Paradeyisi Leyi Pfuxetiweke Yi Dzunisa Xikwembu

“Nḍi ta twarisa šiv̌andla leši milenge ya mina yi yimaka ka šona.”—ESAYA 60:13.

1, 2. (a) Hi ku tirhisa muprofeta wa xona Esaya, Xikwembu xi vhumbe yini malunghana ni misava? (b) Loko hi languta malembe ya gidi enkarhini lowu taka, hi vona yini?

YEHOVA u tumbuluxe misava tanihi pulanete ehansi ka minkondzo yakwe, tanihi vunavelo bya minkondzo yakwe byo fanekisela. Hi ku tirhisa muprofeta wakwe Esaya, Xikwembu xi vhumbe leswaku xi ta ‘kwetsimisa yona ndhawu ya minkondzo ya xona.’ (Esaya 60:13) Hi mpfuno wa Bibele leyi huhuteriweke, hi nga languta, onge hi ku tirhisa telescope ya matimba, eka malembe ya gidi ya vumundzuku bya munhu. Mawaku xivono xo hlamarisa swonghasi lexi hlanganisaka mahlo ya hina! Misava hinkwayo ya vangama hi ku saseka loku tengeke loku humesiwaka hi Murimi lonkulu evuakweni hinkwabyo. Paradeyisi yi ta va yi pfuxetiwile emisaveni hinkwayo eka vanhu!

² Ina, Munhu la Tlakukeke la nga ni vukwembu la sunguleke vukona bya munhu entangeni wa paradeyisi u ni ku tsaka lokukulu ka munhu emianakanyweni. Mawaku Muvumbi wa rirhandzu swonghasi loyi vanhu va nga na yena, loyi ha yena ku nga riki ku swi hundzeleta ku vula leswaku, “Xikwembu i rirhandzu”! (1 Yohane 4:8, 16) EParadeyisini leyi pfuxetiweke, vavanuna ni vavasati lava vupfeke eku hetisekeni ka vanhu loku nga hava xihoxo va ta tshama swin’we tanihi vamakwavo. (Esaya 9:6) Hi ku susumetiwa hi rirhandzu va titsongahatela Yehova Xikwembu, Muvumbi la vangamaka wa matilo ni misava hi ku helela.

3, 4. (a) Matilo ni misava swi ta yelana hi ndlela yihi? (b) Tintsumi ti ta endlisa ku yini loko Paradeyisi yi pfuxetiwa emisaveni?

³ Magidi ya malembe emahlweni, eka nhlamuselo leyi huhuteriweke hi Xikwembu ya xivandla xa xona, Xikwembu xi vulavule marito lawa lama nyanyulaka eka vanhu va xona lava hlawuriweke xi ku: “Matilo i šiluv̌elo ša mina, ni misav̌a i v̌unav̌elo bya mikonḍo ya mina.” (Esaya 66:1) Ku vangama ka ku kwetsima ka “v̌unav̌elo bya mikonḍo” ya yena, misava ya Paradeyisi, hi laha ku fanelaka ku fanele ku yelana ni ku kwetsima ka xiluvelo xa yena empfhukeni lowu nga vonakiki.

⁴ Hi nkarhi wa ku tumbuluxiwa ka misava, lava a va langutela xiluvelo xa Xikwembu exivandleni xa le henhla va teke misava yi ri ehansi. Mawaku ntsako lowu va faneleke va ve na wona loko mahlo ya vona ma vona ku vangama ka yona loku kwetsimaka! Xana a va ta tshikela yini ku tiphofula hi ku yimbelela risimu ke? (Ringanisa Sofonia 3:17, Revised Standard Version; Psalma 100:2, The Jerusalem Bible.) Muvumbi la tsakisiweke ni la tsakeke u huhutele mutsari wakwe wa le misaveni ku nyikela nhlamuselo leyi pakanisaka ya xivono xa le tilweni, a ku: “Siku tinyeleti ta v̌uša ti baka huwa yo ṭaka, ni v̌ana hikwavo va Šikwembu v̌a yimbelelaka hi ku ṭakisisa.” (Yobo 38:7) Vona mpimo lowukulu swonghasi lowu vana va Xikwembu va tintsumi va nga ta huwelela hi ntsako ha wona, ku dzunisa Xikwembu, loko Paradeyisi yi pfuxetiwile!

