u ta nghenisa lava n’wi rhandzaka eka mafambiselo ya swilo ya njhani?

[Xifaniso lexi nga eka tluka 13]

Xihloko lexi nge “Makumu Ya Mifumo Hinkwayo Hi 1914” xi humelerile eka “The World Magazine” wa August 30, 1914