5. Hi fanele hi titwisa ku yini mayelana ni ku fikeleriwa ka xikongomelo xo sungula xa Xikwembu malunghana ni misava?

⁵ Swa tsakisa hakunene eka hina ku tiyisekisiwa hi Matsalwa layo Kwetsima lama huhuteriweke leswaku ku pfuxetiwa ka misava ya paradeyisi a ku ri xikongomelo lexi Yehova Xikwembu a tiyimiseleke xona ku sukela eku sunguleni. Ku chaputa loku ka xikongomelo xa Xikwembu hi misava leyi loku tisaka ntsako, loku tisaka ku dzuneka i xilo lexinene xo xi langutela eka Xikwembu lexi sukaka eku dzunekeni xi ya eku dzunekeni lexi nga tsandzekiki ku kombisa vuswikoti bya xona. Ku dzuneka hinkwako ku ya eka xona!—Psalma 150:1, 2; Esaya 45:18; Nhlavutelo 21:3-5.

Lava Pfuxiweke Va Pfuneta Ku Pfuxeta Paradeyisi

6. Endzhaku ka Armagedoni, misava yi ta tatisiwa ku yini?

⁶ Hambi loko vaponi va Armagedoni va ta va vantsongo swinene hi nhlayo, misava a yi nge tatiwi hi xitalo hikwalaho ka ku tswala ka vona vana ntsena. Yehova, nakambe u ta ‘kwetsimisa ndhawu ya minkondzo yakwe’ hi ku tlherisela lava nga emasirheni evuton’wini ni lava nghenaka ehansi ka mimpfuno ya gandzelo ra nkutsulo ra Kriste. Lava, na vona, va ta va ni lunghelo ra ku hlanganyela entirhweni lowu tsakisaka wo cinca xirhendzevutana xa hina xa misava xi va paradeyisi leyi sasekeke ku tlurisa.—Mintirho 24:15.

7. I marito wahi ya Yesu lawa vaponi va Armagedoni va nga ta ma tsundzuka ?

⁷ Vaponi va Armagedoni minkarhi hinkwayo va ta tsundzuka marito lama nyanyulaka moya ya Hosi Yesu Kriste enkarhini lowu a susumeteriweke ku vula a ku: “Mi nga hlamaleni hi mhaka leyi; hikuva nkarhi wa ta lowu hinkwavo lava nge masirheni va nga ta twa rito ra yena; kutani va ta huma.” (Yohane 5:28, 29) Mawaku nkarhi lowu sweswo swi nga ta va wona loko vanhu lava feke emasirheni ya vona va sungula ku twa rito ra N’wana wa Xikwembu ri vula marito lama fanaka ni lama vuriweke eka Lazaro, loyi ntsumbu wa yena a wu etlele esirheni eBethaniya: “Lazaro, humela handle!”—Yohane 11:43.

8, 9. I vamani lava nga ha vaka vo sungula ku pfuxeriwa evuton’wini lebyi pfuxetiweke emisaveni, swi tisa ntsako wihi eka vaponi va Armagedoni?

⁸ I vamani lava nga ha vaka vo sungula ku pfuxeriwa evuton’wini lebyi pfuxetiweke emisaveni ehansi ka ku Fuma ka Gidi ra Malembe ka Yesu Kriste naswona hi ku hlamula xileriso xakwe? Hi laha ku faneleke ku ta va “tinyimpfu tin’wana” leti feke emasikwini ya makumu lama rhangeleke makumu ya mafambiselo lawa ya swilo. Va ta tokota ku pfuxiwa ko sungula. (Yohane 10:16) Hi laha ku twisisekaka a va nge nonon’hweriwi ngopfu ku tilulamisela misava leyintshwa.—Ringanisa Matewu 25:34; Yohane 6:53, 54.

⁹ Mawaku ndlela leyi swi nga ta tsakisa ha yona swonghasi eka vaponi va Armagedoni loko va vona ku pfuxiwa lava va “tinyimpfu tin’wana” lava feke hi nkarhi wa rixaka leri nga emahlweni ka ‘nhlomulo lowukulu’! (Matewu 24:21) Hi matimba lama xiyekaka ya ku titivisa, vaponi va Armagedoni va va xiya, va va amukela ivi va ya emahlweni va pfuxeta ntirho wa vona lowu hlanganeke eka Xikwembu xa le Henhla-henhla na vona!

10. Hi ku pona Armagedoni, i yini lexi u nga xi vonaka?

¹⁰ Hi ku va un’wana wa vaponi va Armagedoni, u nga ha vona ku pfuxiwa ka lavo sungula va maxaka ya wena ya laha misaveni. Xana mintlhaveko ya wena ehenhleni ka leswi yi nga hambana njhani ni liya ya vatswari lava voneke Hosi Yesu a hanyisa n’wana wa vona wa malembe ya 12 hi vukhale emavokweni ya vona ya rirhandzu ke? “Va hlamala hi ku hlamala lokukulu.” (Marka 5:42) Ina, ntsako lowu nga vulekiki hakunene wu ta va wa wena eku pfuxiweni ka vafi e-Hades ni le lwandle. (Nhlavutelo 20:13) Mawaku vumundzuku lebyi vangamaka lebyi ku nga ta va byona, vumundzuku lebyi byi nga ta fika ku nga ri khale!

‘Tihosana eMisaveni Hinkwayo’

11, 12. (a) Xana Psalma 45:16 yi kandziyisa yini? (b) Hosi, Yesu Kriste, a nga ha hlawula “tihosana e misav̌eni hikwayo” exikarhi ka vamani?

¹¹ Hi ku tirhisa matimba ya yena yo pfuxa vanhu lava feke lava a nyikeleke vutomi bya yena bya vumunhu tanihi gandzelo ra nkutsulo hikwalaho ka vona, Yesu u ta swi kota ku hetisisa Psalma 45:16. Pisalema leyi hi vuprofeta yi kongomisiwe eka Yesu Kriste tanihi Hosi leyi tlhomiweke: “V̌ana v̌a wena v̌a ta ṭhama e maṭhaṅweni ya v̌atata wa wena [va le misaveni]; u ta v̌a v̌eka tihosana e misav̌eni hikwayo.” Pisalema leyi yi kandziyisa leswaku Yesu Kriste u ta va tatana wa le tilweni wa vana lava nga laha hansi emisaveni ni leswaku u ta veka vana va xinuna exikarhi ka vona tanihi “tihosana e misav̌eni hikwayo.” Tanihi ‘n’wana Davhida’ naswona tanihi jaha ra mativula ra wanhwana Mariya wa le Yudiya, Yesu a a ri na vakokwana va vanhu va le misaveni ku tlhelela endzhaku ka tatana wo sungula, Adamu.—Luka 3:23-38.

¹² Xana Psalma 45:16 yi vula leswaku lava a va ri vakokwa wa Yesu va ntumbuluko khale va ta va vana vakwe hi ku va pfuxa ka yena eku feni ke? Ina. Xana Psalma 45:16 nakambe yi vula leswaku hi ku tlangela rixaka ra ka vona, Yesu u ta va kombisa rirhandzu ro hlawuleka ra rixaka ivi a hlawula vona ntsena ku va “tihosana e misav̌eni hikwayo” eka xiyimo xa yona xa Paradeyisi? Doo. Ku hetiseka ka vuprofeta hi ndlela yo tano ku ta pfumelela nhlayo leyi hikiweke ntsena ya “tihosana” emisaveni hinkwayo. Handle ka yinhla yoleyo, a hi hinkwavo vakokwa wa yena lava, lava a va xiyeka lerova va faneriwa hi swikhundla swo hlawuleka emisaveni hi nkarhi wa ku Fuma ka yena ka Gidi ra Malembe. Hosi, Yesu Kriste, u ta va ni nhlayo leyikulu yo tlula vakokwa wa yena va le misaveni yo yi hlawula tanihi “tihosana”—vanhu lava fanelekaka va vaponi va Armagedoni, va “tinyimpfu tin’wana” leti pfuxiweke, ku katsa ni vavanuna va ripfumelo va le mahlweni ka Vukriste. Exikarhi ka hinkwavo lava, a nga hlawula lava fanelekaka ku teka swikhundla swa vuhosi tanihi vayimeri vakwe va le misaveni.

13, 14. I vamani lava pfuxiweke lava vaponi va Armagedoni va nga ta va ni lunghelo ro va vona hi mahlo ya vona vini?

¹³ Anakanya hi vanhu vo tano lava nga enxaxamelweni wo pfuxiwa ehansi ka Mfumo wa Vumesiya. Vonani! Xana hi nga ma tshemba mahlo ya hina ke? Ku na Avele, munhu wo sungula ku dlayeriwa ripfumelo na Henoko loyi a hambeteke a famba ni Xikwembu xa ntiyiso. Nakambe, ku na Nowa, muaki wa ngalava. Ku na Abrahama, Isaka na Yakobo vakokwana va rixaka ra Israyele. Ku na Muxe (wa rixaka ra vuprista ra Levhi) na Davhida loyi ku endliweke na yena ntwanano wa hi laha ku nga heriki wa Mfumo. Nakambe ku na Esaya, Yeremiya, Ezekiyele, Daniyele ni hinkwavo vaprofeta va Vaheveru lava tsaleke Bibele ku ta fikela eka wo hetelela wa vona, Malakiya, naswona, kavula, Yohane Mukhuvuri na Yosefa, tata wa Yesu wa muwundli.

¹⁴ Eka xiendlakalo xin’wana Yesu u byele Vayuda leswaku va ta “vona va Abrahama, na Isaka, na Yakobo, swin’we ni vaprofeta hinkwavo eMfun’weni wa Xikwembu, kasi [vona hi voxe va ta va va] cukumetiwile ehandle.” (Luka 13:28) “Ntshungu lowukulu” wa vaponi va le misaveni va ‘nyimpi ya siku lerikulu ya Xikwembu xa Matimba Hinkwawo’ wu ta nyikiwa malunghelo yo vona “Abrahama, na Isaka, na Yakobo, swin’we ni vaprofeta hinkwavo” lava pfuxiweke hi xiviri va tlhelerile laha emisaveni ya Paradeyisi naswona va ri entirhweni wa vuhosi ehansi ka Mfumo wa Xikwembu hi “Tatana l’a nga riki na ku hela,” Yesu Kriste.—Nhlavutelo 7:9, 14; 16:14; Esaya 9:6.

15. I lunghelo rihi leri nga ringanisiwiki leri rindzeleke lava nga ta pona Armagedoni?

¹⁵ Mawaku ndlela leyi swi nga ta nyanyula moya ha yona eka n’wina lava ponaka makumu ya misava leyi ya sweswi yo biha ku pimanisa mintokoto na Nowa ni ndyangu wakwe wa le kusuhi, “vanhu va 8,” lava poneke makumu ya misava yo sungula hi Ndhambi ya misava hinkwayo hi 2370 B.C.E.! Ku hava munhu ni un’we loyi a nga ta va a ve ni mintokoto yo fana ni ya wena ivi xisweswo a swi kota ku tirha tanihi Mbhoni ya Yehova Xikwembu exiendlakalweni lexi xi xiyekaka, lexi nga phindhekiki.—1 Petro 3:20; Marka 13:19; 2 Petro 3:5-7.

Mudyohi La Nga Ni Ntwela-vusiwana A Tsundzukiwa

16, 17. (a) Loko Yesu a tsundzuka mudyohi la nga ni ntwela-vusiwana, i lunghelo rihi leri vaponi va Armagedoni ni van’wana lava nga ta va va hanya hi nkarhi wolowo va nga ta va na rona? (b) I ntshembo wihi wu kumiwaka malunghana ni mudyohi la pfuxiweke?

¹⁶ Handle ko kanakana, hi nkarhi wolowo ku pfuxetiwa ka Paradeyisi emisaveni ku ta va ku ri karhi ku ya emahlweni. Wanuna loyi a a beleriwe eGolgota etlhelo ka Yesu ni loyi hi ku vona mfungho ehenhla ka nhloko ya Yena a nga te, “Yesu, ndzi anakanye, loko u nghena eMfun’weni wa wena,” u ta pfuxeriwa evuton’wini bya le misaveni eParadeyisini leyi pfuxetiweke. (Luka 23:42) Ku ta va ku ri lunghelo ra vaponi va Armagedoni ni van’wana lava nga ta va va hanya hi nkarhi wolowo ku n’wi amukela eku feni. Va ta n’wi dyondzisa hi xitalo mayelana ni Hosi leyi fumaka sweswi, Yesu Kriste, loyi eka yena a kombiseke ntwela-vusiwana wa xiviri hi Nisan 14 ya lembe ra 33 C.E.

¹⁷ Hosi Yesu Kriste a nge tsandzeki ku n’wi tsundzuka hi nkarhi wa ku fuma ka Yena ka malembe ya gidi. Handle ko kanakana, mudyohi yoloye la nga ni ntwela-vusiwana la pfuxiweke u ta kombisa ku tlangela ka yena Hosi leyi fumaka, Yesu Kriste, loyi a pfuxiweke hi yena, hi ku hlayisa vutshembeki byakwe eka Mulawuri wa Vuako, Yehova Xikwembu. Xisweswo u ta vuriwa la fanelaka hi ku tsakela ku hanya emisaveni leyintshwa ya Paradeyisi hi laha ku nga heriki kun’we ni hinkwavo vanhu lava kondleteriweke, lava yingisaka.

Vutomi eNtangeni Wa Edeni Lowu Pfuxetiweke, Wa Misava Hinkwayo

18. Vutomi byi ta va njhani eParadeyisini leyi pfuxetiweke?

¹⁸ EParadeyisini leyi pfuxetiweke, un’wana ni un’wana i munghana wa mani na mani. Swiboho swa vuxaka bya ndyangu wa misava hinkwayo swi kumeka eku enteni ka moya wa un’wana ni un’wana. Hinkwavo va twisisana. Va vulavula ririmi rin’we ra misava hinkwayo. Kumbexana i ririmi ro sungula ra vanhu, leri un’wana ni un’wana emisaveni a ri vulavuleke eka malembe yo sungula ya 1 800 ya vukona bya vanhu—ku sukela eku vumbiweni ka Adamu hi 4026 B.C.E. ku fikela esikwini ra Peleg (2269 ku ya eka 2030 B.C.E.), hikuva “e nkarini wa yena misav̌a [hi leswaku, vaaki va misava] yi av̌anyisiwile.” (Genesa 10:25; 11:1) Un’wana ni un’wana u tsakela lunghelo ro hanya naswona siku rin’wana ni rin’wana lerintshwa ri amukeriwa hi ku nkhensa siku leri engeteriweke ra vutomi. Ku tsana ka miri a ka ha andzi loko nkarhi wu ya emahlweni. Matimba ya miri ma vuyeteriwa naswona mimiri a ya ha karhali.—Ringanisa Yobo 33:25.

19. I yini lexi nga ta xiyiwa ehenhleni ka lava khale a va lamarile?

¹⁹ Nakambe vonani! Lava lamaleke va famba, ina, va tlulatlula hi ku tsaka. Mavoko ni milenge leswi lahlekeke swi tlheriseriwile hi singita. Lava a va nga voni va vona, vo fa tindleve va twa, timbeveve ta vulavula, naswona ta yimbelela hi ku tsaka. (Ringanisa Esaya 35:5, 6.) Ku nga languteki hikwalaho ka ku akeka ka munhu ni xivumbeko swa nyamalala. Vavanuna va ringaniseriwa hi vavasati hi ndlela leyi xongeke. (Genesa 2:18) Ku hetiseka ka vanhu ku dzunisa Yehova Xikwembu, Muvumbi wa miri wa munhu lowu hetisekeke.

20. Ku ta xiyiwa yini mayelana ni matimba ya ntumbuluko, mphakelo wa swakudya, ntumbuluko wa swiharhi ni ndlela leyi misava yi nga ta tirhisiwa ha yona ke?

²⁰ Misava hinkwayo yi va xivandla xin’we xo saseka xa misava hinkwayo. A ku na xiphemu na xin’we emisaveni laha ku nga ni xiviko xihi na xihi xa dyandza kumbe mpfula leyi onhaka kumbe swihuhuri, mabubutsa, ti-typhoon ni swidzedze leswi onhaka. (Ringanisa Marka 4:37-41.) Hinkwawo matimba ya ntumbuluko ma ringaniseriwa hi laha ku heleleke ku endla misava hinkwayo ndhawu leyi tsakisaka ku hanya eka yona. A ku na laha ku pfumalekaka swakudya, hikuva misava yi humesa swakudya swa yona hi xitalo. (Psalma 72:16) Ku rhula ni nsirhelelo ku kumeka emisaveni hinkwayo eka vanhu ni swiharhi, hi laha Yehova a vulaka ha kona a ku: “Ku nga ka ku nga endliwi ŝo biha, ni ku onhiwa e nṭhav̌eni hikwayo leyi kwetsimaka ya mina.” (Esaya 11:9; nakambe vona tindzimana 6-8.) Hi ndlela leyi misava yi ta endliwa ndhawu yo tsakisa ku hanya eka yona ni ku yisa vugandzeri ni ku tirhela Yehova Xikwembu, Muvumbi ni N’wini wa misava emahlweni. Leswi yi nga ya yena hikwalaho ka leswi a yi tumbuluxeke, yi fanele yi tirhisiwa hi ndlela leyi tsakisaka yena ni leyi n’wi dzunisaka.—Ringanisa Esaya 35:1, 2, 6, 7.

21. Xana vanhu lava kutsuriweke va ta swi languta njhani swilo hinkwaswo leswi nga emisaveni naswona i vuyimbeleri byihi lebyi nga ta twiwa?

²¹ I swintshwa hi laha ku phyuphyisaka—sweswo hi leswi hinkwaswo swi nga swona eka vanhu lava kutsuriweke emisaveni lava a va nga si tshama va va endzeni ka ntanga wa Edeni wa Paradeyisi laha vutomi bya munhu byi sunguleke kona hi ku hetiseka loku sasekeke! (Nhlavutelo 21:5) Mawaku vuyimbeleri byo tsakisa swonghasi, bya swichayachayani ni bya rito, lebyi byi nga ta twiwa hi nkarhi wolowo—hinkwabyo ka byona byi dzunisa Yehova!—1 Tikronika 23:4, 5; Psalma 150:3-6.

22. Swi ta va njhani ku hanya emisaveni leyintshwa ya Paradeyisi?

²² Vona ndlela leyi swi nga ta tsakisa ha yona ku hanya emisaveni leyi eka yona vutomi bya vanhu byi nga ta andza hi xitalo ni laha swivandla hinkwaswo swa ku tsana hikwalaho ka xidyoho xo sungula xa Adamu swi nga ta va swi herisiwile! (Ringanisa Yohane 10:10.) Ina, ku ta va misava leyi swivumbiwa hinkwaswo swa vanhu leswi amukeriweke swi nga ta kombisa xifaniso ni ku fana na Yehova Xikwembu leswi munhu wo sungula Adamu a a vumbiwe ha swona! (Genesa 1:26, 27) Misava a yi nga ha vi leyi tlunyaka mahlo eka tiserafimi, tikerubimi ni tintsumi leti vangamaka ta le tilweni. Loko ti hundzuluxela swikandza swa rirhandzu emisaveni, ti yi languta yi ambexiwe hi ku saseka ka paradeyisi, ti ta va ni ku dzunisa ni ku tlangela ntsena ku swi phofula eka Loyi ti nga ni lunghelo ro hlalela swivumbiwa swakwe hi ku kongoma—Yehova, Mulawuri wa Vuako.—Matewu 18:10.

Vumundzuku Lebyi Tsakisaka, Lebyi Nga Riki Na Makumu

23. I yini leswi kotekaka malunghana ni Vakriste lava totiweke naswona swi va ni vuyelo byihi eka vaaki va Paradeyisi ya le misaveni?

²³ Swi le ka xivandla lexi kotekaka ni lexi tshembisaka leswaku, siku rin’wana enkarhini lowu taka, mavito ya Vakriste volavo hinkwavo lava totiweke lava tiyiseke “ku vitaniwa ni ku hlawuriwa” ka vona ko ya eMfun’weni wa le tilweni ni lava va katekisiweke hi ku pfuxiwa loku ka le henhla va ta tivisiwa hi xitalo eka ndyangu wa vanhu emisaveni ya vona ya Paradeyisi. (2 Petro 1:10; Psalma 87:5, 6) Xisweswo, ku pfumaleka ka vadyondzisiwa va Yesu Kriste lava totiweke lava tswariweke hi moya va 144 000 emisaveni ya Paradeyisi ku ta twisisiwa kahle ku anerisa un’wana ni un’wana na hi ku va tsakela hi mbilu hinkwayo ni ku tsaka na vona.

24. (a) I yini lexi Yehova a nga ta va a xi hetisisile malunghana ni “vunavelo bya milenge” ya yena? (b) Hi swi tivisa ku yini leswaku misava leyintshwa a yi nge vi na makumu naswona i risimu rihi ra vuprofeta leri nga ta hetiseka?

²⁴ Byi ta tsakisa swinene vumundzuku lebyi nga riki na makumu eka hinkwavo lava tshamaka va chava Yehova handle ko karhala, Mufumi wa vuako hinkwabyo. Misava ya Paradeyisi leyi tatiweke kahle yi ta va ndhawu leyi faneleke, ndhawu leyi dzunekaka, tanihi “vunavelo bya milenge” lebyi minkondzo ya Xikwembu yi nga tshamaka ehenhla ka byona hi ndlela yo fanekisela. Ina, Yehova u ta va a kwetsimise ‘ndhawu ya minkondzo yakwe’ hi laha ku nga heriki, naswona vanhu hinkwavo va ta titsongahatela yena handle ko kanakana! (Matewu 5:34, 35; Mintirho 7:49) Misava leyintshwa yi ta va misava leyi nga hava makumu hikuva “ku fuma ka yena [ku ta va ni ku] rula loku nga heriki.” (Esaya 9:7) Manuku, risimu ra vuprofeta ra tintsumi ta le tilweni eku tswariweni ka Yesu eBetlehema wa Yudiya hi 2 B.C.E., leri nge: “Ku kwetsima a ku ve eka Xikwembu ematilweni ya le henhla, ku rhula a ku ve emisaveni eka vanhu lava xi va tsakelaka,” ri ta hetiseka.—Luka 2:13, 14.

25. (a) Lava va nga va “ntshungu lowukulu” wa “tinyimpfu tin’wana” va ta tlangela yini hi nkarhi wolowo? (b) Ku navela ka hina loku humaka embilwini ku fanele ku va kwihi?

²⁵ Lava va nga va “ntshungu lowukulu” wa “tinyimpfu tin’wana” ta Murisi Lonene va tlangela marito lama nyanyulaka moya ya xitshembiso xa Paradeyisi leyi pfuxetiweke. I lunghelo ra vona ku hlanganyela ni nhlengeletano ya Xikwembu sweswi ni ku katseka hi ku gingiriteka entirhweni lowu vhumbiweke hi Hosi Yesu Kriste, ku chumayela mahungu lamanene ya Mfumo emisaveni hinkwayo leyi akiweke ku nyikela vumbhoni byo hetelela. (Matewu 24:14; Marka 13:10) Ku navela ka hina ka xiviri, loku humaka embilwini tanihi Timbhoni ta Yehova i ku hlayisa vutshembeki bya hina byi nga thyakisiwanga hi laha ku nga heriki, ku tisa ku dzuneka ni ku lweriwa ka Mulawuri wa Vuako, Yehova Xikwembu hi laha ku nga heriki, ni le hansi ka vuhosi bya N’wana wa yena la tswariweke a ri swakwe, Yesu Kriste. “Aleluya!”—Nhlavutelo 19:1, 3, 4, 6; Swivuriso 10:9.

A Wu Ta Hlamurisa Ku Yini?

◻ I xitshembiso xihi lexi Yehova a xi endleke malunghana ni misava, vunavelo bya minkondzo yakwe byo fanekisela?

◻ I vamani lava nga ta pfuneta eku pfuxeteni ka Paradeyisi?

◻ Hosi, Yesu Kriste, u ta hlawula “tihosana e misav̌eni hikwayo” exikarhi ka vamani ke?

◻ Hi wihi ntokoto lowu nyanyulaka moya lowu nga ha vaka wa wena loko ku pfuxiwa ka vafi ku humelela?

◻ I vumundzuku byihi lebyi yimeleke lava va tshamaka va chava Yehova handle ko karhala?